Chivkeeb 4:6-7

Nqe cim: 

“Yog tej kev sim siab ntawd ua rau nws yuam kev ua txhaum, nws tsis txhob hais tias, yog Vajtswv sim kuv. Rau qhov tej kev phem ntxias tsis tau Vajtswv, thiab Vajtswv yeej tsis sim leejtwg li. Tiamsis tus uas ua txhaum, yeej yog nws lub siab uas nyiam ua phem coj nws mus ua txhaum. Thaum nws lub siab xeeb txojkev xav phem lawm, ces nws yuav mus ua txhaum, thiab thaum nws ua txhaum lawm, nws yuav raug kev ploj kev tuag” (Yakaunpaus 1:13-15).

Lus nug rau sawvdaws xav: 

• Vajtswv ceebtoom Ka-ees yam dabtsi? 
• Peb kawm tau yam dabtsi hauv zaj no? 

Ib tsoom cov mloog txhua tus,

Tsev neeg tsis muaj tus zeem paub Ka-ees lub siab thiab txojkev xav uas tabtom chim heev, tiamsis tsis muaj ib yam dabtsi yuav zais tau tus Tswv li, Nws thiaj hais rau Ka-ees hais tias: “Vim licas koj yuav chim ua luaj li? Vim licas koj ua ntsejmuag npautaws vog li ko? (nqe 6). Lo lus nug no tsis yog nug kom Ka-ees teb rau tus Tswv tiamsis yog lus nug thiab teb rau Ka-ees tus kheej. Tus Tswv xav hais rau Ka-ees hais tias: “Koj yog tus neeg teev hawm Kuv thiab Kuv yog tus uas koj teev hawm, Kuv yog tus uas muaj hwjchim ntaus nqi rau koj txojkev teev hawm thiab yog tus txiav txim siab txais yuav tibneeg txojkev teev hawm. Koj yog leejtwg, ua cas koj kav los sawv ntawm Kuv xubntiag hais li ko? (Yauj 41:2; 42:3). Tej zaug yog lub siab khavtheeb ua rau Ka-ees tsis nco hais tias, nws tus kheej yog thawj tug neeg uas yug los ntawm cajces ua txhaum, thiab ua tsis tau ib yam dabtsi kom ncaj ncees tabmeeg tus Tswv. Peb yuav tsum nco ntsoov hais tias, Vajtswv yog tus muaj hwjchim ua raws li Nws lub siab nyiam thiab tsis muaj leejtwg muaj cuabkav yuam kom Nws ua raws lawv lub siab nyiam.

Lub siab khavtheeb kuj ua rau Ka-ees dhau los ua neeg ruam, tsis zeem paub qhov uas Vajtswv tsis txais yuav nws tej khoom fij, nws xav hais tias yog tus Tswv tso nws tseg lawm. Yog tso nws tseg no ua licas tus Tswv ho tseem los nrog nws tham thiab ceebtoom nws? Txojkev khavtheeb twb ua rau Ka-ees digmuag, tsis paub tej uas nws ua yog yuam kev lawm (nqe 7a). Tus neeg khavtheeb saib lawv tus kheej tseemceeb dua, nws thiaj tsis ua raws li tus Tswv qhia, nws tsuas ua tej uas nws pom hais tias zoo rau nws xwb. Lawv yog neeg ruam vim pheej hais daws lawv zaj. 

Tsis yog li ntawd xwb, Vajtswv tseem ceebtoom hais tias, dab Ntxwgnyoog niaj hnub ncig mus ncig los zov rawv thiab yuav tom Ka-ees (nqe 7b). Ka-ees tsis faj txog hais tias xav yuam kev xwb twb ua rau nws lub neej tsaus ntuj nti. Tej zaug tsis muaj leejtwg xav txog qhov kev txhaum tua thawj tus neeg yog los ntawm kev fij khoom rau Vajtswv! Muaj tej zaug dab Ntxwgnyoog ntxias peb thaum lub sijhawm peb tabtom pehawm thiab ua tus Tswv haujlwm! 

Vajtswv qhia rau Ka-ees paub, txawm yog yuav raug Ntxwgnyoog ntxias los xij “yuav tsum ua kom yeej nws” (nqe 7b). Muab ua lwm seem hais tias, Ka-ees ua txhaum vim nws tsis ua kom yeej nws lub siab, txhob liam hais tias tus Tswv tsis txais nws tej khoom fij, kuj tsis txhob liam rau Anpees, thiab kuj tsis txhob muab liam rau dab Ntxwgnyoog! Txhua tus nyias yuav tsum ris nyias tej kev txhaum uas yus tau ua (Yakaunpaus 1:13-15), yog tsis lees peb tej kev txhaum ces yuav tsis tau txais kev zam txim li. 

Thov Vajtswv,

Vajtswv, thov Koj pab kom nyuam yaus zeem paub Koj tej lus ceebtoom,  txhua zaus uas nyuam yaus ua txhaum thov Koj zam txim rau tej uas nyuam yaus tau ua yuam kev thiab thov Koj pub kom nyuam yaus ua neeg txo lub hwjchim lees txim thiab pub kom nyuam yaus muaj txojkev sib raug zoo nrog Koj. Amees. 

Ib tsoom cov mloog uas hmov thiab tshua,

Peb puas zeem paub tej lus uas tus Tswv ceebtoom thiab sai sai tig los lees txim? 

Nyeem Vajluskub hauv peb lub xyoo: Exalas 10:1-17

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn