Klei Aê Diê Blŭ: Y-Yakơ 3:13-18
Êlan kliăng: “Ƀiădah klei thâo mĭn kbiă hriê mơ̆ng dlông êlâo hĭn jing êngeh, leh anăn êđăp ênang, êdu êun, thâo guôp, bŏ hŏng klei pap mñai leh anăn boh jăk, amâo mâo dlăng ti êngao amâodah ai ngăm ôh.” (Y-Yakơ 3:17)
Klei êmuh ksiêm mĭn: Ya jing klei thâo mĭn mơ̆ng dlông leh anăn si klei mdê hŏng klei thâo mĭn mơ̆ng lăn ala? Si klei thâo mĭn hmăi kơ knuih hdĭp drei? Si ngă čiăng dưi duah klei thâo mĭn mơ̆ng dlông?
Mơ̆ng đưm truh ară anei, anak mnuih ăt duah nanao klei thâo mĭn. Lu mnuih čhuai klei thâo mĭn hŏng klei hriăm lu. Klei thâo mĭn amâo djŏ knŏng jing klei hriăm lu ôh ƀiădah lŏ jing klei drei bi mĭn, bi êdah knuih leh anăn klei čuăn ruah. Jing phung ƀuôn sang Ƀuôn Ala Mtao Adiê, brei drei hdĭp hŏng klei thâo mĭn mơ̆ng dlông, jing klei thâo mĭn hriê mơ̆ng Aê Diê, bi êdah knuih Ñu leh anăn klei bi mơak kơ Ñu.
Hlăm trăn Klei Aê Diê Blŭ anei,Y-Yakơ mblang klă mngač kơ klei thâo mĭn mơ̆ng dlông leh anăn klei thâo mĭn mơ̆ng lăn ala. Kơ phŭn agha, klei thâo mĭn mơ̆ng dlông hriê mơ̆ng Aê Diê, kyuanăn mâo klei bi knăl êlâo hĭn “jing êngeh, leh anăn êđăp ênang, êdu êun, thâo guôp, bŏ hŏng klei pap mñai leh anăn boh jăk, amâo mâo dlăng ti êngao amâodah ai ngăm ôh.” (êlan 17). Bi phŭn agha mơ̆ng klei thâo mĭn lăn ala kbiă mơ̆ng kđeh, leh anăn mơ̆ng yang jhat (êlan 15) mâo knuih jing “klei nač phĭ leh anăn klei čiăng bi mđĭ pô” (êlan 14). Klei thâo mĭn mơ̆ng dlông kƀĭn hlăm Aê Diê leh anăn mđing kơ bruă bi mơak kơ Ñu, hlăk êjai klei thâo mĭn mơ̆ng lăn ala kƀĭn hlăm klei mgao, knŏng duah klei tŭ dưn kơ pô.
Dlăng hlăm klei hdĭp pô leh anăn phung riêng gah hlăm gŏ sang, Phung Sang Aê Diê, sang hră, anôk mă bruă, drei ƀuh klă klei hmăi mơ̆ng dua klei thâo mĭn anei. Tơdah hdĭp hŏng klei thâo mĭn mơ̆ng adiê mơ̆ng bruă lui klei mgao pô čiăng kƀĭn kơ Aê Diê, drei ƀuh anôk mă bruă hlăm mngăt leh anăn êđăp ênang. Bi tơdah knŏng bi mĭn kơ klei tŭ dưn pô hŏng klei mĭn mplư, drei srăng ƀuh klei bi nač leh anăn klei čuôt klih, tinăn srăng mâo klei rŭng răng leh anăn djăp mta bruă jhat (êlan 16).
Phung ƀuôn sang Aê Diê brei jih ai tiê tui duah, hriăm klei thâo mĭn mơ̆ng dlông. Klei Aê Diê Blŭ mtô hlei pô thâo pô kƀah klei thâo mĭn brei akâo kơ Aê Diê brei (Y-Yakơ 1:5). Kyua klei thâo mĭn mơ̆ng dlông hriê mơ̆ng Aê Diê pô, kyuanăn hdră čiăng tŭ mă jing mơ̆ng klei bi mguôp hŏng Aê Diê. Ƀrư̆ giăm Aê Diê hlăm mmông wah lač, dlăng, hriăm Klei Aê Diê Blŭ, hriăm mjuăt klei hdĭp mngăt, drei srăng thâo klei thâo mĭn mơ̆ng Aê Diê hlăm klei hdĭp drei. Grăp čô brei hdơr Klei Aê Diê Blŭ mtrang mngač, lŏ dlăng wĭt knuih hdĭp leh anăn klei drei ngă dôk bi êdah klei thâo mĭn mơ̆ng dlông mơ̆ amâodah klei thâo mĭn lăn ala? Brei knang kơ Aê Diê čiăng hdĭp kpă ênô hdơ̆ng pô, lui jih knuih hdĭp ai ngăm, dua ai tiê čiăng kơ klei thâo mĭn mơ̆ng dlông bi êdah hlăm grăp čô drei.
Drei jih ai tiê tui duah klei thâo mĭn mơ̆ng Aê Diê mơ̆?
Wah lač: Ơ Khua Yang, kâo luă gŭ ti anăp Ih, akâo klei thâo mĭn mơ̆ng dlông Ih ƀuăn brei kơ hlei pô jih ai tiê tui duah. Akâo kơ Ih tuh hlăm klei mĭn leh anăn ai tiê kâo klei thâo mĭn mơ̆ng dlông, čiăng kơ kâo hdĭp bi êdah klei guh kơang Aê Diê leh anăn hdĭp êđăp ênang, bi khăp hdơ̆ng pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
