Mathiơ 28:5-7
“Dang ei Sư ưh pă oei tơ âu boih yua kơ Sư iung arih thoi Sư khan hmă” (Mathiơ 28:6a)
Nơ̆r jet tơchĕng pơwao:
– Ih tơchĕng kiơ gah jơhngơ̆m lu bơngai drŏkăn năm lăng bơsat?
– Tơdrong Kră Yang Yêsu iung arih dơ̆ng thoi nơ̆r Sư khan đei yua kiơ hăm jơ̆ng ‘bang ‘nâu păng hăm lu bơ̆n dang ei?
Lu jơ̆ng ‘bang ơh sơ’ngon kơplah ‘bôh đe atol Kră Yang, đe pơm kơnê̆ pơmat Sư thoi minh ‘nu bơngai pơm yoch tih krưp. Năr Sa’bat hlôi bơih, lu bơngai drŏkăn năm lăng bơsat tơ’bôh jơhngơ̆m lu sư ơh hmach. Jơhngơ̆m lu sư ơh sơ’ngon dêh. Lu sư hơwơ̆l hơwang, ưh kơ băt gô wă thoi yơ dơ̆ng.
Truh tơ bơsat, lu sư ‘bôh tơmo tih đêl tang chơkăl ‘măng bơsat tơgrŏl tơpơih đơ̆ng Linh jang ‘lơ̆ng Kră Yang hrŭk ao rang kok dêh lăng sư nhen lĕ kơmlat (Mathiơ 28:2-3). Linh jang ‘lơ̆ng khan kơ bre drŏkăn, Linh jang ‘lơ̆ng khan kơ bre noh khan “Biĕm ‘nĕ kơ hli, inh băt kơ biĕm năm tơ âu chă Yêsu mă đe pơ̆ng pơlôch tơ ‘long pơglang” (trong 5). Biĕm ‘nĕ kơ hli yua kơ dôm tơdrong dang ei pha bơih: Kră Yang Yêsu iung arih đơ̆ng lôch bơih, tơdrong lôch ưh kơ kĕ chô̆ pơkơ̆ng Sư. “Dang ei Sư ưh pă oei tơ âu bơih yua kơ Sư iung arih thoi Sư khan hmă. Tơ̆ng biĕm ưh kơ lui apinh biĕm năm lăng anih đêl đe tơ ‘bĭch Sư âu” (trong 6). Tơdrong Kră Yang Yêsu iung arih đơ̆ng lôch ưh kơsĭ wă tơ’bôh Sư kĕ jei đơ̆ng tơdrong lôch đĕch ôh, na kư̆m wă tơ’bôh dôm tơdrong Sư khan ‘bôh hloi tơpă. Lăm sơnăm Sư bơ̆jang, Kră Yang lơ wơ̆t pơma roi gah tơdrong ‘nâu (lăng Mathiơ 16:21). Mălei rŏ lăng đơ̆ng tơdrong sơ’ngon ‘bôh Kră Yang Yêsu chu pơ̆ng kơđinh đei pơm kơ lu jơ̆ng ‘bang tơchĕng pơm kơ lu sư hiơt bơih kơ nơ̆r Kră Yang khan. Kơlih kơ thoi noh, tơdrong tơ’blŏk ming tơdrong Kră Yang iung arih bơih, thoi nơ̆r Sư khan, tơgŭm kơ lu sư đơ̆ng jơhngơ̆m hli krê, sơ’ngon jing lui gơnang păng hơmĕng.
Phĕt ‘blŏk kơ Kră Yang Yêsu chu pơmat, ăn kơ jơhngơ̆m đơ̆ng ơh sơ’ngon ‘brơ̆k mơnat. Yua kơ tơdrong yoch, Kră Yang pơjao akâu Sư lôch tang bơ̆n. Tơdrong ơh sơ’ngon tơpă ba ăn tơdrong kư̆m băt tơbral tơpăt tơpă, đĭ jơhngơ̆m băt bơnê kơ Kră Yang. Yua kơ tơdrong Sư chu lôch pơmat tih tin noh. Mălei tơ’blŏk gah tơdrong Kră Yang iung arih bơih thoi nơ̆r Sư khan ba ăn kơ bơ̆n chơt hiôk, hơmĕng păng jơhngơ̆m kơjăp. Kră Yang Yêsu kĕ jei đơ̆ng tơdrong lôch lei na lu bơngai kiơ̆ Kră Yang gô đei bơwei ling lang truh ning mônh, tơdrong lôch kư̆m ưh pă gơh pơrăm bơ̆n dơ̆ng. Tôm nơ̆r Kră Yang pơkă gô pơm keh tơ lăm chăl arih lu bơngai kiơ̆ Kră Yang. Mă khan dang ei tơdrong arih thoi yơ hĭ, mă trong bơ̆n kiơ̆ Kră Yang đei pơgăn thoi yơ, apinh Kră Yang ăn kơ bơ̆n ling lang lui kơjăp kơ Kră Yang, Sư bơih Tơ’ngla tơpăt: “Duch ei khan kơ Sư: Ơ ‘bok inh băt bơih ih, ih bơngai pơtruh nơ̆r ‘Bok Kei-Dei” (Yôhan 4:19).
Ưang kơ Kră Yang Yêsu, yua kơ Ih iung arih bơih thoi nơ̆r Ih khan wă kơ dang ei inh gơh mơn băt tơdrong arih Ih păng kơjăp hơmĕng lăm tơdrong arih ling lang. Apinh tơdrong mơsêh Ih tơgŭm inh ling lang pran kơjăp wă kơ gơh kĕ hlôi đơ̆ng dôm tơdrong pơlong lăng đon lui, ling lang kiơ̆ Kră Yang păng bơ̆jang kơ Ih, băt kơ Ih bơih Kră Yang mă oei arih păng Ih ling lang tơpăt. Krao khan yua anăn Kră Yang Yêsu Krist, Amen.
Bơ̆n hăm kơjăp kơplah băt Kră Yang mơsêh păng ling lang tơpăt ưh? Bơ̆n yak năm hăm Kră Yang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 12
Kênh Youtube BHKTHN:
