Klei Aê Diê Blŭ: Klei Kbiă 27:1-8.
Êlan kliăng: “Sĭt nik tui si klei bhiăn păt čiăng jih jang mnơ̆ng arăng bi doh hŏng êrah, leh anăn tơdah amâo mâo ôh êrah tuh, amâo mâo klei pap brei kơ klei soh ôh.” (Hêbrơ 9:22).
Klei êmuh ksiêm mĭn: Si hdră mkra mjing knưl mnơ̆ng myơr čuh? Pă ƀĕ ki dưi dưm hlăm pă bĭt kiêng knưl mnơ̆ng myơr čuh ya pioh ngă leh anăn ya klei yuôm bhăn mâo? Si ngă klei yuôm bhăn knưl mnơ̆ng myơr čuh hlăm klei kkuh mpŭ kơ Aê Diê? Klei hriăm hruê anei ya klei mñă kơ drei?
Knưl mnơ̆ng myơr čuh jing sa klei yuôm bhăn hlăm klei hdĭp phung ƀuôn sang Israel kkuh mpŭ kơ Aê Diê. Aê Diê mtă leh Y‑Môis brei ngă mta knưl mnơ̆ng myơr čuh djŏ tui si hdră Aê Diê ktrâo lač leh ti čư̆ (êlan 8). Knưl mnơ̆ng myơr čuh dưi ngă hŏng kyâo Akasi, Knưl anăn srăng mta dhar, grăp nah dlông hlăm brô 2,2 met, boh dlông hlăm brô 1,3 met. Mâo pă ki ti pă bĭt kiêng ñu; ki srăng jing sa đrông hŏng knưl, leh anăn brei ih luôm hŏng kông. Dŭm mta mnơ̆ng đru kơ bruă čuh mnơ̆ng myơr msĕ si gŏ dưm hbâo, kdroh, hmăm, awak rưng, leh anăn mnơ̆ng dưm hdăng ngur arăng ngă hŏng kông sơăi (êlan 1‑3). Diñu ăt mkra sa pŏk driah kông mñam rưng; leh anăn dưm pă boh kwang kông ti pă bĭt kiêng driah anăn, dưm gơ̆ ti gŭ griŏ knưl mơ̆ng gŭ truh ti mkrah knưl.
Msĕ si dŭm mta mnơ̆ng dưm hlăm Sang čhiăm, knưl myơr mnơ̆ng čuh ăt mâo hdră mkra mjing ênưih kkung hiu hŏng giê kkung hŏng kyâo Akasi hŏng kông, hrô hlăm ƀăng kwang ti tĭng dua nah djiêu knưl čiăng yua kkung gơ̆ (êlan 7). Knưl srăng dưi ngă ƀăng êrŏng hŏng lu pŏk mdhă kñăm pioh čuh mnơ̆ng myơr (êlan 8).
Pă ƀĕ ki ti pă bĭt kiêng knưl mnơ̆ng myơr čuh jing anôk phung khua ngă yang srăng mmia êrah êlâo kơ ba čuh mnơ̆ng ngă yang. Dŭm ƀĕ ki bi hmô kơ klei dưi bi mtlaih (Klei Kbiă 29:12). Klei Mmuñ Hđăp 18:2 brei drei thâo dŭm ƀĕ ki adôk lŏ jing klei bi hmô kơ klei đru leh anăn bi mtlaih sĭt phung ƀuôn sang Aê Diê tuôm hŏng klei dleh dlan.
Arăng dưm knưl mnơ̆ng myơr čuh ti anôk ênưih thâo ƀuh tal êlâo sĭt phung ƀuôn sang Israel mŭt hlăm tač Sang čhiăm. Mnơ̆ng myơr čuh brei dưi myơr nanao čiăng lač kơ phung ƀuôn sang Aê Diê ruah: Diñu knŏng dưi nao giăm Aê Diê hŏng bruă bi mdjiê mnơ̆ng myơr čiăng hrô kơ klei soh diñu. Mnơ̆ng myơr čuh jing hdră sa anăn čiăng Aê Diê pap brei kơ klei soh phung ƀuôn sang Ñu. Hlăm Hêbrơ 10:1‑18, Khua Yang Yêsu dưi lač msĕ si sa mnơ̆ng myơr čih sa anăn. Klei anei mñă kơ phung drei sa klei sĭt nik: Anak mnuih amâo dưi duah ôh ya hdră mkăn čiăng dưi lăm lui klei soh pô, čiăng dưi nao giăm Aê Diê doh jăk êngao hdră Khua Yang Yêsu ngă leh. Ñu jing Khua Ngă Yang Prŏng Hĭn ăt jing Êđai Biăp Aê Diê, Pô tuh leh êrah ti kyâo bi kal čiăng bi mtlaih leh anăn bi doh klei soh jih jang anak mnuih.
Khua Yang Yêsu săn leh asei mlei čiăng bi mtlaih drei, ya klei diih myơr leh kơ Ñu?
Wah lač: Ơ Khua Yang, kâo bi mni lač jăk kơ Ih pŏk leh êlan čiăng kơ sa čô mnuih soh msĕ si kâo dưi nao giăm Aê Diê doh jăk. Kâo thâo săng Aê Diê khăp kâo leh anăn mâo ênoh yuôm kyua Khua Yang Yêsu săn leh asei mlei bi mtlaih kâo. Akâo kơ Ih đru kâo hdơr knga kơ Aê Diê nanao leh anăn hdĭp bi guh kơang kơ Anăn Ñu.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 19:24-20:10
Kênh Youtube BHKTHN:
