Mathiơ 21:1-6
“Ơ kon drŏ-kăn Siôn chơt hiôk bĕ đĭ-đăng! Ơ kon drŏ-kăn Jêrusalem, jreo tơkĕch chơt hiôk bĕ!
‘Nâu, pơtao lu iĕm truh tơ lu iĕm boih, Sư jơ̆ tơpăt ăn tơdrong dŏng pơklaih, iơ̆m dim hao aseh iĕ, wă khan kon aseh yŏng.” (Sachari 9:9)
Nơ̆r jet tơchĕng pơwao:
– Kơplah wă jê̆ truh tơ pơlei Jêrusalem, Kră Yang Yêsu wơh ‘bar ‘nu jơ̆ng ‘bang pơm tơdrong kiơ?
– Kră Yang hao aseh iĕ mơ̆t lăm pơlei tơ’bôh ăn Sư iŏk đon ala thoi yơ?
– Lu bơ̆n đei yua kiơ kơplah bơ̆n pơhrăm kiơ̆ tơdrong iŏk đon ala thoi Kră Yang Yêsu?
Kơplah Kră Yang Yêsu mơ̆t lăm pơlei Jêrusalem lăm năr phĕt năm brih, năm tơ pơlei Bêthani dang pêng kây sô̆, Kră Yang wơh ‘bar nu jơ̆ng ‘bang năm tơ pơlei Bêphajê, tơ noh đei ‘bôh minh pôm aseh akăn păng minh pôm seh kon iĕ. Kră Yang wă kơ bre sư iŏk seh ăn kơ Sư, mưh tơngla aseh noh apinh, măr sư kăl kơ pơma Kră Yang wă kơ aseh iĕ noh na tơ’ngla aseh noh gô ăn kơ măr sư dui ba. Mă khan lu bơngai pơhrăm păng Sư ưh kơ hlôh yua kơ kiơ Kră Yang athei mă lei lu sư kŭm pơm kiơ̆, dui ba aseh mĕ păng kon ăn kơ Kră Yang Yêsu. Lu sư lơ̆k ao tơ kơ pal kơdŭ aseh na Kră Yang Yêsu hao kơ pal kơdŭ aseh iĕ noh.
Seh iĕ noh jơ̆ sem dơrong pơtao ngăl hao (I Pơtao 1:33), Kră Yang Yêsu wă năm tơ pơlei Jêrusalem thoi minh ‘nu pơtao. Kră Yang pơm blep thoi bơngai pơtruh nơ̆r ‘Bok Kei-Dei anăn Sachari đei pơma khan lê̆ 500 sơnăm hơdrol (Sachari 9:9). Bơngai pơtruh nơ̆r ‘Bok Kei-Dei anăn Sachari roi kơ bơ̆n gah Kră Yang Yêsu Sư bơih pơtao “lơ̆ng tơpăt” wă khan Kră Yang Yêsu jur tơ ‘bôh kơ tơdrong ‘lơ̆ng tơpăt đơ̆ng ‘Bok Kei-Dei wă wă dŏng pơklaih đĭ đăng tơdrong yoch kon bơngai lăm teh đak. Kơnhăm Kră Yang Yêsu jur noh jơ̆ wă dŏng pơklaih kon bơngai, Sư jơ̆ pơtao ba ăn tơdrong hiôk chơt kơ kon pơlei Sư. Ưh kơ nhen thoi lu pơtao lăm teh đak âu, Kră Yang Yêsu jur ưh kơ iŏk tơdrong hăm tơdrong pơgơ̆r pơgŏ, mă lei sư pơgơ̆r hăm tơdrong “iơ̆m dim” iŏk đon ala, chu pŭ iŏk. Kră Yang Yêsu mơ̆t lăm pơlei Jêrusalem hăm tơdrong iơ̆m dim, hao seh iĕ noh jơ̆ kiơ̆ thoi tơdrong Kră Yang ‘Bok Kei-Dei wă; Sư bơih tơ’ngla jur lăm teh đak hăm tơdrong dŏng pơklaih, mơ̆t lăm pơlei ‘lơ̆ng rơgoh hăm tơdrong iơ̆m dim hao minh pôm seh pơtih gia kơ Sư wă pŭ iŏk tơdrong yoch kon bơngai.
Khul bơngai lui dang ei oei tơblŏk gah tơdrong Kră Yang Yêsu mơ̆t lăm pơlei Jêrusalem wă tơ’bôh ăn kơ tơdrong minh giĕng mă Kră Yang Yêsu chu pơmat. Kră Yang Yêsu hao minh pôm seh iĕ wă kơ bơ̆n tơchĕng bơ̆n kăl kơ pŭ iŏk tơdrong pŭ trăp thoi Kră Yang Yêsu păng pơhrăm gah tơdrong iŏk đon ala, iơ̆m dim wă kơ bơhngol bơ̆n đei tơdrong pơdơh lăm Kră Yang nhen thoi Kră Yang đei khan: “ Yua kơ Inh bơngai dim, băt ‘mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk.” (Mathiơ 11:29). Kơplah arih iơ̆m dim kiơ̆ thoi Kră Yang, lu bơ̆n gô chă đei tơdrong hiôk chơt păng đei tơdrong pơdơh hiôk lăm jơhngơ̆m bơ̆n.
Ơ Kră Yang, bơnê kơ Ih đei tơ’bôh tơdrong iơ̆m dim, iŏk đon ala păng bơtho inh pŭ iŏk tơdrong pŭ trăp thoi Ih. Apinh Ih tơgŭm inh blŏk inh âu gah Ih păng rim năr kăl kơ tơ’bôh tơdrong hăm tơdrong iơ̆m dim hăm bơngai jih ‘ma. Yua anăn Kră Yang Yêsu Krist, Amen.
Lu bơ̆n hăm oei arih tơ’bôh kơ bơ̆n minh ‘nu bơngai iơ̆m dim hăm bơngai jih ‘ma kơ bơ̆n ưh?
Đŏk Sơ̆p hla bơar nơ̆r ‘Bok Kei-Dei lăm tơpêng sơnăm: Êsai 58
Kênh Youtube BHKTHN:
