Klei Aê Diê Blŭ: Hêbrơ 7:11-22
Êlan kliăng: “…ya yuôm lŏ mâo sa čô khua ngă yang mkăn kbiă hriê tui si êpul Y‑Mêlkisađek, amâo djŏ ôh tui si klei ngă yang Y‑Arôn?” (Hêbrơ 7:11b)
Klei êmuh ksiêm mĭn: Si ngă bruă yua mâo mơ̆ng klei phung Lêwi ngă yang? Ya ngă klei ngă yang anăn amâo mâo klă ênŭm ôh? Ya bruă Aê Diê ngă leh čiăng msir mkra hĕ klei amâo klă ênŭm anei? Ti êlan hdră klă ênŭm pioh kơ drei tui hlue?
Hlăk hrih mjing lăn ala hŏng jih jang mnơ̆ng, Aê Diê ƀuh jih jang mnơ̆ng jing jăk sơăi, čiăng lač klei Aê Diê hrih mjing jing klă ênŭm mơ̆ng phŭn. Ƀiădah mơ̆ng klei soh mŭt hlăm lăn ala, amâo lŏ mâo sa mta mnơ̆ng jing klă ênŭm ôh. Aê Diê brei klei bhiăn kơ phung Israel čiăng kơ digơ̆ thâo klei Ñu čiăng, mbĭt hŏng klei anăn thâo mơh si ngă klei kƀah anak mnuih mkă hŏng klei klă ênŭm Aê Diê. Atur kơ klei bhiăn jưh ti dlông klei ngă yang phung Lêwi, anăn jing êlan atăt anak mnuih soh jhat nao kơ Aê Diê doh jăk găn hŏng klei ngă yang. Ƀiădah sĭt nik klei ngă yang phung Lêwi tui si klei bhiăn amâo dưi đru anak mnuih jing klă ênŭm ôh (êlan 11), “kyuadah klei bhiăn amâo dưi atăt sa mta mnơ̆ng jing klă ênŭm ôh.” (êlan 19). Msĕ si Khua ƀĭng kna Y‑Pôl mblang leh, wăt tơdah klei bhiăn jing doh jăk, klă ênŭm dưn, ñu knŏng đru anak mnuih thâo kral klei soh đuč, ƀiădah amâo dưi msir mkra klei soh ôh (Rôm 7:7).
Pô čih hră Hêbrơ mblang snei, Aê Diê mâo êlan msir mkra hŏng sa klei ngă yang mkăn amâo jưh ti dlông klei bhiăn ôh. Dơ̆ng mơ̆ng kŏ, êlâo kơ mâo klei bhiăn mâo leh klei ngă yang tui si Y‑Mêlkisađek. Hlăm êlan 17, pô čih hră Hêbrơ mă yua Klei Mmuñ Hđăp 110:4 kơ klei Aê Diê srăng mjing klei ngă yang hlŏng lar tui si êpul Y‑Mêlkisađek. Khua Yang Yêsu pô srăng ngă klei ngă yang anăn, sa klei ngă yang amâo djŏ knŏng jing jăk hĭn ôh mkă hŏng klei ngă yang phung Lêwi ƀiădah jing wăt klei ngă yang klă ênŭm mơh. Čiăng lač, hŏng êlan hdră Ñu ngă yang anăn, jih jang mnơ̆ng dưi jing klă ênŭm, kyuadah Ñu pô ngă klei ƀuăn rơ̆ng (êlan 22).
Phung Yuđa bi mni kơ diñu pô mâo klei bhiăn, mâo klei ngă yang. Amâo dưi lăm ôh, jih jang klei anăn jing klei jăk sơăi leh anăn ba lu klei jăk jĭn kơ phung ƀuôn sang. Ƀiădah êlan hdră ngă anăn amâo dưi mjing digơ̆ jing klă ênŭm leh anăn mâo klei bi mtlaih ôh. Mâo đa đa mnuih tơdah hmư̆ arăng hưn anăn Yêsu kơ diñu, diñu hngah mdơ̆ng mgăn kyuadah diñu mĭn êlan hdră kâo hdĭp jing jăk leh, ya ngă đăo Aê Diê?
Boh nik gơ̆ “Mâo êlan mnuih yap msĕ si kpă, ƀiădah ti knhal tuč ñu atăt kơ klei djiê.” (Klei Bi Hriêng 14:12). Năng ai ăt mâo mơh klei jăk hlăm klei đăo hđăp, ba hriê klei tŭ dưn kơ drei, ƀiădah boh yuôm jing klei đăo anăn amâo dưi bi mtlaih sa čô mnuih ôh. Knŏng êlan hdră Khua Yang Yêsu yơh dưi mjing drei jing klă ênŭm, mâo klei hdĭp hlŏng lar. Êlan hdră anăn jing “kyua klei pap, hŏng klei đăo” kơ jih jang klei Yêsu Krist ngă leh ti kyâo bi kal.
Si ngă drei dôk hdĭp“kyua klei pap, hŏng klei đăo” hŏng Khua Yang grăp hruê mơ̆?
Wah lač: Bi mni kơ Khua Yang êjai kâo amâo êlan dưi bi mtlaih ôh hlăm klei soh kâo pô, Khua Yang Yêsu khăp leh kơ kâo leh anăn brei kơ kâo êlan hdră klă ênŭm čiăng kơ kâo dưi mâo klei bi mtlaih hŏng klei đăo kơ jih klei Ih ngă leh. Đru kâo êbat nao hŏng klei đăo grăp hruê leh anăn lui jih êlan hđăp kâo.
Dlăng Klei Aê Diê Blŭ hlăm tlâo thŭn: Y‑Agê 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
