Klei Aê Diê Blŭ: Klei Bi Hriêng 3:28
Êlan kliăng: “Đăm lač ôh kơ pô riêng gah ih, “Nao leh anăn lŏ hriê bĕ, kâo srăng brei kơ ih mgi” tơdah ih mâo leh mnơ̆ng brei anăn.” (Klei Bi Hriêng 3:28)
Klei êmuh ksiêm mĭn: Ya klei soh čhuai mtao Salômôn ktrâo brei ƀuh tơdah drei čiăng đru mnuih mkăn? Si srăng jing tơdah klei đru mnuih mkăn êgao kơ klei dưi drei? Si drei ngă čiăng hdĭp djŏ hŏng klei mñă anei?
Tơdah sa čô mnuih mă tŭ klei pap Aê Diê brei, dưi mâo klei thâo săng mơ̆ng dlông, mâo klei thâo săng răng mgang, diñu srăng mă tŭ bruă klam hŏng phung mnuih riêng gah. Anak mnuih yang đar amâo dưi brei kơ mnuih mkăn ya klei diñu amâo mâo ôh, leh anăn mta klei diñu amâo mâo ôh jing klei khăp (I Y-Yôhan 4:7). Ƀiădah tơdah đăo leh kơ Khua Yang, mâo klei thâo săng, mâo klei Khua Yang bi mlih , snăn drei mâo klei dưi čiăng hdĭp klei hdĭp thâo khăp leh anăn thiê brei kơ mnuih mkăn.
Êlan Klei Bi Hriêng hruê anei brei ƀuh, drei ngă soh hdơ̆ng drei amâo knŏng kyua hngah ngă jăk kơ hdơ̆ng pô ôh, ƀiădah wăt kyua bi kdung hĕ ngă klei jăk. Bi kdung ăt jing sa hdră êlan hngah, leh anăn bi kdung srăng bi luč mmông găl ngă jăk kơ pô riêng gah. Khua Pô Mtô 3:6 brei thâo: “hlăk pioh mnơ̆ng, leh anăn hlăk hwiê hĕ mnơ̆ng anăn,”. Jih jang mnơ̆ng mâo hruê mmông kơ ñu sơăi. Tơdah drei bi kdung amâo “hwiê hĕ” djŏ mmông, snăn jih jang mnơ̆ng drei “hwiê hĕ” êdei kơnăn amâo lŏ tŭ yua ôh. Khua ƀĭng kna Y-Pôl mtô snei: “Snăn êjai hruê găl, brei drei ngă jăk kơ jih jang mnuih, boh nik nak kơ phung ayŏng adei hlăm klei đăo.” (Galati 6:10).
Mbĭt djiêô anăn, êlan Klei Bi Hriêng anei lŏ mtô snei mơh, drei amâo đru mnuih mkăn mnơ̆ng drei amâo mâo ôh. Drei hmiêt mkăp đru amâo bi kdung ôh “tơdah ih mâo leh mnơ̆ng brei anăn …”. Klei Bi Mguôp Mrâo mtô msĕ mơh: “Kyuadah tơdah mâo klei jăk čiăng ngă, Aê Diê tŭ tui si mnơ̆ng ih mâo, amâo djŏ ôh tui si mnơ̆ng ih amâo mâo” (II Kôrantô 8:12). Lu blư̆ drei hngah đru amâo djŏ kyua drei amâo mâo ôh “tơdah ih mâo leh mnơ̆ng brei anăn”, ƀiădah kyua drei bi mĭn mâo mơh ƀiădah ka djăp amâodah amâo tơl êbeh ôh pioh bi mbha, leh anăn lŏ bi mĭn snei: êla kâo mdrŏng, mâo lu êbeh, kâo srăng đru mnuih mkăn!
Phung đăo kơ Krist brei hdơr klei Khua Yang mtô snei, brei kâo đru mnuih dôk mâo klei čiăng đru kyuadah digơ̆ mâo klei dưi amâodah klei năng mă tŭ klei đru, leh anăn kyuadah jih jang mnơ̆ng Khua Yang brei kơ kâo kyua pioh ngă bruă anăn yơh. Klei bi hriăm anei amâo djŏ ôh knŏng hŏng klei blŭ, klei amâo sĭt. Drei amâo tuôm hdĭp msĕ snăn ôh tơl mâo klei ktang myang Khua Yang bi mlih drei, leh anăn tơl klei thâo mĭn Ñu brei drei gưt ngă leh anăn brei drei thâo kral klei sĭt nik anei! Drei dôk lui lăn ala soh jhat bi mjing hlăm drei klei mĭn hdĭp čuôt klih, leh anăn knŏng Klei Aê Diê Blŭ yơh dưi bi mlih klei thâo săng drei, dưm hlăm drei ai tiê klei mĭn mrâo, sa klei mĭn mrâo kơ klei hdĭp, čiăng kơ drei dưi hdĭp tui si Klei Blŭ Khua Yang mtô.
Drei mâo klei mñă brei đru kơ hlei pô? Ya klei drei čuăn ngă?
Wah lač: Ơ Khua Yang, brei kâo đĭ hriê kơ prŏng hlăm Khua Yang hĭn nanao grăp hruê, leh anăn đru kâo dưi bi êdah klei khăp kơ phung riêng gah kâo hŏng klei đru digơ̆ djŏ mmông leh anăn djŏ hŏng klei digơ̆ dôk kƀah. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
