Klei Aê Diê Blŭ: Klei Mphŭn Dơ̆ng 1:9-13
Êlan kliăng: “Leh anăn Aê Diê lač, “Brei lăn bi čăt ana kyâo mtâo, rơ̆k mâo mjeh, leh anăn ana kyâo mboh mâo mjeh tui si mta diñu ti rŏng lăn.” Snăn klei anăn jing mtam” (Klei Mphŭn Dơ̆ng 1:11)
Klei êmuh ksiêm mĭn: Ya mnơ̆ng Aê Diê hrih hlăm hruê tal tlâo leh anăn klei anei ya klei mdê mâo hŏng dua hruê tal êlâo? Klei lăn bi čăt ana kyâo mtâo, rơ̆k atơ̆k bi êdah ya klei kơ Aê Diê leh anăn kơ hdră Ñu? Si klei bi mđĭ ai drei mâo?
Hlăm hruê hrih mjing tal tlâo, Aê Diê brei êa ti gŭ adiê bi kƀĭn hlăm sa bĭt anôk, mơ̆ng anăn mâo lăn thu leh anăn êa ksĭ. Êlâo kơ hruê tal tlâo, lăn ala anei knŏng jing anôk lir ƀir hŏng êa leh anăn bi lŭk lăk, ƀiădah hŏng klei blŭ leh anăn bruă ngă Aê Diê, mjing lăn thu leh anăn êa ksĭ djŏ pruê̆ êlan čiăng dưi rông klei hdĭp ti lăn ala.
Tơdah hlăm hruê hrih mjing tal sa leh anăn tal dua, grăp hruê Aê Diê knŏng blŭ sa boh čiăng mjing sa mta mnơ̆ng, snăn truh hruê tal tlâo anei, Aê Diê blŭ lu hĭn, mjing lu mnơ̆ng hĭn. Êlâo hĭn, Ñu mjing êa ksĭ leh anăn lăn thu. Êdei tinăn, ti dlông lăn, Aê Diê hrih ana kyâo mtâo leh anăn rơ̆k atơ̆k. Ñu mtă brei ana kyâo leh anăn rơ̆k čăt, mboh leh anăn mâo mjeh tui si mta diñu. Aê Diê ƀuh klei jăk hlăm bruă Ñu đĭ lu hĭn mơh mkă hŏng dua hruê tal êlâo hlăm bruă hrih mjing.
Tơdah lăn jing leh, hŏng klei Aê Diê mjing, lăn čăt ana kyâo mtâo leh anăn rơ̆k. Leh anăn êdei tinăn, ana kyâo mtâo leh anăn rơ̆k pô ăt lŏ čăt lar mơh, rơ̆k mâo asăr, kyâo mâo boh. Mmông anei, jih jang mnơ̆ng Aê Diê hrih mjing leh hlăm lăn adiê amâo djŏ knŏng mơ̆ng klei Aê Diê pô mjing ôh ƀiădah mnơ̆ng hrih mjing pô ăt đru mbĭt mơh hlăm klei hrih mjing anăn, čiăng mjing lu mnơ̆ng jăk siam. Mnơ̆ng Aê Diê hrih mjing dưi đru mbĭt hlăm bruă Aê Diê hrih mjing. Anăn yơh jing hdră Aê Diê.
Dlăng wĭt kơ klei hrih mjing, tal êlâo msĕ si Aê Diê amâo mă bruă lu ôh, ƀrư̆ ƀrư̆, drei ƀuh Aê Diê mă bruă lu hĭn: Ñu blŭ lu hĭn, ngă lu hĭn, leh anăn Ñu mơak lu hĭn. Jăk êdimi tơdah thâo Aê Diê brei mnơ̆ng Ñu hrih leh dưi lŏ mjing mnơ̆ng hrih mjing mkăn leh anăn dưi đru mbĭt hlăm bruă Ñu hrih mjing msĕ si ana kyâo mâo asăr mjeh leh anăn čăt jing ana kyâo êđai. Msĕ snăn mơh Aê Diê mă bruă hlăm klei hdĭp lu mnuih. Tăp năng drei ƀuh msĕ si Aê Diê amâo mă bruă ôh, ƀiădah tơdah ksiêm bi nik, drei ƀuh Aê Diê mă bruă ƀrư̆ hruê ƀrư̆ lu hĭn. Ñu mă bruă amâo tuôm mdei ôh. Khua Yang Yêsu pô hưn leh snei: “Ama Kâo ăt mă bruă nanao, leh anăn Kâo mă bruă msĕ mơh” (Y-Yôhan 5:17). Bi mni kơ Aê Diê kyuadah Ñu ăt brei, brei klei dưi leh anăn iêô jak drei đru mbĭt hlăm hdră Ñu. Akâo Khua Yang đru drei mâo ai tiê khăp čiăng đru hlăm hdră Ñu nanao.
Drei ƀuăn hŏng Khua Yang srăng đru mbĭt ya bruă hlăm hdră Ñu?
Wah lač: Mpŭ mni kơ Ih Aê Diê jing Pô hrih mjing prŏng êdimi. Lač jăk kơ Ih kyuadah Ih brei kâo dưi đru mbĭt hlăm hdră yuôm bhăn Ih. Đru kâo thâo knang kơ Ih nanao, kăp mă mmông găl, leh anăn mă bruă kơ Ih hŏng jih ai tiê čiăng bi êdah klei jăk Ih kơ lăn ala anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yakơ 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
