Klei Aê Diê Blŭ: I Kôrantô 1:17-31
Êlan kliăng: “Kyuadah klei mtô kơ kyâo bi kal jing klei khŏ kơ phung dôk rai luč, ƀiădah ñu jing klei myang Aê Diê kơ phung drei Aê Diê dôk bi mtlaih” (I Kôrantô 1:18)
Klei êmuh ksiêm mĭn: Ya ngă phung đăo Kôrantô khăp duah klei thâo mĭn, thâo klei bhiăn leh anăn thâo bi tăng? Khua ƀĭng kna Y-Pôl lač si klei mdê čiăng mñă kơ phŭn agha kơ klei bi mtlaih? Drei ruah klei thâo mĭn Aê Diê amâodah lăn ala anei?
Kôrantô jing ƀuôn sang êa ksĭ mdrŏng hlăm čar Akai, hmăi dhar kreh Grĕk kyua anăn klei thâo bi tăng leh anăn klei thâo săng mâo dlăng myuôm. Phung mtô mblang kƀĭn yua raih snăk klei bhiăn bi tăng msĕ si klei thâo mă ai phung dôk hmư̆. Boh jhat jing boh phŭn klei mtô amâo yuôm bhăn ôh ƀiădah knŏng mđing kơ klei mblang myang, klei thâo mă ai, klei blŭ. Hriê kơ prŏng hlăm sa dhar kreh snăn, phung đăo ti Kôrantô ƀiă lu ăt mâo lu klei ksiêm dlăng hđăp pô hlăm klei đăo kơ Krist. Hŏng lu mnuih, hrô kơ duah kyâo bi kal Krist, snăn diñu duah “klei thâo mĭn” amâodah klei thâo blŭ ăt msĕ klei thâo bi tăng lăn ala anei (êlan 17-21). Anei jing phŭn agha kơ bruă phung đăo ti Kôrantô bi kah mbha êpul.
Dôk ti anăp klei mâo mơ̆ng phung đăo Kôrantô snăn, Khua ƀĭng kna Y-Pôl lač kơ klei mdê plah wah klei mtô kơ kyâo bi kal hŏng klei mtô msĕ si jing “thâo mĭn” leh anăn djŏ guôp hlue si klei dlăng lăn ala anei; leh anăn klei mdê plah wah klei “phung dôk rai luč” leh anăn “phung drei Aê Diê dôk bi mtlaih” tui duah. Bruă mtô kơ kyâo bi kal hlăk jing boh phŭn kơ klei đăo kơ Krist, jing mta phŭn bi mklă hlei drei jing, snăn lŏ mâo “phung dôk rai luč” dlăng jing “khŏ”. Diñu thâo kral Aê Diê mơ̆ng “klei thâo mĭn pô”, klă klơ̆ng hĭn, phung Yuđa mâo klei bi knăl akâo klei myang, bi phung Grĕk duah klei thâo săng (êlan 22). Khădah snăn, kyâo bi kal yơh jing “klei myang leh anăn klei thâo mĭn Aê Diê” čiăng bi mtlaih drei (êlan 18, 24).
Hdĭp ti krah lăn ala ksiêm dlăng hŏng hră bi mklă, klei thâo săng ăt srăng ngă kơ lu mnuih mđing kơ hdră hĭn kơ boh phŭn, mơ̆ng anăn mâo klei ngă mgao leh anăn bi kah mbha. Lu blư̆ drei khăp hmư̆ phung mtô mâo klei thâo “ba klei mđĭ ai” hĭn kơ mđing kơ klei mtô digơ̆ mtô jing Klei Mrâo Mrang Jăk sĭt amâodah soh.
Khua ƀĭng kna Y-Pôl brei ƀuh klei thâo mĭn hlue si kđeh mklăk hŏng klei thâo mĭn Aê Diê. Klei thâo mĭn Aê Diê lăn ala dlăng jing khŏ ƀiădah Aê Diê ruah leh čiăng bi hêñ phung thâo mĭn hlue si lăn ala anei, kyua klei thâo mĭn hlue si kđeh asăr amâo dưi bi mtlaih hlei pô ôh, knŏng hjăn klei đăo hlăm Khua Yang, leh anăn snăn, amâo mâo ôh hlei pô dưi hưn mdah bruă pô ngă leh. Akâo kơ Khua Yang đru drei gĭr tui hlue klei thâo mĭn Aê Diê, dlăng kyâo bi kal Yang Krist jing kmeh gơ̆ng kơ klei đăo leh anăn klei bi mtlaih čiăng êbat tui hlue Khua Yang jih klei hdĭp.
Si ngă čiăng mñă kơ drei pô êbat hlue si klei thâo mĭn Aê Diê?
Wah lač: Ơ Khua Yang, akâo kơ Ih đru kâo amâo êran hlue si klei thâo mĭn klei hdĭp anei ôh ƀiădah gĭr hlue si klei thâo mĭn Aê Diê wăt tơdah mnuih lăn ala lač jing khŏ, ƀiădah kâo mâo klei hdĭp Aê Diê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 49
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
