Klei Aê Diê Blŭ: Y-Yakơ 5:11
Êlan kliăng: “Diih hmư̆ leh arăng yăl dliê kơ klei Y-Yôp dôk kjăp, leh anăn diih ƀuh leh klei Khua Yang čuăn, si klei Khua Yang bŏ hŏng klei thâo pap leh anăn klei jăk” (Y-Yakơ 5:11b)
Klei êmuh ksiêm mĭn: Hlei Y-Yôp jing leh anăn si klei ñu dôk kjăp leh? Ti knhal tuč si ñu jing? Si klei Y-Yôp bi hmô bi mđĭ ai brei drei dôk kjăp tui hlue Khua Yang?
Tui hlue Khua Yang amâo djŏ klei čuăn ngă knŏng bhiâo ôh, ƀiădah jing sa klei ƀuăn hlŏng jih hruê dôk hdĭp. Khua Yang mtă kơ phung đăo kơ Ñu brei gĭr hlăm klei bi lông êran, dôk sĭt suôr tơl knhal tuč. Năng ai klei knap mñai ară anei hin srăng bi êdu ai drei, ƀiădah dlăng kơ klei phung nao êlâo bi hmô leh, drei mâo klei bi mđĭ ai leh anăn dôk kjăp hĭn hlăm klei đăo. Klei Y-Yôp dôk kjăp lŏ mñă hlăm hră Y-Yakơ 5:11 mtrŭt drei knang kjăp kơ Khua Yang tơl knhal tuč.
Y-Yôp jing sa čô mnuih “amâo mâo klei arăng dưi ƀuah ôh leh anăn kpă ênô, sa čô huĭ mpŭ kơ Aê Diê leh anăn weh đuĕ mơ̆ng klei jhat” (Y-Yôp 1:1). Ƀiădah klei hdĭp ñu bi mlih kluôm dhuôm tơdah klei knap mñai truh tăm đrông kơ ñu pô leh anăn kơ gŏ sang ñu. Knŏng hlăm sa hruê, ñu luč jih dŏ ngăn, phung dĭng buăl leh anăn phung anak êkei mniê ñu khăp hơiêng êdimima.
Amâo mjưh tăp anăn ôh, asei mlei ñu mâo ruih tiêng, ruă bŏ asei mlei. Wăt tơdah dôk hlăm klei knap mñai msĕ snăn dưn mơh, Y-Yôp ăt dôk kjăp hlăm klei đăo, leh anăn lui pioh kơ phung ênuk êdei sa pruê̆ blŭ dôk nanao mơ̆ng klei đăo snei: “Si ngă, drei knŏng mă tŭ klei jăk mơ̆ng kngan Aê Diê mơ̆, leh anăn amâo mă tŭ ôh klei jhat?” (Y-Yôp 2:10) leh anăn “Wăt tơdah Ñu bi mdjiê kâo dưn, ăt kâo srăng knang kơ Ñu” (Y-Yôp 13:15).
Hlăm kdrêč knhal tuč hră Y-Yôp, drei ƀuh boh knhal tuč kơ klei hdĭp ñu. “Yêhôwa tuh klei jăk jĭn kơ Y-Yôp lu hĭn hlăm ênuk êdei kơ ênuk êlâo” (Y-Yôp 42:12). Aê Diê brei klei jăk jĭn kơ ñu lu hĭn, dŏ ngăn wăt phung anak. Amâo djŏ klei jăk jĭn knŏng kơ klei hdĭp kđeh ôh, mơ̆ng klei lông dlăng, ñu thâo săng klă hĭn kơ Aê Diê, leh anăn thâo mơh kơ klei ñu mâo kdriêl (dlăng Y-Yôp 42:5). Leh ñu tŭ klei knap mñai, ñu thâo kral sĭt nik klei jăk jĭn, klei anăn hưn bi sĭt kơ “klei Khua Yang bŏ hŏng klei thâo pap leh anăn klei jăk” (Y-Yakơ 5:11).
Jing msĕ si Y-Yôp mơh, tăp năng drei amâo thâo săng ôh si ngă tui hlue Khua Yang klei hdĭp leh anăn gŏ sang drei tuôm hŏng lu klei knap mñai. Amâo djŏ grăp blư̆ drei thâo săng sơăi ôh kơ phŭn mâo hĕ jih jang klei truh hlăm klei hdĭp drei. Ƀiădah klei yuôm bhăn drei hriăm leh mơ̆ng Y-Yôp jing klei đăo kluôm dhuôm kơ klei Aê Diê kiă kriê. Sĭt nik tơdah drei dôk kjăp tơl knhal tuč, drei srăng mă tŭ klei mưn mơ̆ng Khua Yang. Klei mưn anăn jing ƀrư̆ hruê ƀrư̆ thâo kral Khua Yang hĭn.
Ti anăp klei knap mñai truh hlăm klei hdĭp, si ngă drei srăng knang kơ Khua Yang leh anăn dôk kjăp hŏng Ñu tơl knhal tuč mơ̆?
Wah lač: Ơ Khua Yang, dôk ti lăn ala anei kâo srăng tuôm hŏng lu klei lông dlăng, klei dleh dlan. Mâo đa đa klei truh kâo amâo dưi thâo săng ôh. Bi mni kơ Ih Khua Yang mơ̆ng klei bi hmô kơ klei Y-Yôp dôk kjăp bi mđĭ ai kâo măng ai ya klei truh, ăt knang kơ Ih nanao, dôk kjăp hlăm klei đăo nanao, dôk sĭt suôr tơl knhal tuč. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yakơ 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
