Mathiơ 6:5a
“Iĕm ‘nĕ krao khan thoi lu bơngai pơang akâu, lu sư wă kơ đe ư-ang kơ sư na lu sư pơm iung dơ̆ng krao khan kơ ‘Bok Kei-Dei ‘bơ̆t anăp bôl tơ lăm hnam akŭm, phŏ tơ kơphô̆, phŏ tơ kơchơ, wă kơ đe ‘bôh na ư-ang kơ sư khan sư bơngai ‘lơ̆ng…” (Mathiơ 6:5a)
Nơ̆r jet tơchĕng pơwao:
– Tơdrong phara ‘biơ̆ lăm nơ̆r krao khan ưh kơ tơpă noh kiơ?
– Dang ei, lu bơ̆n kư̆m đei krao khan ưh kơ tơpă kơplah hơyơ?
Kră Yang Yêsu đei pơma ‘bơm tơdrong krao khan “lu ‘bơ̆r đak klak ŭnh”. Lăm nơ̆r Grĕk, tơblang nơ̆r “ưh kơ tơpă” ‘noh lu bơngai tơ’bôh wă kơ đe lăng. Yua kơ thoi noh, “lu ‘bơ̆r đak klak ŭnh” ‘noh lu bơngai pơm tơ’bôh wă kơ đe ‘bôh lu sư pơm bơngai bu noh. Dôm tơdrong kiơ “lu bơ̆r đak klak ŭnh” lu sư pơma dah pơm ‘noh ưh kơsĭ lu sư lui ngeh dah tơchĕng mă ‘noh lu sư pơm tơ’bôh wă kơ đe nai ‘bôh na lui kơ tơdrong lu sư đei pơm noh. Kư̆m thoi noh mơ̆n “lu bơ̆r đak klak ŭnh” mă Kră Yang Yêsu pơma ‘nâu wă kơ đe nai lui khan lu sư oei krao khan mălei mă tơpă sư ưh ôh. Lu bơngai ‘bơ̆r đak klak ŭnh ưh kơ chơ chă wă tơ’bưh hăm Kră Yang ‘Bok Kei-Dei, mălei lu sư wă “kơ lu bơngai lăm teh đak ‘bôh”. Tơ’ngla mă “lu ‘bơ̆r đak klak ŭnh” ưh kơsĭ kơ Kră Yang ‘Bok Kei-Dei ôh mă ‘noh tơngla sư kơdih. Pơma nai dơ̆ng, krao khan mă tơchĕng kơdih kâu ling lang noh ưh kơ tơpă ôh, yua kiơ̆ kơ đei tơblang, krao khan jơ̆ tơ’bưh hăm ‘Bok Kei-Dei păng tơchĕng kơ Sư.
Tơdra ‘bônh kơ ‘bôh lăm lu bơngai krao khan ưh kơ tơpă “lu sư pơm iung dơ̆ng krao khan kơ ‘Bok Kei-Dei ‘bơ̆t anăp bôl tơ lăm hnam akŭm, phŏ tơ kơphô̆, tơ kơchơ, wă kơ đe ‘bôh na ư-ang kơ sư khan bơngai ‘lơ̆ng.” “Rok trong” tơ anih đei kơdâu wih wơ̆t lơ bơngai rok trong tih; lơ bơngai wih wơ̆t păng lăng ‘bôh. “lu ‘bơ̆r đak klak ŭnh” wă kơ lơ bơngai ‘bôh lu sư adrin krao khan kral kơchăng rok trong kơplah trŏ kơ jơ krao khan, lu sư krao khan. Lu sư pơm tơ’bôh thoi lĕ kơ bơngai hưch hanh ‘maih krao khan dêh, thoi noh wă ưh kơ krao khan ưh kơ gơh, mă khan tŏk bŏk trong, mă khan lu sư krao khan tơ “hnam akŭm” dah tơ “kơphô̆, kơchơ” tơm tơdrong lu sư krao khan noh “wă kơ đe lăng ‘bôh” wă khan “dah đe ưh kơ lăng ‘bôh” lei lu sư ưh kơ đei krao khan ôh, pơma plơ̆ng dơ̆ng, lu sư ‘maih krao khan tơ anih tơpôl lơ, jơ̆ anih đei lơ bơngai ‘bôh lu sư krao khan.
Lu bơ̆n athei ‘blŏk Kră Yang Yêsu ưh kơ pơma khă tơdrong krao khan tơ anih tơpôl lơ ôh, mălei Kră Yang pơma chrih kơ lu sư krao khan wă kơ đe ‘bôh. Minh ‘nu bơngai ‘bơ̆r đak klak ŭnh noh sư lăp krao khan tơ anih tơpôl đĕch, mălei lu sư ưh kơ “… mơ̆t tơ anih kueng kơdrô̆, tang ‘măng, na krao khan hăm ‘Bă, tơ anih hlơp noh”. (tr 6a) yua mă tơpă sư lu sư ưh kơ đei tơdrong tơ’bưh kơdrô̆ ayơ wă kơ krao khan kơ ‘Bok Kei-Dei. Mălei, lu bơ̆n athei kơchăng, yua ưh kơsĭ minh ‘nu krao khan “tơ anih hlơp” ‘noh bơngai ưh kơ ‘bơ̆r đak klak ŭnh. Krao khan tơ anih hlơp ưh kơ đei bu băt mălei bơ̆n pôk kơdih khan bơ̆n bơngai ‘lơ̆ng tơpăt ‘noh kư̆m thoi bơngai ‘bơ̆r đak klak ŭnh mơ̆n.
Dang ei, lu bơ̆n kư̆m đei krao khan ưh kơ tơpă, kơplah bơ̆n krao khan, mălei ưh kơ tơchĕng truh tơ ‘Bok Kei-Dei, mălei tơchĕng tơ kơdih kâu đĕch păng tơdrong kăl wă lu bơ̆n. Tơdah krao khan chă druh kiơ̆ đe, krao khan kiơ̆ kơ tơdrong đĭ juăt đĕch, tơdah krao khan jô̆ kơ đe yoch, tơdah krao khan kiơ̆ thoi bơ̆n wă kơdih ăn kơ đe nai băt.
Lu bơ̆n lăng bơ̆n kơdih juăt kơ krao khan tơpă dah krao khan ưh kơ tơpă?
Ơ Kră Yang, apinh Ih mơnat kơ inh yua kơ lơ wơ̆t inh krao khan ưh kơ tơpă, krao khan ră mălei ưh kơ đĭ jơhngơ̆m tơchĕng tơ Ih. Apinh Ih tơgŭm inh ling lang arih lăm tơdrong tơ’bưh jê̆ hăm Ih. Yua anăn Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 1.
Kênh Youtube BHKTHN:
