Mathais 28:5-7
Nqe cim:
“Nws tsis nyob ntawm no, Nws twb sawv raws li Nws qhia tseg lawm. Neb cia li los saib qhov chaw uas luag tso Nws lub cev. Neb cia li rov mus qhia rau Nws cov thwjtim hais tias, Nws twb sawv hauv qhov tuag rov los lawm.” (Mathais 28:6-7a)
Lus nug rau sawvdaws xav:
– Vim li cas cov pojniam yuav tsum mus saib qhov chaw tso Tswv Yexus lub cev?
– Tom qab uas lawv pom lub qhov ntxa khoob lug cia, cov pojniam ntawd ua dabtsi?
– Sim xav saib, peb tau kev txhawb zog thiab qhia li cas thaum mus saib qhov chaw tso tus Tswv lub cev?
Lub qhov ntxa tsaus ntuj nti, txias zias, yog qhov chaw uas luag coj tus Tswv lub cev mus tso. Ntawd yog qhov chaw muaj lub cev tuag, quaj ntsuag. Thiab kuj yog qhov chaw tas kev cia siab, mob siab thiab txhawj ntshai. Tiamsis ncaj rau Hnub Ib tus Tswv sawv los, cov timtswv los hais rau cov pojniam mus saib qhov chaw tso Yexus lub cev. Nws lub cev tsis nyob ntawd lawm. Qhov chaw no khoob lug cia thiab ua timkhawv tias tus Tswv sawv lawm. Tus Tswv sawv, tawm hauv lub qhov ntxa mus. Cov pojniam tau caw mus saib qhov chaw tso tus Tswv lub cev ua tabpov, thiab hais kom “neb cia li rov mus qhia rau Nws cov thwjtim hais tias, Nws twb sawv hauv qhov tuag rov los lawm” (nqe 7a). Lub sijhawm nyuaj siab tso mus, nimno yog lub sijhawm tig los ua neej nrog sawvdaws, qhia txojkev zoo siab uas Tswv Yexus sawv.
Tej zaum muaj ib lub sijhawm twg hauv kev ua neej, peb kuj pom tau tias yus tabtom sawv ntawm lub ntxa, nyuaj siab, ntxhov siab, tu siab tsis muaj tus txhawb thiab tas kev cia siab. Lub caij ua koob tsheej nco txog Tswv Yexus sawv xyoo no, thov kom peb txhua tus cia li mus rau hauv qhov chaw tso tus Tswv lub cev, kom peb pom qhov tseemceeb twb ua tiav lawm. Tus Tswv twb kovyeej txojkev tuag lawm, ces tej teebmeem yeej tsis nyuaj rau tus Tswv li.
Hnub no, yog peb “lub ntxa” twg tsaus ntuj nti txias zias tseem nyob hauv peb lub siab, nco ntsoov hais tias twb muaj ib qhov lub ntxa tso tus Tswv lub cev – nimno qhov chaw ntawd yog lub qhov ntxa khoob lug cia lawm xwb. Lub qhov ntxa khoob lug vim tus Tswv twb sawv lawm. Lub qhov ntxa khoob lug cia ua timkhawv tias Tswv Yexus kovyeej kev tuag.
Cia li los saib qhov chaw tso tus Tswv lub cev thiab tawm los zoo siab hlo mus qhia txojkev zoo siab. Tswv Yexus twb sawv los yog qhov tseeb cheemtsum yuav tau muaj qhia rau txhua tus neeg paub txojkev cia siab nyob mus ibtxhis. Tswv Yexus nimno tseem muaj sia nyob yog txojkev zoo siab cheemtsum yuav tau qhia rau neeg ntiajteb paub hais tias tus Tswv tseem hlub thiab ntsia ntsoov lawv, Nws zoo siab txais yuav tus uas los ntseeg Nws mus nyob ntuj Ceebtsheej.
Qhov chaw uas tso tus Tswv lub cev dhau los ua lub cim rau kev hloov ntawm lub hwjchim Yexus sawv. Lub ntxa uas tseem tsaus ntuj nti txias zias nimno yog qhov chaw puv npo kev cia siab, kev hlub, thiab kev tshaj qhia tus Tswv zaj.
Thov Vajtswv,
Tus Tswv, thaum xav txog lub ntsiab uas Koj sawv rov los, thov Koj pab kom nyuam yaus ua neej zoo li tus neeg uas nyob hauv lub qhov ntxa khoob lug cia, ua lub cim qhia txojkev muaj yeej thiab lub hwjchim hloov. Thov Koj tshem tej “ntxa” uas nyuam yaus tseem zais hauv siab, pub kom nyuam yaus muaj kev ntseeg thiab kev cia siab, kom nyuam yaus muaj zog, nquag mus qhia Koj zaj rau ntau leej. Nyuam yaus tuav Tswv Yexus lub npe thov, Amees.
Peb puas txaus siab hlo tawm hauv lub qhov ntxa los thiab qhia txojkev zoo siab Yexus sawv lawm tau?
Nyeem Vajluskub hauv peb lub xyoo: II Vajntxwv 13
Kênh Youtube BHKTHN:
