Klei Aê Diê Blŭ: Y-Yakơ 3:7-12
Êlan kliăng: “…kyuadah bŏ dlai hlăm ai tiê yơh, ƀăng êgei blŭ”(Y-Luk 6:45b)
Klei êmuh ksiêm mĭn: Si Y-Yakơ lač kơ klei anak mnuih dưi mđăo bi ƀlum êlah? Klei čih hlăm êlan 11-12 lač si ngă kơ klei blŭ? Si ngă čiăng dưi răng kriê klei blŭ?
Êlah, amâodah klei blŭ anak mnuih dưi mđĭ ai amâodah bi êdu ai, đru amâodah mdlưh, bi hlao amâodah ngă bi êka ai tiê, ba klei hdĭp amâodah ngă bi djiê…, kyua anăn klei yuôm bhăn jing brei thâo răng kriê êlah pô. Tinei, Y-Yakơ mblang răng kriê êlah amâo ênưih ôh. Jih jang mnơ̆ng, mơ̆ng hlăm adiê, ti gŭ êa ksĭ amâodah ti lăn hang, mnơ̆ng hlăm dliê dưn mơh ăt anak mnuih dưi mƀlum mơh, khădah snăn diñu amâo dưi răng kriê ôh êlah pô (êlan 7-8). Mâo leh lu hdruôm hră, hdră hriăm mjuăt, ƀiădah anak mnuih amâo dưi răng kriê kluôm dhuôm ôh klei blŭ. Kyua bruă amâo djŏ knŏng dôk hlăm êlah, kƀông ƀăng êgei ôh, ƀiădah lŏ dôk hlăm lam ai tiê.
Hlăm dua êlan 11-12, Y-Yakơ yua rup sa akŏ êa leh anăn ana boh hra čiăng kơ knuih klei mâo. Hlăm dliê, amâo mâo ôh sa akŏ êa đoh mâo êa mmih mbĭt hŏng êa phĭ amâodah êa msĭn. Ăt kăn mâo mơh ana boh anei lŏ mboh boh mkăn. Klă sĭt jih mta klei bi êdah ti êngao kbiă hriê mơ̆ng knuih hlăm lam sơăi. Jing klei blŭ lač kơ boh klei hlăm lam ai tiê. Khua Yang Yêsu mtô leh kơ ai tiê bŏ hŏng klei soh snăn klei blŭ ăt bŏ hŏng klei soh mơh (Y-Luk 6:45).
Snăn, bruă amâo djŏ jing si ngă răng kriê klei blŭ ôh ƀiădah si ngă răng kriê ai tiê drei kpă ênô nanao, bi mơak kơ Aê Diê! Msĕ si sa drei êmông brêč amâo dưi bi mlih ôh klei brung ñu, amâo mâo ôh hlei pô hlăm phung drei čŏng dưi bi mlih ai tiê pô (Y-Yêrêmi 13:23). Djăp klei gĭr anak mnuih lač kơ klei hmăi mơ̆ng nah êngao leh anăn amâo mâo ôh klei tŭ dưn sui. Bi mni kơ Aê Diê kyua hlăk êjai anak mnuih amâo lŏ ƀuh êlan êbat snăn amâo mâo ôh ya klei Aê Diê amâo dưi ngă. Aê Diê ƀuăn hŏng phung ƀuôn sang Ñu, “Kâo srăng brei kơ diih ai tiê mrâo, kâo srăng dưm hlăm diih mngăt myang mrâo” (Y-Êsêkiêl 36:26). Kyua klei pap leh anăn klei myang Aê Diê, tơdah drei đăo kơ Khua Yang Yêsu, drei jing leh sa mta mnơ̆ng mrâo. Khădah snăn, amâo djŏ leh drei đăo kơ Khua Yang drei amâo lŏ ngă soh ôh kơ klei blŭ. Kyua drei ăt dôk hdĭp hlăm kđeh asăr êdu awăt anei, drei ăt lŏ khăng ngă soh mơh. Ƀiădah tơdah drei dưm ai tiê pô kơ Yang Mngăt Jăk atăt gai, drei srăng thâo kơ klei myang Ñu bi mlih grăp hruê. Klei drei blŭ ăt srăng dưi bi mlih mơ̆ng hnơ̆ng drei mguôp sĭt suôr hŏng Aê Diê. Tơdah amâo ngă snăn, drei ăt srăng ngă “Mơ̆ng ƀăng êgei anăn mơh kbiă hriê klei hơêč hmưi leh anăn klei tăm pah …” (êlan 10). Akâo kơ Aê Diê srăng đru drei gưt asăp Aê Diê nanao čiăng kơ klei drei blŭ ba klei tŭ dưn leh anăn bi mđĭ ai.
Klei drei blŭ bi êdah kơ si boh klei lăm lam ai tiê pô?
Wah lač: Ơ Khua Yang, kâo thâo kơ klei êdu awăt pô hlăm klei răng kriê ƀăng êgei. Ăt adôk mâo lu blư̆ klei kâo blŭ bi têč hnêč kơ ayŏng amai adei kâo. Akâo kơ klei myang Yang Mngăt Jăk dôk hlăm kâo, mlih mrâo kâo ƀrư̆ hruê ƀrư̆ lu, čiăng kơ klei kâo blŭ bi êdah sa ai tiê bŏ hŏng klei Ih kiă kriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
