Henplais 4:12-13
Nqe cim:
“Rau qhov Vajtswv tus uas muaj sia nyob, Nws tej lus tseemceeb thiab muaj kuab kawg li. Tej lus ntawd ntse dua rab ntaj ob sab ntse, nkaug mus txog nruab plab nruab plawv nruab nqaij nruab txha. Tej lus ntawd paub tej uas neeg xav thiab paub neeg lub siab huv tibsi.” (Henplais 4:12).
Lus nug rau sawvdaws xav:
- Vajtswv Txojlus tseemceeb li cas?
- Peb cheemtsum muaj cwjpwm zoo li cas rau Vajtswv Txojlus?
Phau Vajluskub tsis yog phau ntawv sau tej ntaub ntawv qub thaum ub, tiamsis “Vajtswv Txojlus txhua zaj puavleej yog Vajtswv tshoov neeg lub siab kom neeg sau.” (II-Timautes 3:16). Txawm yog muaj ntau tus tibneeg sau, lawv nyias nyob nyias ib ntu sijhawm, kev ua neej sib txawv los tagnrho tej lus hauv phau Vajluskub puavleej yog Vajtswv tshoov, qhia sau raws li Nws lub siab nyiam, yog li Phau Vajluskub yog Vajtswv Txojlus.
Henplais 4:12 qhia paub ob yam tseemceeb ntawm Vajtswv Txojlus. Tim ib, yog “muaj sia, muaj kuab kawg li”. Vim Vajtswv yog tus muaj sia nyob, yog li Nws tej lus yog lus muaj sia. Tej lus uas neeg sau ploj zuj zus raws lub caij nyoog. Muaj tej lub tswvyim xav tawm muaj koob nto npe heev nyob rau tiam no, tiamsis raug tawmtsam thiab tsis lees yuav nyob lwm ntu caij nyoog. Vajtswv Txojlus tsis zoo li ntawd, rau qhov “tej nroj yeej txawj qhuav thiab tej paj yeej txawj zeeg; tiamsis peb tus Vajtswv Txojlus nyob mus ibtxhis li.” (Yaxayas 40:8). Tsis yog tus muaj siab nyob xwb, tus Tswv tseem yog tus ua haujlwm thiab tswj tuav txhua yam, yog li ntawd Nws Txojlus yog “lus muaj kuab”, txhais tau hais tias tej lus uas tus Tswv hais yeej muaj tiav: “Tej lus uas kuv hais tawm lawm zoo ib yam li ntawd ntag; tej lus ntawd yuav tsis rov qab los cuag kuv dawb do ib zaug li, tiamsis yuav tawg paj txi txiv raws kuv xav tseg lawm, kuv tej lus yuav ua txhua yam uas kuv tso nws mus ua.” (Yaxayas 55:11).
Tim ob, Vajtswv Txojlus “ntse dua rab ntaj ob sab ntse, nkaug mus txog nruab plab nruab plawv nruab nqaij nruab txha. Tej lus ntawd paub tej uas neeg xav thiab paub neeg lub siab huv tibsi.” Zoo ib yam li tus kws tshuaj phua mob, Vajtswv Txojlus phua tagnrho txhua yam hauv tibneeg lub siab, qhov tseeb ci mus txog tej chaw tsaus ntuj nti. Tibneeg yuav siv zog zais npaum li cas hauv siab los thaum sawv ntawm tus Tswv Txojlus ces “Ib puas tsav yam…Vajtswv yeej pom huv tibsi.” (Henplais 4:13).
Peb xav hais tias yus nyeem Vajtswv Txojlus no, tiamsis qhov tseeb tiag yog Vajtswv Txojlus “nyeem” peb, txhais tau hais tias Vajtswv Txojlus qhia paub tagnrho peb tus neeg raws li qhov tseeb. Vajtswv Txojlus paub tej uas peb lub siab xav yuam kev, tsis dawbhuv, tus cwjpwm tsis mloog lus, thiab lub siab tawv. Yog li ntawd, peb txhua tus cia li saib Vajtswv Txojlus kom tseemceeb rau peb lub neej, cia Nws Txojlus qhia peb ua neej. Cia li nyeem, kawm, cim nco, thiab xav txog tus Tswv Txojlus txhua hnub. Nrhiav ib lub sijhawm thiab ib qhov chaw tshwjxeeb rau yus tus kheej kawm Vajtswv Txojlus. Cia li ntseeg, ua raws li Vajtswv Txojlus qhia peb ua neej. Thaum Vajtswv Txojlus qhia tej uas peb ua tsis yog, cia li nres thiab lees txim rau tus Tswv, thov Nws pub hwjchim kom peb hloov tau raws li Nws Txojlus qhia.
Thov Vajtswv,
Tus Tswv, ua tsaug Koj pub Koj Txojlus rau nyuam yaus. Thov Koj pab kom nyuam yaus nyiam Koj Txojlus thiab ncaj ncees ua raws li. Yim hnub nyuam yaus yim ua tau zoo li Koj ua. Amees.
Hnub no, Vajtswv Txojlus tabtom qhia peb zoo li cas?
Nyeem Vajluskub hauv peb lub xyoos: Yelemis 32:26-33:9
Kênh Youtube BHKTHN:
