Luka 23:33-34
“Na Yêsu khan kơ ‘Bă Sư ‘Bok Kei-Dei thoi âu: Ơ ‘Bă, apinh Ih ‘nĕ jô̆ yo kơ lu sư, yua kơ lu sư ưh kơ băt lu sư oei pơm kiơ ôh.” (Luka 23:34a)
Nơ̆r jet tơchĕng pơwao:
– Tơ ‘long pơglang, Kră Yang Yêsu krao khan tơdrong kiơ kơ lu bơngai pơ̆ng Sư tơ ‘long pơglang?
– Kră Yang đei pơm kơmĭl ayơ đơ̆ng tơdrong krao khan ưh?
– Dang ei lu bơ̆n pơhrăm kiơ̆ kơmĭl Kră Yang gah tơdrong krao khan thoi yơ?
Pơ̆ng tơ ‘long pơglang, jơ̆ tơdrong phak tih krưp dêh lăm jơ hnơr Rôm pơgơ̆r sơ̆ yua kơ pơm kơ bơngai yoch noh lôch pơmat tat lăm jơ năr đunh adrol wă kơtĕch jơhngơ̆m. mălei lăm tơdrong jĭ pơmat tat noh, Kră Yang Yêsu Sư ‘bôh păng mơnat kơ lu bơngai mă pơ̆ng Sư tơ ‘long pơglang, yua kơ lu sư ưh kơ băt tơdrong lu sư pơm noh pơm kơnê̆ kơ Kră Yang, lu sư ưh kơ băt bơngai mă lu sư pơ̆ng kơđinh noh Kon ‘Bok Kei-Dei! Kră Yang pơyơ̆r nơ̆r krao khan kơ ‘Bă Sư krao khan tơgŭm kơ lu bơngai mă pơ̆ng Sư tơ ‘long pơglang, “Ơ ‘Bă, apinh Ih ‘nĕ jô̆ yo kơ lu sư, yua kơ lu sư ưh kơ băt lu sư oei pơm kiơ ôh.”
Kră Yang Yêsu krao khan “Ơ ‘Bă apinh Ih ‘nĕ jô̆ yo kơ lu sư” ưh kơ trŏ khan Kră Yang krao apinh ‘Bă Sư ‘nĕ kơ jô̆ yo mă khan lu sư oei pơm yoch mă ưh kơ wă tơbral, mălei lăm âu Kră Yang apinh ‘Bă Sư ‘nĕ jô̆ yo kơ tơdrong kơ hlôh kơwao lu sư, yua kơ lu sư ưh kơ băt lu sư oei pơm noh yoch kơnê̆ tơpă, yua đơ̆ng tơdrong noh lu sư oei đei jơ năr băt tơbral wă kơ gơh klaih. Đơ̆ng nơ̆r krao khan tơ ‘long pơglang noh, Kră Yang Yêsu đei tơ’bôh kơ lu bơngai pơhrăm păng Sư păng lu bơngai oei dơ̆ng kiơ̆ ei ‘bôh rơđah dôm nơ̆r Kră Yang đei bơtho athei ‘mêm kơ lu bơngai mă pơm kơnê̆ kơ bơ̆n păng krao khan apinh ‘Bok Kei-Dei tơgŭm lu sư (Mathiơ 5:43-48). Ưh kơ trŏ pơma ‘bơ̆r hoh đĕch ôh dah mă bơtho lu bơngai pơhrăm păng Sư đĕch mă kơdih kâu Sư ưh kơ pơm kiơ̆. Nơ̆r pơma Sư năm hơdai hăm tơdrong pơm tơ’bôh Kră Yang pơm kơmĭl arih pơm kiơ̆ trŏ nơ̆r Sư bơtho păng arih pơm kơmĭl ‘nâu đei ‘bơm truh tơ ‘bok Êtien. Kơplah sư đei tơ’bơ̆p tơdrong pơmat tat kơplah đe klơ̆m sư păng tơmo, adrol kơ sư wă lôch, sư sơtơ̆p kŭl tăng krao khan, “Ơ Kră Yang, ih ‘nĕ jô̆ yo kơ bơngai pơlôch inh! (Tơdrong jang 7:60).
Kră Yang Yêsu đei ‘măn ăn kơ lu bơ̆n kơmĭl lăm tơdrong krao khan wă kơ lu bơ̆n rok kiơ̆. Mă minh, lu bơ̆n dang ei pă đei pŭ iŏk tơdrong pơmat tat, tơdrong đe pơm kơnê̆ thoi lu bơngai lui blŭng a sơ̆ bơih, mă khan lei ră, lu bơ̆n oei arih ‘bơ̆t anăp lu bơngai ala teh mă areh kơ lu bơ̆n, nơ̆r Kră Yang đei khan adrol lăm Yôhan 17:18-26, mă khan thoi ei, lu bơ̆n athei ‘mêm kơ lu sư yua kơ lu sư pơm noh oei kuơ̆l kơ trong lăm tơdrong kơnê̆. ‘Moi kiơ̆ Kră Yang, athei krao khan tơgŭm lu bơngai mă ayăt păng pơm kơnê̆ kơ lu bơ̆n wă kơ lu sư tơchĕng băt kơnăl kơ Kră Yang tơbral păng gơh klaih. Mă ‘bar, adrol kơ Sư tŏk tơ plĕnh, Kră Yang đei tơtă kơ rim ‘nu lu bơ̆n năm jơ̆p jang anih bơtho kơ đe tơdrong Sư, mă loi lu bơngai tam mă băt kơ Kră Yang (Mathiơ 28:19-20) kăl kơ ‘blŏk răk nơ̆r bơtho ‘nâu đei yua tơpă noh nơ̆r pơma păng pơm tơ’bôh bre sư năm hơdai. Dah lu bơ̆n pơma đĕch na ưh kơ pơm dah pơma mă ưh kơ pơm kiơ̆ thoi nơ̆r pơma lei dôm tơdrong bơ̆n bơtho noh ưh pă yua kiơ dơ̆ng.
Ơ Kră Yang, apinh tơdrong ‘mêm Ih ‘bĕnh kơ lăm inh na wă kơ đơ̆ng tơdrong ‘mêm Ih noh gơh tơ’bôh kơ bơngai mă ayăt kơ inh, areh kơ inh. Apinh Ih tơgŭm wă kơ inh băt ‘mêm păng krao khan tơgŭm lu sư nhen thoi Ih đei krao khan kơ lu bơngai mă pơ̆ng Ih tơ ‘long pơglang, yua anăn Kră Yang Yêsu Krist, Amen!
Lu bơ̆n yua iŏk thoi yơ hăm kơmĭl Kră Yang krao khan tơ ‘long pơglang?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 3
Kênh Youtube BHKTHN:
