I Kôrintô 1:17-31
“Lu bơngai wă hiong răm, lu sư lăng tơdrong bơ̆n bơtho gah tơdrong Yêsu Krist lôch tơ ‘long pơglang, lu sư lăng dang tơdrong kơtul đĕch. Mă-lei gah bơ̆n, bơ̆n băt tơpă tơdrong Yêsu lôch tơ ‘long pơglang kăl dêh, noh tơdrong mơsêh mơyang ‘Bok Kei-Dei pơklaih bơ̆n.” (I Kôrintô 1: 18)
Nơ̆r jet tơchĕng pơwao:
– Yua kơ kiơ lu bơngai lui Kôrintô ‘maih chă tơdrong ‘bơ̆r đon hơgei păng băt kơ tơdrong pơma trŏ glăi?
– ‘Bok Pôl tơlĕch tơdrong phara ayơ wă pơma tơdrong tơm tơdrong dŏng pơklaih?
– Bơ̆n rơih iŏk kiơ̆ tơdrong gơh hơgei Kră Yang dah tơ ala teh ‘nâu?
Kôrintô jơ̆ pơlei tih mơdrŏng gah dêh Achai, đei ‘bơm lăm tơdrong juăt Grĕk thoi noh đei ‘bơ̆r đon hơgei păng hlôh băt lăng gĭt tơpă. Lu bơngai mă pơma ling lang tơchĕng dêh wă kơ ‘bơ̆r pơma gơh hơgei thoi tơdrong hlĭch wă pơhlŭ kơ bơngai mơ̆ng. Đei yua noh tơdrong bơtho ưh kơ gĭt ôh na gĭt dêh kơ tơdrong gơh hơgei tih, gơh chă pơhlŭ, gơh roi tơbăt. Arih wơ̆ ‘lŏ lăm tơdrong juăt thoi noh, lu bơngai lui Kôrintô oei lăng ‘moi kiơ̆ kơ tơdrong lui arih so sơ̆. Hăm lơ bơngai, tơplih kơ tơdrong chơchă ‘long pơglang ‘Bok Krist, le na sư chă “tơdrong hơgei” dah mă ‘bơ̆r đon kư̆m thoi băt tơdrong trŏ glăI lăm chăl ‘nâu (trong 17-21). ‘Nâu bơih tơm rơh kơ tơdrong lu bơngai lui tơ Kôrintô tơklah băl khul.
‘Bơ̆t tơdrong anat lu bơngai lui Kôrintô thoi noh ‘bok Pôl pơma kơ tơdrong phara lăm tơdrong ‘long pơglang hăm tơdrong bơtho lăng nhen “hơgei” păng lăp trŏ kiơ̆ kơ kon bơngai lăng; păng tơdrong phara lăm tơdrong “lu bơngai wă hiong răm” păng “lu bơngai gơh klaih” chơchă. Tơdrong bơtho gah ‘long pơglang jơ̆ tơdrong tơm kăl kơ bơngai lui, jơ̆ tơm tơdrong gĭt kăl băt hơđăl bơ̆n jơ̆ bu, na đe “lu bơngai wă hiong răm” lu sư lăng dang tơdrong “kơtul đĕch”. Lu sư băt kơ ‘Bok Kei-Dei kiơ̆ kơ “tơdrong hơgei kơdih”. Pơma hơđăl hloh, bơngai Juđa ‘maih ‘bôh tơdrong mơsêh na lu bơngai Grĕk, lu sư lui kiơ̆ kơ tơdrong đe bơtho hơgei (trong 22). Mă khan thoi ei ră, ‘long pơglang bơih “’Bok Kei-Dei mơsêh mơyang tơpă” wă dŏng pơklaih bơ̆n (trong 18, 24).
Arih lăm teh đak lăng kơ tơdrong đei ‘băng kâp, hŏk jrŭ kư̆m gơh pơm kơ lơ bơngai hiơ̆k dêh kơ tơdrong pơm tơ’bôh gah ‘nguaih hloh kơ tơdrong bơtho, đơ̆ng noh jing đei tơdrong pơang păng tơklah băl. Phŏ phŏ lơ wơ̆t bơ̆n ‘maih mơ̆ng lu bơngai gơh roi “pơm kơ bơ̆n mơ̆ng hiôk” hloh kơ tơdrong hiơ̆k kơ tơdrong lu sư bơtho noh Tơdrong ‘Nao ‘Lơ̆ng tơpă dah hơlĕnh. ‘Bok Pôl tơbăt tơdrong hơgei kiơ̆ kơ kon bơngai tơplơ̆ hăm tơdrong hơgei đơ̆ng ‘Bok Kei-Dei. Tơdrong hơgei đơ̆ng Kră Yang đe lăng khan kơtul mălei Kră Yang rơih wă pơm mơlâu kơ lu bơngai hơgei kiơ̆ kơ kon bơngai, yua kơ tơdrong hơgei kiơ̆ kơ kon bơngai ưh kơ đei gơh dŏng bu ôh, lăp minh tơdrong lui kơ Kră Yang đĕch, păng thoi noh, ưh kơ đei bu gơh pơư tơdrong kơdih. Apinh Kră Yang tơgŭm kơ bơ̆n wă kiơ̆ tơdrong hơgei ‘Bok Kei-Dei, lăng ‘bôh ‘long pơglang ‘Bok Krist jơ̆ tơm tơdrong lui păng tơdrong dŏng pơklaih wă yak kiơ̆ Kră Yang đĭ chăl arih.
Ơ Kră Yang, apinh Ih tơgŭm inh ‘nĕ kơ druh kiơ̆ tơdrong hơgei lăm chăl ‘nâu na wă kiơ̆ tơdrong hơgei Kră Yang mă khan bơngai ala teh khan kơtul mălei inh đei iŏk tơdrong arih ling lang đơ̆ng ‘Bok Kei-Dei. Krao khan yua anăn Kră Yang Yêsu Krist, Amen.
Pơm thoi yơ wă tơ’blŏk ăn kơdih akâu năm kiơ̆ tơdrong hơgei Kră Yang?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 49
Kênh Youtube BHKTHN:
