Kôlôssê 4:2-4
Kơkuh kơ đĭ đăng bơngai mơ̆ng,
Thoi noh lu bơ̆n yak năm lăm khei 7 sơnăm 2025. Kơ̆l ‘bai tơm sư lăm khei ‘nâu ‘noh Krao Khan Kơplah Pơlong & Pơhlŭ Pơlung, năr ‘nâu lu bơ̆n gô tơchĕng pơwao ‘bai pơhrăm blŭng a đei kơ̆l ‘bai: Krao Khan Wă Kơ Kĕ Hlôi Đơ̆ng Pơlong kiơ̆ kơ Nơ̆r ‘Bok Kei-Dei lăm Kôlôssê 4:2-4.
Tơdrong pơlong truh lu bơ̆n khŏm pơtăm kŭl tăng, mălei lăm tơdrong arih lu bơ̆n ngăl hăt hot lu bơ̆n achăng krao khan. Nơ̆r Kră Yang tơ băt: “Inh wă kơ iĕm kral ngôi hơpong kơ Inh, păng wă kơ iĕm krao khan kơdih wă kơ iĕm huay kơ lui kơ yang satan pơhlŭ. Inh băt kơ jơhngơ̆m đon iĕm wă ră, mălei akâu iĕm ưh kơ kĕ.” (Mathiơ 26:41). Kơplah đĭ jơhngơ̆m krao khan, Kră Yang gô ăn đei jơhngơ̆m pran, pơm kơ jơhngơ̆m pran wă kơ weh ataih đơ̆ng pơhlŭ pơlung, kĕ hlôi păng pơlong.
Apinh Kră Yang ăn kơ lu bơ̆n lui kơjăp lăm Kră Yang, đĭ jơhngơ̆m krao khan păng arih kiơ̆ thoi Kră Yang wă lăp đon rim năr. Yang Bơhngol ‘lơ̆ng gô ăn kơ jơhngơ̆m lu bơ̆n wă kơ kĕ hlôi đơ̆ng tơdrong pơlong, pơhlŭ pơlung lăm chăl arih. Athei lui mă kơjăp păng đĭ jơhngơ̆m krao khan!
2 Iĕm athei adrin gah tơdrong krao khan. Kơplah iĕm oei krao khan, iĕm athei tơchĕng kơ tơdrong krao khan đĕch, ‘nĕ kơ tơchĕng tơdrong nai. Păng ling lang athei bơnê kơ ‘Bok Kei-Dei. 3 Apinh iĕm krao khan kơ ‘Bok Kei-Dei tơgŭm nhôn ‘biơ̆ hŏ wă kơ Sư ăn kơ nhôn gơh bơtho nơ̆r Sư kơ lơ bơngai, tơdrong Kon Sư Yêsu Krist mă tam mă tơbăt kơ đe đơ̆ng sơ̆. Yua kơ inh bơtho tơdrong ‘noh na đe oei phak inh dang ei. 4 Thoi noh na inh apinh iĕm krao khan kơ ‘Bok Kei-Dei tơgŭm inh hơgei kơ bơtho tơdrong Sư wă kơ đe hlôh nhên. Sư wă kơ inh bơtho thoi noh.
Trong tơm ‘bai pơhrăm ‘nâu:
“Apinh iĕm krao khan kơ ‘Bok Kei-Dei tơgŭm nhôn ‘biơ̆ hŏ wă kơ Sư ăn kơ nhôn gơh bơtho nơ̆r Sư kơ lơ bơngai, tơdrong Kon Sư Yêsu Krist mă tam mă tơbăt kơ đe đơ̆ng sơ̆. Yua kơ inh bơtho tơdrong ‘noh na đe oei phak inh dang ei. Thoi noh na inh apinh iĕm krao khan kơ ‘Bok Kei-Dei tơgŭm inh hơgei kơ bơtho tơdrong Sư wă kơ đe hlôh nhên. Sư wă kơ inh bơtho thoi noh.” (Kôlôssê 4:3-4)
Nơ̆r jet tơchĕng pơwao:
– ‘Bok Pôl tơ’blŏk pêng tơdrong kiơ kăl kơ đei lăm tơdrong krao khan?
– Hơlam hơnat hơnot pơlung truh, Sư apinh Khul Bơngai Lui krao khan tơdrong kiơ?
– Lu bơ̆n yua iŏk đei jơhngơ̆m krao khan, krao khan tang dih băl thoi yơ?
Kơkuh kơ đĭ đăng,
‘Bok Pôl chih kơthơ kơ Khul Bơngai Lui tơ Kôlôssê kơplah đe phak sư yua kơ bơtho Tơdrong ‘Nao ‘Lơ̆ng ‘Bok Krist. Kơplah đei kơtơ̆ng minh tơdrong ‘lơ̆ng gah Khul Bơngai Lui. Sư đei krao khan kơ lu sư. Sư pơdrŭt lu sư, bơtho păng tơbăt kơ kon pơlei Kră Yang tơ Kôlôssê gah tơdrong pơlong lơ tơdrong mă lu sư gô tơ’bơ̆p đơ̆ng lu bơngai bơtho hơlĕnh păng lu bơngai Juđê oei ‘maih arih pơm kiơ̆ Khôi juăt. Lăm chăl tuch luch kơthơ, ‘bok Pôl pơma tơ’bôh dôm tơdrong juăt arih trŏ kơ Khul Bơngai Lui wă chông anhăk lu sư păng măloi sư tơ’blŏk kơ lu sư athei “Lui mă kơjăp, kơchăng păng băt bơnê lăm tơdrong krao khan,” krao khan hăm đĭ jơhngơ̆m, ling lang, kơchăng, adrin păng ling lang pơyơ̆r nơ̆r bơnê kơ Kră Yang gô tơgŭm kon pơlei Kră Yang kĕ hlôi đơ̆ng tơdrong pơlong oei răp gô rim năr. Dôm tơdrong pơm kơ akâu jăn gleh lap, lăm jơhngơ̆m đon ưh kơ tơplih, rơdu tơrăn gah bơhngol jơ̆ tơdrong pơgăn lăm tơdrong bơ̆n krao khan. Lăm tơdrong pơlong, lu bơ̆n ngăl pơm glăi băt pôm krao khan apinh mălei ưh kơ băt krao khan bơnê kơ Kră Yang. Lăm kơplah noh, ‘bok Yakơ bơtho tơdrong pơlong jơ̆ minh tơdrong pŭn hiôk Kră Yang tơgŭm wơ̆ ‘lŏ lăm tơdrong lui: “Bơngai bu đei tơdrong đe pơlong lăng sư, tơdrong gleh truh kơ sư mă sư oei lui kơ ‘Bok Kei-Dei kơjăp, bơngai noh hiôk rai loi; ‘Bok Kei-Dei gô ăn kơ sư arih hiôk-hian ling lang tơpă. Tơdrong ‘noh Sư pơkă kơ rim ‘nu bơngai, bơngai bu mă ‘mêm kơ Sư.” (Yakơ 1:12).
Ưh kơ sĭ kơdrô̆ Khul Bơngai Lui Kôlôssê đĕch ôh tơ’bơ̆p tơdrong pơlong mă kơdih ‘bok Pôl kư̆m tơ’bơ̆p tơdrong pơlong. Sư chih kơthơ âu noh kơplah sư oei lăm hnam bơnă yua kơ Anăn Kră Yang. Oei lăm hnam phak, ưh kơ sĭ pơma chrih, jŏk tơtok kơ Kră Yang mălei sư đĭ jơhngơ̆m ră roi Tơdrong ‘Nao ‘Lơ̆ng. Tơdrong mă sư kăl noh apinh Khul Bơngai Lui Kôlôssê tơgŭm noh krao khan kơ sư wă kơ sư đei jơ ‘năr pơlăp wă bơtho Tơdrong ‘Nao ‘Lơ̆ng Kră Yang Yêsu Krist “wă kơ bơtho tơdrong Sư, wă kơ đe hlôh nhen, Sư wă kơ inh bơtho thoi noh.” (trong 4 BDM). Kơplah oei lăm tơdrong đe oei phak, tơdrong mă ‘bok Pôl kăl noh ưh kơ sĭ apinh ‘nhŏng oh krao khan tơgŭm sư gơh klaih đơ̆ng tơdrong pơlong truh, mălei sư apinh lu sư krao khan wă kơplah đei tơdrong pơmat tat noh, wă kơ Kră Yang pơih trong mă să wă kơ sư bơtho Tơdrong ‘Nao ‘Lơ̆ng tôm mah, hơdah hơdong.
Lu bơ̆n ưh kơ gơh weh wer đơ̆ng lơ tơdrong pơlong gô truh (Yakơ 1:2), rok kiơ̆ kơmĭl ‘bok Pôl, lu bơ̆n kăl kơ kơjăp, kơchăng krao khan păng krao khan tang mă khan tơdrong truh thoi yơ hĭ, rim ‘nu bơngai athei chơ̆n, lui mă kơjăp lăm Kră Yang păng đĭ jơhngơ̆m ră roi Tơdrong ‘Nao ‘Lơ̆ng.
Lu bơ̆n wăng pôm đon lăm tơdrong krao khan,
Ơ ‘Bă mă ‘mêm kơeng! Inh bơnê kơ Ih ăn kơ inh đei Khul Bơngai Lui wă kơwang krao khan hơdai, krao khan tang dih băl, kơplah đei tơdrong pơlong gleh glăn hơnat truh lăm chăl arih, apinh Ih tơgŭm inh đĭ jơhngơ̆m ră roi Tơdrong ‘Nao ‘Lơ̆ng kơ lơ bơngai. Yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n hăm chơ̆n kơjăp krao khan kơplah đei tơdrong pơlong gleh anat anot truh?
Tơ’bơ̆p lơ tơdrong pơlong truh
Chơ̆n kơjăp, kơchăng, ưh kơ hli kiơ
Lui kơjăp lăm Kră Yang mơsêh mơyang
Ră roi Tơdrong ‘Nao ‘Lơ̆ng, năm pơklaih lơ bơngai.
Đŏk Sơ̆p Hla bơar ‘Bok Kei-Dei lăm pêng sơnăm: Êsai 61
Kênh Youtube BHKTHN:
