Mathiơ 19:13-15
“Na Yêsu khan: Lê̆ lu hơ’lơ̆p năm tơ Inh,’nĕ pă khă lu sư,yua kơ bơngai bu lui thoi lu hơ’lơ̆p âu lui,bơngai noh ‘Bok kei-Dei pơgơ̆r wei lăng sư ling-lang.”(Mathiơ 19:14)
Nơ̆r jet tơchĕng pơwao:
– Kơplah đe ba lu kon hơ’lơ̆p tơ Kră Yang Yêsu, lu bơngai pơhrăm kiơ̆ Sư, jơhngơ̆m lu sư tơwih kơ lu đe ei thoi yơ? Yua kơ kiơ lu sư tơwih kơ lu đe ei thoi noh?
– Bơ̆n pơhrăm iŏk tơdrong kiơ đơ̆ng jơhngơ̆m Kră Yang Yêsu mă Sư hlôi pơm ăn kơ lu hơ’lơ̆p noh?
Lu bơngai Juđê juăt kơ ba lu kon hơ’lơ̆p lu sư tơ lu Thây bơtho tơdrong juăt wă kơ lu sư krao khan sơkat pŭn hiôk ăn kơ kon hơ’lơ̆p lu sư ‘bơ̆t năr blŭng a lu sư ‘blŏk hơdơ̆r kơ năr rơneh kơ kon lu sư noh. Lăm trong 13, lu bơngai mĕ’bă ‘nâu, lu sư băt pơyom kơ Kră Yang Yêsu,na lu sư wă dêh kơ Kră Yang pel kơ̆l krao khan ăn kon hơ’lơ̆p lu sư, ‘nâu bơih tơdrong juăt ‘lơ̆ng dêh. Lu bơngai pơhrăm kiơ̆ Kră Yang ei tă tơ hli kơ lu đe ei pơjuăl Kră Yang pơm kơ Kră Yang ưh kơ đei jơ pơdơh ngôi, lei na khă lu sư. Nơ̆r “hơ’lơ̆p” ‘nâu, nơ̆r đơ̆ng tơm sơ̆ wă khan đơ̆ng oei nge truh tơ lu ‘lơ̆p mă ‘nao gơh nơnăm đơng-đơ̆ đơng-đơ̆ noh; lu bơngai pơhrăm kiơ̆ Kră Yang ei tơchĕng khan lu hơ’lơ̆p iĕ ‘nâu tơ’bơ̆p Kră Yang Yêsu kư̆m ưh kơ đei tơgŭm pơyua kiơ ăn kơ lu sư, pih-pang Kră Yang hiong ngôi jơ năr yua kơ lu sư .
Kơplah lu bơngai pơhrăm kiơ̆ Kră Yang ei tŏk-bŏk oei khă kuă ăn lu mĕ ‘bă ba lu hơ’lơ̆p tơ Kră Yang Yêsu, na Kră Yang Yêsu khan: “Lê̆ lu hơ’lơ̆p năm tơ Inh, ‘nĕ kơ pơgăn lu sư, yua kơ bơngai bu lui thoi lu hơ’lơ̆p âu lui,bơngai noh ‘Bok kei-Dei pơgơ̆r wei lăng sư ling-lang.” (tr.14). Kră Yang wă bơtho lu bơngai pơhrăm kiơ̆ Sư mĭnh ‘bai pơhrăm gah tơdrong gĭt lu hơ’lơ̆p ‘nâu ‘bơ̆t Sư pơting tơdrong arih lu hơ’lơ̆p hăm lu bơngai mă ‘Bok Kei-Dei pơgơ̆r noh.Đei lu tơdrong’lơ̆ng mă bơ̆n lăng’bôh lăm lu hơ’lơ̆p, noh lu sư arih hmă hlăng hơdah đĕch,chu nơ̆r wơh athei, gô mơ̆ng kơ bơngai chông sư, lui yom păng lui ngeh. Lu tơdrong đei lăm lu hơ’lơ̆p ‘nâu hei kư̆m kăl kơ đei lăm lu bơngai bu mă lui bơih kơ Kră Yang, wă kơ trŏ lăp hăm Dêh char ‘lơ̆ng rŏ mă’Bok Kei-Dei pơgơ̆r noh. Kră Yang Yêsu iŏk pôk lu hơ’lơ̆p ei, tuh ăn kơ lu sư pŭn hiôk. (Markôs 10:16)
Tơdrong hơ’mon ‘nâu tơ’bôh jơhngơ̆m Kră Yang’mêm tih,‘blŏk tơchĕng kơ đĭ-đăng bơngai mă khan lu bơngai ‘lơ̆p nge hĭ Sư lăng lei-lăi đĕch ‘bơ̆t anăp Sư. Jơhngơ̆m Kră Yang ‘mêm noh tơ’blŏk kơ bơ̆n tơdrong ‘nâu: mă lu kon hơ’lơ̆p lăm hnam dơnŏ bơ̆n,mă lu hơ’lơ̆p lăm Khul Bơngai lui bơ̆n, kăl dêh kơ lu mĕ ‘bă,lu bơngai mă chông anhăk noh ‘mêm,tơchĕng ‘blŏk kơ lu hơ’lơ̆p, bơtho nơ̆r’Bok Kei-Dei, bơtho lu sư ‘mêm kơ Kră Yang, gơh krao khan pơma dơnuh hăm Kră Yang,.v.v…Tơdrong bơ̆n bơtho kon hơ’lơ̆p ‘nâu khŏm ‘măn jơ năr mă lơ,khŏm gleh hrat, khŏm iŏk đon chơ̆n ĕnh,dim iơ̆m, iŏk jơhngơ̆m mă tai ‘mơ̆i hŏ, na bơ̆n gô ‘bôh lĕch yua đơ̆ng tơdrong bơ̆n jang, đơ̆ng um-ai bơ̆n noh đei tơdrong pơdrŭt tơiung pơlung tih ‘nâu: “Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Wă truh tơ kră lu sư huay kơ weh đơ̆ng trong noh. (Pơđơ̆k 22:6), na Khul Bơngai lui gô đei lơ bơngai wơ̆ ’lŏ lăm tơdrong lui wă bơ̆jang awih awăn kơ Kră Yang thoi Timôthê sơ̆ mơ̆n, “…đơ̆ng ih oei iĕ sơ̆ ih pơhrăm Sơ̆p hla bơar tơdrong ’Bok Kei-Dei.Sơ̆p hla bơar Sư bơih ăn kơ bơ̆n băt tơdrong Sư pơklaih bơ̆n đơ̆ng tơdrong yoch yua kơ bơ̆n lui kơ Kră Yang Yêsu Krist”. (II Timôthê 3:15). Mưh bơ̆n băt tơchĕng ‘blŏk kơ lu kon hơ’lơ̆p păng bơtho lu sư Nơ̆r Sĭt Kră Yang, lei bơ̆n kư̆m đei jơ trŏ lăp tơchĕng lăng tơdrong arih đon lui bơ̆n kơdih hăm hmă ưh, hăm ‘lơ̆ng rơgoh hlăng hơdah ưh? Hăm hơtai oei chu pơm kiơ̆ nơ̆r Kră Yang đĭ jơhngơ̆m ưh? Hăm hơtai oei mơ̆ng kơ Kră Yang pơgơ̆r ưh? Hăm hơtai oei kơkuh yom kơ Kră Yang tơpă păng hăm hơtai oei pơjao tôm tơdrong lăm tơpang ti Sư ưh?
Bơ̆n hăm hơtai oei tơchĕng ‘blŏk kơ tơdrong bơtho nơ̆r Kră Yang kơ kon hơ’lơ̆p bơ̆n kơdih păng lu hơ’lơ̆p lăm Khul Bơngai lui ưh?
Kơkuh kơ Ih Kră Yang, apinh Ih tơgŭm inh huay kơ pơhơi, huay kơ lăng hơi tơdrong ba lu kon hơ’lơ̆p năm tơ Ih, apĭnh Ih tơgŭm inh ling-lang tơchĕng lăng inh kơdih wă kơ jơhngơ̆m inh lui kơ Ih hmă đĕch, ‘lơ̆ng rơgoh, hlăng hơdah, gơneh gơnang kơ Ih tôm tơdrong thoi lu hơ’lơ̆p. Inh krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 16.
Kênh Youtube BHKTHN:
