Klei Aê Diê Blŭ: Bi Hriêng 24:19-20
Êlan kliăng: “Đăm rŭng răng ôh kyua phung ngă klei jhat, đăm tluh kơ phung ƀai ôh, kyuadah mnuih ƀai amâo srăng dôk sui ôh, pui kđen phung ƀai srăng djiê.” (Klei Bi Hriêng 24:19-20)
Klei êmuh ksiêm mĭn: Ya ngă amâo ăl ngêñ kyua phung ngă ƀai ôh? Si boh jhat kơ phung jhat ƀai srăng tŭ? Si brei drei krơ̆ng klei drei ăl ngêñ drei pô?
Hlăm Klei Bi Hriêng 23:17, mtao Y- Salômôn mtô anak: “Đăm brei ai tiê ih tluh kơ phung soh ôh,”, leh anăn tinei ñu lŏ kñăm mơh, “Đăm rŭng răng ôh kyua phung ngă klei jhat”. Mrâo hmư̆, hlei pô khăp kơ klei kpă ênô amâo mơak ôh hŏng klei mtô anei, kyua mnuih mtô msĕ si dlăng kơ klei ngă jhat ƀai jing klei găl, amâodah tŭ ư mbĭt hŏng bruă ngă klei soh. Leh anăn klei ngă msĕ snăn bi mklăk hŏng klei kpă ênô Aê Diê! Ƀiădah ya ngă mtao Y- Salômôn mtô wĭt mtô nao lu blư̆ amâo dưi ăl ngêñ ôh? Kyuadah klei ăl ngêñ kbiă hriê mơ̆ng ai tiê amâo jăk ôh, bi êdah klei amâo dưi wăt jing klei hơăi mang amâo yuôm ôh, wăt lŏ ngă bi jhat kơ drei pô hĭn êjai. Pruê̆ boh blŭ “đăm rŭng răng ôh” hlăm klei blŭ phŭn klei Hêbrơ ăt mblang jing đăm čuh, đăm mčhur ai, đăm nač amâodah luč klei tŭ gĭr. Blŭ mdê, đăm brei klei djhưng ai ăl ngêñ ngă bi êka ai tiê ôh, ngă bi mđĭ klei krêñ ngêñ, ngă bi ktang hĭn ai tiê nač iăng, dưi atăt truh kơ klei wĭt ngă amâo jăk jing ruah ngă klei jhat ƀai čiăng bi hrăp ai tiê klei mĭn hjăn pô dê.
Lŏ tui čuê, mtao Y-Salômôn mblang đăm rŭng răng ôh kyua phung ngă klei jhat, kyuadah diñu pô yơh srăng tŭ boh jhat kjham kyua bruă diñu ngă. pruê̆ boh blŭ “phung ƀai srăng djiê” čiăng lač “amâo mâo klei hdĭp êdei anăp” (êlan 20). Phung ƀai amâo knŏng tŭ klei bi kmhal, tŭ klei bi rai ti lăn ala, ƀiădah wăt tŭ klei bi kmhal hlăm ênuk hlŏng lar mơh. Tơdah thâo leh kơ phung ƀai amâo mâo hruê êdei anăp, pui kđen phung ƀai srăng djiê, mngăt diñu srăng kram hlăm klei mmăt, klei đĭ kyar diñu knŏng bhiâo rit, snăn ya yuôm drei rŭng răng, bi liê ai drei! Ƀiădah mta klei yuôm hĭn, tơdah drei wĭt ngă klei amâo jăk hŏng diñu msĕ snăn ăt mblang jing drei amâo klei đăo kơ klei kpă ênô Aê Diê.
Hlăm hră mơĭt čih kơ Phung Sang Aê Diê Êphêsô, khua ƀĭng kna Y-Pôl mtô: “Tơdah diih ăl, đăm ngă soh ôh. Đăm đuôm ai ăl tơl yang hruê lĕ ôh.” (Êphêsô 4:26). Akâo kơ Khua Yang brei drei thâo krơ̆ng klei ăl ngêñ drei kyuadah klei wĭt ngă hŏng klei ăl ngêñ srăng atăt kơ klei wê, kơ klei ngă soh. Drei ăt kăn brei klei ăl đĭ hŏng klei hgăm rei, ƀiădah brei drei wah lač čiăng kơ Khua Yang bi hlai bi êdu klei ăl ngêñ, leh anăn dôk hdĭp tui si Klei Aê Diê Blŭ mtô: “Knang bĕ kơ Yêhôwa leh anăn ngă klei jăk;” (Klei Mmuñ Hđăp 37:3). Leh anăn ăt kăn nač kăn tluh rei tơdah ƀuh phung jhat ƀai mdrŏng sah, mâo anôk bruă prŏng ti lăn ala, klei anăn srăng ram rai pral msĕ si rơ̆k mnga hlăm hma, ƀiădah brei drei hung kơ klei ngă jăk, kơ klei hdĭp dôk nanao hlŏng lar. Đăo bĕ kơ klei kpă ênô Khua Yang leh anăn jao jih djăp mta klei kơ Khua Yang, Ñu srăng đru dŏng drei leh anăn hơêč hmưi kơ drei.
Si drei khăng wĭt ngă hŏng phung jhat ƀai?
Wah lač: Ơ Khua Yang, bi mni kơ Khua Yang đru leh kâo thâo hdĭp mơak hlăm djăp mta klei truh. Akâo kơ Ama brei kâo dôk hdĭp kpă ênô, thâo khăp, amâo djăl ăl, leh anăn đru kâo đăo knang nanao kơ klei Khua Yang kiă kriê klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
