Klei Aê Diê Blŭ: I Y-Pêtrôs 4:15-19
Êlan kliăng: “Ƀiădah lĕ tơdah sa čô tŭ klei knap mñai kyua ñu jing pô đăo kơ Krist, đăm brei ñu hêñ ôh, ƀiădah brei ñu mpŭ mni kơ Aê Diê kyua ñu mâo anăn Krist” (I Y-Pêtrôs 4:16)
Klei êmuh ksiêm mĭn: Phung đăo kơ Krist srăng tuôm hŏng ya klei hêñ leh anăn ya ngă? Klei hêñ anăn atăt kơ ya klei? Ya ngă đăm brei Phung đăo kơ Krist hêñ ôh kyua Anăn Khua Yang? Si drei srăng hdĭp čiăng đăm hêñ ôh kyua Anăn Krist?
Lu mnuih duah djăp êlan čiăng ñĕ kơ klei knap mñai, hlăm đa đa klei tơdah brei ruah, mâo mnuih hngah kơ klei đăo. Ƀiădah ăt mâo mơh mnuih dôk tŭ klei kñap mñai ƀuh hêñ kyua Anăn Krist, diñu blŭ duñ duñ “Kâo tŭ hĕ klei knap mñai kyua kâo jing sa čô đăo kơ Krist”. Ƀiădah boh sĭt, klei diñu dôk dơ̆ng ƀơ̆ng huă jing mta phŭn atăt kơ klei knap mñai diñu găn. Kyua anăn Khua ƀĭng kna Y-Pêtrôs mtă kơ phung đăo, “Ƀiădah đăm brei ôh sa čô hlăm phung diih tŭ klei knap mñai kyua ñu jing pô bi mdjiê mnuih, amâodah pô knĕ, amâodah pô ngă soh prŏng, amâodah pô khăp mŭt bi rŭng hlăm bruă arăng” (êlan 15). Pô tŭ klei knap mñai kyua bruă ngă soh jhat pô snăn amâo bi guh kơang Anăn Khua Yang ôh leh anăn ñu pô ăt srăng tŭ klei arăng dlăng hơăi mang.
Hlăm wưng Khua ƀĭng kna Y-Pêtrôs čih hră anei, mâo lu mnă, phung ƀun ƀin leh anăn lu mnuih đăo Yuđa lŏ wĭt đăo kơ Khua Yang Yêsu. Diñu tŭ lu klei phung Rôm mưč mač, dlăng hơăi mang tơdah diñu “jing phung đăo kơ Krist”. Hlăk anăn, iêô sa čô mnuih jing Phung đăo kơ Krist jing mâo klei mưč mač kơ pô anăn. Khua ƀĭng kna Y-Pêtrôs mtă kơ phung ayŏng adei ñu khăp hơiêng đăm hêñ ôh kyua Anăn Krist, ƀiădah brei mpŭ kơ Aê Diê leh anăn “hơ̆k mơak kyuadah Aê Diê yap digơ̆ năng tŭ klei hêñ kyua anăn Yêsu” (Bruă Phung Khua Ƀĭng Kna 5:41). Khua ƀĭng kna Y-Pôl tuôm lač leh, ñu amâo hêñ ôh kơ Klei Mrâo Mrang Jăk “kyuadah ñu jing klei myang Aê Diê pioh bi mtlaih grăp čô hlei pô đăo, phung Yuđa êlâo hĭn, leh anăn wăt phung Grĕk mơh” (Rôm 1:16). Êngao anăn, bruă Khua Yang brei phung ƀuôn sang Ñu lŏ tŭ klei knap mñai ti krah lăn ala anei čiăng bi doh klei hdĭp leh anăn hriăm mjuăt klei đăo grăp čô phung đăo kơ Krist, jing phung dôk hlăm Sang Aê Diê jing Phung Sang Aê Diê. Kyua ênuk phat kđi truh leh, klei Aê Diê phat kđi srăng truh hnơ̆ng, hŏng klei tuh klei ngêñ kjham snăk kơ phung hngah kơ Klei Mrâo Mrang Jăk (êlan 17).
Čiăng amâo hêñ ôh kyua Anăn Khua Yang, grăp čô Phung đăo kơ Krist brei knang kơ ai ktang Khua Yang ñĕ kbưi hŏng klei soh, amâo ngă ôh klei soh jhat. Grăp hruê duah klei Khua Yang čiăng hlăm Klei Aê Diê Blŭ čiăng hdĭp hlue si Klei Aê Diê Blŭ mtô, kriê kjăp klei đăo găn jih klei lông dlăng, knap mñai. Hrô kơ ƀuah ăl kơ Khua Yang, brei drei thâo tŭ klei kñap mñai kyua Anăn Khua Yang jing klei Ñu bi hriăm klei đăo drei. Kyua ênuk knhal tuč truh leh, grăp čô brei dôk ti anăp Khua Yang, leh anăn Khua Yang srăng brei klei bi mni kơ phung tŭ klei knap mñai kyua Anăn Ñu.
Drei ƀuh hơ̆k mơak mơ̆ tơdah dưi jing phung đăo kơ Krist?
Wah lač: Ơ Khua Yang, kâo hơêč hmưi bi mni kơ Khua Yang guh kơang lă lar! Akâo kơ Ih thiăm ai ktang leh anăn đru kâo thâo Ih brei klei lông dlăng, knap mñai truh jing čiăng bi doh kâo leh anăn bi hriăm mjuăt klei đăo kâo. Akâo kơ Ih đru kâo amâo hêñ ôh ƀiădah jhŏng, bi mni kơ Ih, bi guh kơang Anăn Ih hlăm djăp boh klei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Galati 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
