Klei Aê Diê Blŭ: Klei Mmuñ Hđăp 23:1-6
Êlan kliăng: “Ñu brei kâo đih mdei hlăm anôk rơ̆k mda, ñu atăt kâo hlue anôk êa êđăp ênang.” (Klei Mmuñ Hđăp 23:2).
Klei êmuh ksiêm mĭn: Hŏng hlei pô, mtao Y-Đawit yua čiăng hưn mdah rup Aê Diê jing? Si Khua Yang ngă hŏng ñu? Si klei drei bi knal kơ klei răng mgang êdu êun mơ̆ng Aê Diê?
Klei Mmuñ Hđăp 23 jing sa hlăm dŭm Klei Mmuñ Hđăp hing ang snăk mâo lu mnuih khăp leh anăn răk tuč. Lu phung mnuih ngă rup, mnuih mčeh mjing klei kưt mmuñ leh anăn mnuih thâo duê mkra čih mă mơ̆ng rup mgăt biăp hlăm Klei Mmuñ Hđăp anei. Pô čih Klei Mmuñ Hđăp 23 jing mtao Y-Đawit. Klei hdĭp ñu găn lu lĭn klei truh dleh dlan knap mñai, ƀiădah ñu bi knal nanao klei Aê Diê kiă kriê ñu hŏng klei êdu êun, suôr tliêr. Dơ̆ng mơ̆ng klei thâo kral jăk jĭn anei, ñu čih Klei Mmuñ Hđăp 23 msĕ si sa klei mmuñ bi mni lač jăk kơ Aê Diê leh anăn hưn mdah Ñu hlăm rup sa čô Mgăt Biăp jăk, ênang, êdu êun leh anăn suôr tliêr.
Rup pô mgăt atăt phung biăp truh ti “anôk rơ̆k mda”, “anôk êa êđăp ênang” sĭt nik êdu êun leh anăn êđăp ênang êdimima! Mgăt biăp êdu êun uêñ mĭn nanao leh anăn thiê brei djăp mta klei čiăng, kơ klei hdĭp kđeh wăt kơ mngăt ai tiê phung biăp (êlan 3,5). Ñu ăt hŏng jih ai tiê răng kriê êđăp ênang kơ biăp Ñu, phung biăp mâo klei hơĭt ai tiê kyua mâo giê dra leh anăn giê knuăk Khua Yang răng mgang (êlan 4). Mtao Y-Đawit bi knal klei êđăp ênang leh anăn klei mơak mơai tơdah dôk hlăm păl kngan Khua Yang răng kriê, snăn wăt tơdah dôk “ti anăp phung roh kâo” amâodah “êbat hlăm troh êyui klei djiê”, ñu ăt kăn “kâo amâo srăng huĭ kơ sa mta klei jhat ôh; kyuadah ih dôk mbĭt hŏng kâo” (êlan 4-5).
Hŏng Klei Mmuñ Hđăp 23, mtao Y-Đawit čiăng kơ jih jang mnuih thâo kral Aê Diê jing Pô răng mgang, kiă kriê phung anak ƀuôn sang Ñu dôk êđăp ênang nanao wăt ya mta klei truh dưn. Ñu ăt đru jih jang mnuih thâo săng Aê Diê jing Pô kăp thiê brei, djăp mta klei čiăng hlăm klei hdĭp kđeh wăt klei hdĭp mngăt. Leh anăn ñu čiăng jao kơ jih jang mnuih msĕ mơh, klei hưn bi sĭt mbĭt hŏng klei ƀuăn rơ̆ng, ñu mâo klei mơak mơai nanao hlăm kngan Pô ênang, êdu êun răng kriê klei hdĭp ñu. Ñu kñăm ktang snăk hlăm klei blŭ ti knhal tuč: “Sĭt nik klei jăk leh anăn klei pap srăng tui hlue kâo jih jang hruê kâo dôk hdĭp; leh anăn kâo srăng dôk hlăm sang Yêhôwa nanao hlŏng lar” (êlan 6).
Năng ai drei tuôm ƀuh leh mơh rup čih mkra siam mbruă, hưn mdah kơ Khua Yang msĕ si sa čô Mgăt jăk dôk pŭ kmiêk êdu êun sa drei biăp hlăm kngan leh anăn răng atăt phung biăp. Dlăng kơ rup anăn leh anăn lŏ hdơr kơ Klei Mmuñ Hđăp 23, drei bi ƀuh mâo sa čô mgăt êdu êun êdimi, ênang leh anăn hŏng jih ai tiê răng kriê kơ phung biăp ñu. Hmăng hmưi grăp čô anak ƀuôn sang Aê Diê thâo bi knal sơăi, klei răng kriê mơ̆ng Pô Mgăt Biăp Jăk kơ klei hdĭp drei pô msĕ si pô čih Klei Mmuñ Hđăp 23. Aê Diê drei dôk đăo knang leh anăn kkuh mpŭ jing Pô mgăt biăp êdu êun, ênang, khăp hơiêng leh anăn dôk răng kriê čêč drêč djăp mta klei kơ klei hdĭp drei.
Si ngă drei tuôm bi knal mơ̆ klei Khua Yang răng kriê êdu êun êđăp ênang pioh kơ drei?
Ơ Khua Yang, bi mni lač jăk kơ Ih kyua brei kâo dưi jing biăp hlăm phung biăp Ih. Akâo Ih đru kâo jing biăp jăk, thâo mđing hmư̆ leh anăn thâo đup gưt Klei Ih Blŭ čiăng kơ kâo dưi dôk hlăm sang Ih nanao hlŏng lar.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 21:1-25
Kênh Youtube BHKTHN:
