Klei Aê Diê Blŭ: Klei Mphŭn Dơ̆ng 3:15, 20-24
Êlan kliăng:“Kâo srăng mjing klei bi roh ŏng hŏng mniê anăn, wăt klei bi roh phung anak čô ŏng hŏng phung anak čô ñu; gơ̆ srăng bi êka boh kŏ ŏng, leh anăn ŏng srăng bi êka kđul gơ̆” (Klei Mphŭn Dơ̆ng 3:15)
Klei êmuh ksiêm mĭn: Klei Aê Diê ƀuăn kơ klei anak čô mniê srăng juă bi êka boh kŏ ala ya čiăng lač? Hlăm klei bi kmhal kơ klei soh mnuih srăng tŭ, ya Aê Diê ngă leh kơ digơ̆? Si ngă mnuih mâo klei čang hmăng?
Êjai hưn klei bi kmhal kơ klei soh, Aê Diê lač kơ Satan mơ̆ng phung anak čô mniê anăn srăng mâo sa čô mnuih juă “bi êka boh kŏ” ala (êlan 15), čiăng lač pô anăn srăng bi blah dưi hŏng Satan. Anei jing klei ƀuăn yuôm bhăn êdimima, bi êdah kơ Aê Diê ăt khăp kơ mnuih. Pô bi mtlaih srăng bi rai klei dưi yang jhat čiăng kơ mnuih lŏ dưi ngă klei bi mguôp hŏng Aê Diê. Anei yơh jing klei hưn êlâo tal êlâo hĭn kơ Khua Yang Yêsu hlăm hdruôm hră Klei Aê Diê Blŭ, Pô srăng bi rai klei myang Satan tơdah Ñu djiê ti kyâo bi kal leh anăn kbiă lŏ hdĭp.
Amâo djŏ Aê Diê knŏng ƀuăn srăng brei sa čô Pô Bi Mtlaih ôh, ƀiădah wăt Ñu ngă leh sa mta bruă yuôm bhăn mơh, anăn jing: “Khua Yang Aê Diê ngă brei kơ Y-Ađam leh anăn kơ mô̆ gơ̆ ao klĭt, leh anăn bi hơô digơ̆” (êlan 21). Sa drei hlô mnơ̆ng tŭ klei djiê čiăng guôm hĕ klei soh leh anăn klei hêñ mnuih. Kơ êdei, hlăm phung Israel, grăp blư̆ ngă soh, diñu ba kơ phung khua ngă yang myơr brei mnơ̆ng ngă yang hdĭp čiăng guôm hĕ klei soh diñu. Leh anăn kdlưn hĭn jing ti kyâo bi kal, Êđai Biăp Jăk Aê Diê jing Yêsu Krist, tŭ leh klei arăng bi mdjiê bŏ hŏng klei ruă knap, čiăng jing mnơ̆ng ngă yang hdĭp “lăm hĕ klei soh lăn ala”.
Kyua ngă soh, Aê Diê suôt leh mnuih kbiă đuĕ mơ̆ng war djam Êđen anôk bŏ hŏng klei jăk mơak nao kơ anôk kdrăn tač, ƀiădah klei hdĭp mnuih amâo rai tuč hlăm klei luč klei čang hmăng ôh. Klei ƀuăn kơ Pô Bi Mtlaih jing klei čang hmăng prŏng hĭn, jing hdră êlan Aê Diê mkra leh čiăng bi mtlaih mnuih mơ̆ng klei soh. Aê Diê dưm phung dĭng buăl jăk “čiăng mgang êlan nao kơ ana kyâo klei hdĭp”, kyuanăn wăt tơdah anak mnuih ktưn mơai dưn, diñu pô kăn dưi mâo rei klei hdĭp hlŏng lar (êlan 24). Ƀiădah Aê Diê ƀuăn kơ hlei pô đăo kơ Yêsu Krist snei: “Jăk mơak yơh phung boh ao jhung diñu, čiăng kơ diñu mâo klei dưi ƀơ̆ng boh ana kyâo klei hdĭp, leh anăn dưi mŭt ti ƀăng jang ƀuôn anăn” (Klei Bi Êdah 22:14). Tơdah đăo kơ Khua Yang Yêsu, drei boh leh ao jhung drei hlăm êrah Êđai Biăp, Aê Diê brei leh kơ drei klei dưi – dưi nao kơ ana kyâo klei hdĭp. Čiăng snăk kơ grăp čô drei dôk kjăp hlăm klei đăo, dưi hŏng klei yang jhat mplư, čiăng kơ grăp hruê drei dưi bi knal klei jăk jĭn tơdah dôk hlăm Khua Yang, leh anăn hŏng hơ̆k dôk čang guôn hruê Khua Yang brei klei hdĭp hlŏng lar hlăm Ƀuôn Jăk Ñu.
Si ngă drei dôk čang hmăng kơ Pô Bi Mtlaih hĕ amâodah ăt dôk kram nanao hlăm klei luč klei čang hmăng kyua klei soh?
Wah lač: Ơ Khua Yang, kâo lač jăk kơ Ih kyuadah wăt tơdah mnuih ngă soh dưn, Ih ăt pŏk brei êlan čiăng kơ mnuih lŏ mâo klei bi grăng hŏng Ih. Bi mni kơ Ih, Ơ Khua Yang Yêsu, kyuadah Ih juă bi êka leh boh kŏ ala hđăp, leh anăn dưi leh hŏng klei myang Satan, čiăng kơ hŏng klei anăn kâo dưi mă tŭ klei hdĭp hlŏng lar tơdah đăo kơ Ih. Đru kâo hdĭp nanao hlăm klei čang hmăng guh kơang anei, leh anăn hưn Klei Mrâo Mrang Jăk kơ lu mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
