Klei Aê Diê Blŭ: Y-Yôsuê 5:1, 6:1, 7:2-5
Êlan kliăng: “Brei diih hdơr kơ jih jang êlan Yêhôwa Aê Diê diih atăt diih êjai pă pluh thŭn anei hlăm kdrăn tač, čiăng bi luă gŭ diih, lông dlăng diih čiăng thâo ya mâo hlăm ai tiê diih, thâodah diih srăng djă pioh klei Ñu mtă amâodah hơăi.” (Klei Mtô Mñă Klei Bhiăn 8:2)
Klei êmuh ksiêm mĭn: Si phung ƀuôn sang Israel dưi mĭn kơ phung kahan, kơ klei ktang, leh anăn hruê êdei anăp diñu? Ya ngă Aê Diê brei phung ƀuôn sang Ñu tlă anăp hŏng dua boh ƀuôn prŏng Yêrikô leh anăn Ahi? Ya klei mñă kơ drei kơ jih klei lông dlăng truh drei dôk găn?
Hlăk anăn, phung ƀuôn sang Israel dơ̆ng mŭt hlăm Čar Aê Diê Ƀuăn, leh 40 thŭn hiu rưng hlăm kdrăn tač. Diñu jing phung ênuk mrâo, kyuadah jih jang phung 20 thŭn kơ dlông djiê jih leh, knŏng êngao kơ Y-Yôsuê leh anăn Y-Kalep (Klei Yap 14:29-30). Dưi lač, Israel hlăk anei jing sa phung ƀuôn sang hlăk ai leh anăn ktang. Klei yuôm hĭn jing diñu mrâo mŭt hlăm čar Aê Diê ƀuăn hŏng klei myang yuôm bhăn, tơl ai tiê phung găp djuê leh anăn phung mtao hlăm čar Kanaan “dlưh ai tiê leh anăn amâo thâo lŏ mĭn ôh kyua phung ƀuôn sang Israel” êdei kơnăn sa wưng sui snăk, ară anei phung ƀuôn sang Israel dôk dưn hruê mlan siam sĭn leh jăk mơak hĭn, jih klei dleh dlan msĕ si êgao leh, ƀiădah mmông anăn mtam diñu tlă anăp hŏng klei lông dlăng prŏng prĭn: ƀuôn prŏng Yêrikô, sa boh ƀuôn mâo mnư̆ kpal mgang kjăp mră.
Aê Diê čiăng mñă kơ phung ƀuôn sang Israel snei, mŭt hlăm Čar Aê Diê Ƀuăn amâo djŏ jing tuč ruĕ leh ôh, ƀiădah kčưm dơ̆ng kơ klei bi blah mrâo. Anăn ăt jing klei hriăm kơ grăp čô drei brei hriăm nanao tơl jih klei hdĭp pô. Hlăm knhuang êbat klei hdĭp mngăt, lu blư̆ drei găn gao klei lông dlăng prŏng snăk hlăm klei hdĭp, amâodah mâo klei bi knal yuôm bhăn leh anăn mrâo mda, ƀiădah mta phŭn amâo djŏ ôh sa gưl hlăk mâo klei dưi hĭn. Ƀiădah klei dưi hĭn ti knhal tuč; amâo djŏ hlăm kčưm klei bi blah ôh, ƀiădah hlăk ruĕ klei bi blah hŏng klei kdrưh kơang (II Y-Timôthê 4:7).
Tơdah mkă hŏng Yêrikô, ƀuôn tal dua jing Ahi điêt hĭn lu snăk. Msĕ si drei thâo leh, phung ƀuôn sang Aê Diê dưi hĭn leh hŏng Yêrikô kyua mơ̆ng klei diñu gưt asăp Aê Diê, ƀiădah diñu dluh lĕ hêñ mlâo snăk ti anăp ƀuôn điêt Ahi kyuadah amâo čiăng êmuh akâo klei Aê Diê atăt gai ôh. Jih dua klei bi blah anei mtô leh phung ƀuôn sang Israel leh anănwăt kơ phung ƀuôn sang Aê Diê hruê anei lu klei hriăm klei hdĭp mngăt yuôm bhăn. Tal sa, đăo knang, gưt asăp kơ Aê Diê jing mta čuăn kơ klei dưi hĭn. Tal dua, đăm mluk mgu ngă klei krưh mgao ôh leh anăn mĭndah drei pô mâo djăp klei ktang dưi čuăn ngă tui si pô. Hdơr bĕ nanao klei anei, jih jang ya klei drei dưi mâo hruê anei kbiă hriê mơ̆ng Aê Diê sơăi, leh anăn kyua khăp, Ñu mkra mjuăt, mñă, ktrâo mtô čiăng kơ drei djă pioh gưt ngă klei Ñu mtă (Klei Mtô Mñă Klei Bhiăn 8:2). Tal tlâo, mnư̆ mgang ƀuôn prŏng hĭn amâo djŏ ôh Yêrikô amâodah Ahi, ƀiădah ai tiê drei pô yơh. Myơr bĕ “mnư̆ mgang ƀuôn prŏng” anăn kơ Aê Diê leh anăn đup gưt klei Mtao dlông hĭn kơ jih jang mtao kiă kriê, čiăng kơ drei dưi găn gao jih klei lông dlăng hlăm ƀuôn sang leh anăn hdĭp klei hdĭp đăo ti krah lăn ala.
Si ngă drei sĭt leh mơ̆ myơr ai tiê drei kơ Khua Yang kiă kriê?
Wah lač: Ơ Khua Yang, grăp hruê kâo tlă anăp nanao hŏng “Yêrikô”amâodah “Ahi”, akâo Khua Yang mñă kâo brei đăo knang, gưt asăp Khua Yang, leh anăn knang kơ Khua Yang čiăng dưi găn gao klei lông dlăng hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
