Khiavdim 32:30-35
Nqe cim:
“Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis” (Yauhas 3:16).
Lus nug rau sawvdaws xav:
- Vim licas Mauxes yuav tsum thov Vajtswv rau nws haivneeg?
- Mauxes muaj nplooj siab licas rau tus Tswv haivneeg?
- Peb kawm tau dabtsi dhau ntawm tus Tswv tej lus teb?
Mauxes tau tus Tswv xaiv los ua tus coj haivneeg Yixalayees thiab ua tus sawv cev ntawm cov Yixalayees tabmeeg tus Tswv. Yog tus coj haiv neeg Yixalayees, Mauxes tau txiav txim rau lawv kev pe mlom, nws cem Aloos tabmeeg sawvdaws, muab tus mlom nyuj zom mos mos, muab tov dej rau cov pejxeem haus, yuam tus Tswv haivneeg lees nyias txojkev ntseeg, thiab rau txim rau cov uas tawmtsam tus Tswv.
Yog tus sawv cev ntawm haivneeg Yixalayees, Mauxes sawv tom hauv ntej tiv txhua yam tabmeeg tus Tswv. Mauxes nyuaj siab heev vim tus Tswv chim rau Nws haivneeg kawg li (nqe 7-10). Tus Tswv yog tus Dawbhuv, Nws yeej tsis zam kev txhaum kiag li, Nws yuav rau txim rau cov neeg uas ntxub Nws thiab rau lawv tej xeebntxwv mus txog peb thiab plaub tiam neeg. Txawm li ntawd, los tseem muaj kev cia siab vim tus Tswv yog kev hlub, tsis chim sai thiab puv npo kev khuvleej. Tus Tswv yuav qhia Nws txoj kev hlub rau cov uas muab siab npuab Nws thiab coj raws li Nws tej kevcai ib tiam dhau ib tiam mus txog ntau txhiab tiam neeg (Khiavdim 20:4-6).
Thaum sawv tabmeeg tus Tswv, Mauxes lees tus Tswv haivneeg tej kev txhaum thiab thov tus Tswv zam txim rau lawv. Nws thov txhua yam tawm hauv nruab siab tuaj hais tias: “Thov koj zam lawv tej kev txhaum; tiamsis yog koj zam tsis tau, thov koj rho kuv lub npe tawm hauv phau ntawv uas koj sau koj haivneeg tej npe lawm” (nqe 32). Mauxes qhia tshwm nws txojkev hlub tus Tswv haivneeg heev dua nws txojsia! Txawm tus Tswv txaus siab rau Mauxes thiab coglus yuav pub nws cov xeebntxwv tau ua ib haivneeg tseemceeb (nqe 10), los nws yeej ris tsis tau tus Tswv haivneeg lub txim. Vajtswv hais meej hais tias: “Cov twg ua txhaum rau kuv, cov ntawd thiaj yog cov uas yuav raug rho npe tawm hauv kuv phau ntawv mus xwb” (nqe 33). Ntawd yog phau ntawv sau cov neeg muaj txojsia ntev dhawv mus ibtxhis tej npe uas hais hauv Vajluskub Qub thiab Vajluskub Tshiab (Phau Ntawv Nkauj 69:28; Daniyees 12:1; Lukas 10:20; Filipis 4:3). Tus Tswv tsis txiav txim rau Nws haivneeg tamsim ntawd tiamsis thaum txog sijhawm Nws mam txiav txim rau lawv tej kev txhaum (nqe 34). Tus Tswv hais kom Mauxes coj cov Yixalayees mus rau qhov chaw uas Nws xaiv thiab txib ib tug timtswv ua ntej coj lawv kev.
Niaj hnub nimno, leejtwg thiaj yog tus uas tsis muaj kev txhaum thiab muaj npe hauv Vajtswv phau ntawv? Loos 3:23 qhia hais tias:“rau qhov txhua tus puavleej ua txhaum thiab tu ncua Vajtswv lub tshwjchim lawm”. Txawm li ntawd, los Vajtswv Txojlus kuj hais tseg hais tias: “Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis” (Yauhas 3:16). Mauxes tsis muaj cuabkav tuag txhiv tus Tswv haivneeg, tsuas yog Tswv Yexus tibleeg xwb thiaj muaj cuabkav tuag txhiv noobneej ntiajteb. Tswv Yexus thiaj yog txojkev coj tau txhua tiam neeg los cuag Vajtswv thiab tau sau npe hauv Vajtswv phau ntawv.
Thov Vajtswv
Vajtswv, nyuam yaus ua Koj tsaug, vim Koj suav nyuam yaus yog neeg ncaj ncees tabmeeg Koj, nyuam yaus thiaj muaj npe hauv Koj phau ntawv thiab yuav tau nyob hauv Koj lub tebchaws mus ibtxhis. Amees.
Koj lub npe puas tau muaj nyob hauv Vajtswv phau ntawv lawm tau?
Nyeem Vajluskub hauv peb lub xyoos: Yaxayas 53
Kênh Youtube BHKTHN:
