Klei Aê Diê Blŭ: Hêbrơ 4:12-13
Êlan kliăng: “Sĭt nik klei Aê Diê blŭ jing hdĭp leh anăn myang, ƀơ̆ng hĭn kơ sa ƀĕ đao gưm mâo dua nah mta, kma tơl blah ai mĭn hŏng mngăt, klang bi kkuh hŏng dlô, ksiêm klei mĭn leh anăn klei ai tiê čiăng.” (Hêbrơ 4:12)
Klei êmuh ksiêm mĭn: Ya gru knăl Klei Aê Diê Blŭ mâo? Si knhuah brei drei mâo hŏng Klei Aê Diê Blŭ?
Klei Aê Diê Blŭ amâo djŏ jing hră čih hrŏng ruah mơ̆ng lu hdruôm hră đưm đă ôh, ƀiădah “Jih jang klei čih hlăm hdruôm hră Klei Aê Diê Blŭ kbiă hriê mơ̆ng klei Aê Diê ƀhur êwa” (II Y‑Timôthê 3:16). Wăt tơdah čih mơ̆ng lu mnuih mdê mdê, hlăm mdê bi ênuk, hlăm klei boh mdê mdê, ƀiădah kluôm jih boh phŭn jing kbiă hriê mơ̆ng klei Aê Diê ƀhur êwa, atăt gai sơăi, čiăng bi êdah klei Ñu čiăng kơ anak mnuih, kyuanăn Klei Aê Diê Blŭ jing Klei Blŭ mơ̆ng Aê Diê.
Hêbrơ 4:12 hưn mdah dua mta phŭn mơ̆ng Klei Aê Diê Blŭ. Tal sa, jing “Klei Aê Diê Blŭ jing hdĭp leh anăn myang”. Kyuadah Aê Diê jing Pô hdĭp kyuanăn Klei Ñu Blŭ jing Klei Blŭ Hdĭp. Klei čih mơ̆ng anak mnuih srăng bi hlai mbĭt hŏng thŭn mlan. Mâo đa mta klei mĭn hing ang sơnăk sơưn hlăm ênuk anei ƀiădah arăng hngah amâo tŭ ư ôh hlăm ênuk mkăn. Klei Aê Diê Blŭ khut khat amâo snăn ôh, kyuadah “rơ̆k krô mnga dliu; ƀiădah klei Aê Diê drei blŭ srăng dôk nanao hlŏng lar.” (Y‑Êsai 40:8). Amâo djŏ knŏng jing Pô hdĭp, Khua Yang wăt ngă bruă leh anăn kiă kriê jih jang mnơ̆ng, kyuanăn Klei Ñu Blŭ jing “myang”, mblang jing ya klei Khua Yang lač sĭt nik srăng bi sĭt: “…msĕ snăn mơh klei Kâo blŭ kbiă mơ̆ng ƀăng êgei Kâo srăng jing: ñu amâo srăng wĭt kơ Kâo hơăi mang ôh, ƀiădah ñu srăng bi leh klei Kâo čiăng, leh anăn ñu srăng dưi bi leh bruă Kâo tiŏ nao ñu leh” (Y‑Êsai 55:11).
Tal dua, Klei Aê Diê Blŭ “ƀơ̆ng hĭn kơ sa ƀĕ đao gưm mâo dua nah mta, kma tơl blah ai mĭn hŏng mngăt, klang bi kkuh hŏng dlô, ksiêm klei mĭn leh anăn klei ai tiê čiăng”. Msĕ si sa čô aê êa drao mbliah mă klei ruă, Klei Aê Diê Blŭ mbliah djăp mta mnơ̆ng hlăm lam ai tiê mnuih, mtrang mngač klei sĭt nik truh hlăm anôk mmăt tĭt. Anak mnuih dưi yơh bi hgăm ai tiê diñu hŏng ƀô̆ mta, hŏng kdrăp mdê mdê, ƀiădah tlă anăp hŏng Klei Aê Diê Blŭ “jih jang mnơ̆ng pŏk leh anăn bi êdah leh” (Hêbrơ 4:13).
Drei mĭndah drei răk dlăng Klei Aê Diê Blŭ, ƀiădah sĭt klă Klei Aê Diê Blŭ yơh “răk dlăng” drei, mblang jing Klei Aê Diê Blŭ pŏk mdah kơ drei ƀuh mnuih sĭt drei hlăm klei mngač klei sĭt nik. Klei Aê Diê Blŭ kma hlăm klei bi mĭn soh wê, klei bi mĭn čhŏ mrŏ, hlăm knuih mgao hưn ktưn, leh anăn wăt hlăm ai tiê khăng. Kyuanăn, brei grăp čô drei thâo mpŭ bi myuôm Klei Aê Diê Blŭ ti dlông hĭn. Brei Klei Aê Diê Blŭ jing klei ktang myang dlông hĭn kơ klei hdĭp, hlăm djăp mta klei čuăn ruah leh anăn hnơ̆ng čuăn kơ klei hdĭp drei. Brei drei răk dlăng, hriăm, djă pioh, leh anăn ksiêm mĭn Klei Aê Diê Blŭ grăp hruê. Duah kơ drei mnĭt mmông leh anăn sa anôk bi kčah pioh dôk mbĭt hŏng Klei Aê Diê Blŭ. Brei drei đăo, gưt ngă hlue si Klei Aê Diê Blŭ, mă yua hlăm klei hdĭp. Tơdah Klei Aê Diê Blŭ ktrâo ya klei soh wê drei, brei drei mjưh êjai leh anăn kmhal klei soh hŏng Khua Yang mtam, akâo kơ Ñu brei klei myang čiăng kơ drei dưi bi mlih leh anăn dưi jing năng hŏng Klei Ñu Blŭ.
Hruê anei, si ai tiê drei pŏk mdah ti anăp klei mngač Klei Aê Diê Blŭ mtrang?
Wah lač: Ơ Khua Yang, bi mni kơ Ih brei kơ kâo klei Ih Blŭ. Akâo Ih đru kâo thâo khăp kơ Klei Aê Diê Blŭ leh anăn sĭt suôr gưt ngă hlue klei sĭt nik. Akâo Klei Ih Blŭ bi mlih kâo čiăng kơ grăp hruê kâo dưi jing msĕ si Khua Yang hĭn.
Dlăng Klei Aê Diê Blŭ hlăm tlâo thŭn: Y‑Yêrêmi 32:26–33:9
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
