Klei Aê Diê Blŭ: Rôm 16:3-16
Êlan kliăng: “Kkuh čhưn bĕ hdơ̆ng diih hŏng klei čŭm doh jăk. Jih jang Phung Sang Aê Diê Krist kkuh čhưn hŏng diih” (Rôm 16:16)
Klei êmuh ksiêm mĭn: Hlei anăn Khua ƀĭng kna Y-Pôl răk hlăm klei kkuh čhưn ti knhal tuč hră mơĭt anei? Mơ̆ng klei anăn, ya drei ƀuh klei mĭn Khua ƀĭng kna Y-Pôl? Ya klei hriăm drei mâo mơ̆ng klei Khua ƀĭng kna Y-Pôl bi hmô hlăm klei mă bruă kơ Khua Yang leh anăn mă bruă kơ pô mkăn?
Ti knhal tuč hră mơĭt kơ phung đăo ti čar Rôm, Khua ƀĭng kna Y-Pôl mơĭt asăp kkuh čhưn kơ lu mnuih mâo klei bi mguôp sĭt suôr hŏng ñu. Phung ñu kkuh čhưn tinei jing phung mă bruă kơ Khua Yang mbĭt hŏng ñu; phung mă bruă suăi ti krah Phung Sang Aê Diê, phung mă bruă hŏng jih ai tiê leh anăn mă bruă suăi kơ Khua Yang; phung tŭ klei arăng krư̆ mbĭt hŏng ñu; phung ñu atăt lŏ wĭt đăo kơ Khua Yang; phung Yuđa wăt phung tue; phung ayŏng amai adei khăp sĭt suôr; phung gĭt gai hlăm Phung Sang Aê Diê; phung hlăm gŏ sang klei hdĭp myang; leh anăn jih jang phung đăo bi kƀĭn kkuh mpŭ kơ Aê Diê hlăm sang phung đăo…Ñu lač jăk leh anăn bi mni kơ digơ̆, leh anăn blŭ klei bi mni kơ jih jang klei digơ̆ ngă leh kơ ñu wăt kơ bruă Khua Yang. Ti knhal tuč ñu mtă brei digơ̆ bi kkuh čhưn hdơ̆ng digơ̆ hŏng klei čŭm doh jăk (êlan 16). Anei jing klei kkuh čhưn aguah tlam tui si klei dhar kreh hlăm ênuk tal sa.
Wăt tơdah ka tuôm nao kơ čar Rôm sa blư̆ dưn, ƀiădah klei Khua ƀĭng kna Y-Pôl khăp kơ phung đăo ti čar Rôm jing prŏng snăk! Khua Yang brei ñu bi tuôm hŏng phung anei hlăm sang mnă wăt hlăm klei hiu hưn Klei Mrâo Mrang Jăk kơ lu anôk msĕ mơh. Ñu djă pioh klei bi mguôp sĭt suôr hŏng digơ̆ leh anăn mơ̆ng digơ̆, ñu thâo lu mta klei hlăm Phung Sang Aê Diê ti čar Rôm. Sĭt nik jih jang phung ñu răk anăn leh, tơdah dlăng hră anei digơ̆ mâo klei bi mđĭ ai lu snăk, mâo klei mtrŭt mă bruă kơ Khua Yang mâo boh tŭ dưn hĭn. Sĭt nik drei amâo dưi mkă ôh klei bi hmăi jăk mơ̆ng klei thâo uêñ mĭn, đru leh anăn bi mđĭ ai kơ sa čô mnuih.
Mơ̆ng klei kkuh čhưn, drei ƀuh Khua ƀĭng kna Y-Pôl jing sa čô mnuih bŏ hŏng klei thâo khăp, wăt tơdah dôk hlăm sang mnă, ñu ăt hdơr leh anăn răk anăn grăp čô mbĭt hŏng bruă suăi digơ̆ ngă leh kơ Khua Yang. Phung êkei leh anăn phung mniê, phung gĭt gai leh anăn phung bi đru đăo, amâo mâo bi kah ôh. Wăt tơdah bruă điêt amâodah bruă prŏng, ñu ăt uêñ, bi mni leh anăn yap jing yuôm sơăi, amâo djŏ uêñ knŏng kơ bruă prŏng ôh, amâodah knŏng răk mă boh tŭ dưn mơ̆ng phung khua gĭt gai leh anăn wơr bĭt hĕ phung đăo, wăt phung mniê hlăm ênuk anăn arăng dlăng hơăi mang ăt ñu răk anăn leh anăn kkuh čhưn hŏng klei mpŭ mơh. Êngao kơnăn, ñu bi êdah klei hdơr knga bi mni mơh kơ jih jang phung đru leh ñu leh anăn hŏng jih ai tiê mă bruă kơ Khua Yang. Klei khăp Khua ƀĭng kna Y-Pôl bi êdah klă hlăm grăp klei kkuh čhưn, boh blŭ bi mni, boh blŭ bi êdah klei khăp sĭt suôr msĕ si “pô kâo khăp”, “phung găp djuê kâo”, “mah jiăng kâo khăp”…Anei jing knuih mă bruă kơ Khua Yang leh anăn mă bruă kơ phung ayŏng adei hlăm klei đăo năng kơ drei tui.
Kơ hlei pô drei hdơr, kkuh čhưn leh anăn đru wah lač brei hruê anei?
Wah lač: Ơ Khua Yang, đru kâo hriăm hlăm klei thâo uêñ, thâo mpŭ, thâo hdơr knga leh anăn čuă čhưn kơ phung Ih atăt ba leh hlăm klei hdĭp kâo, čiăng kơ klei bi hmăi jăk anăn dưi bi hmăi kơ lu mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 58-59
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
