Pơđơ̆k 22:24-25
Trong tơm: “’Nĕ pơm buăl juăt hăm bơngai khĕnh Păng kư̆m ‘nĕ kơ năm hơdai lu bơngai ‘bônh kơ blĕk.” (Pơđơ̆k 22:24)
Lu bơ̆n kư̆m lăng thim lăm Sơ̆p hla bơar tơm juăt kơ lăng mă kư̆m đei hơmet rai trŏ (Bản TT Hiệu Đính)
Nơ̆r jet tơchĕng pơwao:
– Pơtao Sôlômôn bơtho kon sư tơdrong kiơ păng yua kơ kiơ kon sư athei pơm keh?
– Lĕch yua đơ̆ng pơm buăl hăm bơngai kơnê̆ ‘noh kiơ?
– Pơm thoi yơ wă kơ lu bơ̆n băt oei sa mă kơchăng kơplah tơ’bơ̆p hăm bơngai ling lang ơh blĕk dai pơm kơnê̆?
Pơtao Sôlômôn tơlĕch nơ̆r tơtă ưh kơ ăn kon sư pơm buăl juăt hăm bơngai kơnê̆, mă tơm sư lu bơngai mă ling-lang ‘bônh kơ blĕk ơh, pơm kơnê̆, wă kơ wer weh đơ̆ng tơdrong krưp wă huay kơ pơm tơdrong kơnê̆ thoi lu sư. Nơ̆r “pơm buăl” lăm trong 24 wă khan “tơ’bưh kơjăp” dah “bơwei kơjăp” wă khan sư ‘bơm tơdrong hiơ̆k tơtăm dih băl. Bơngai mă ‘bônh kơ blĕk ơh dah bơngai khĕnh hơwĕng ‘maih pơm kơnê̆ dah wă khan lu bơngai ưh kơ kĕ pơgơ̆t jơhngơ̆m đĭ juăt bơih, ba truh tơdrong ưh pă băt tơdrong trŏ, glăi, ưh pă băt pơgơ̆t jơhngơ̆m ngăl ‘bônh kơ blĕk ơh, ba truh tơdrong ưh pă gơh gơ̆t đơ̆ng ‘bơ̆r pơma truh tơdrong đei pơm pă ‘blep. Kơplah blĕk ơh, tơdrong tơchĕng đĭ pă băt, ưh pă băt tơchĕng trŏ glăi, gô ba ăn tơdrong glăi đơ̆ng ‘bơ̆r pơma truh tơdrong đei pơm.
Nơ̆r Pơtao Sôlômôn athei (tơtă) đei tơlĕch athei pơm hloi. Wă tơgŭm kon sư wer weh păng kơchăng mă tơpă kơplah pơm buăl hăm bơngai ‘bônh kơ blĕk, lu bơngai khĕnh hơwĕng, yua kơ kơnh kon sư pŭ iŏk ‘bơ̆t dei hloi dah gô đơ̆ng rŏng. Lu sư gô dui ba lu bơngai mă đei pơm buăl jing hơnat hơnot rai lŭch hloh lăm chăl arih. Yua kơ lu bơngai kơnê̆ đĭ juăt ngăl pơgŏ pơđep năm kiơ̆, athei pơm hloi dôm tơdrong yoch kơnê̆ rok thoi lu sư. ‘Bok Pôl đei tơbăt, “buăl juăt kơnê̆ pơhư tơdrong juăt kơ pơm ‘lơ̆ng.” (II Kôrintô 15:33). Lĕch yua krưp dêh “bơhngol ‘leh ‘năk jing răm rai” (trong 25) lu sem bri ‘leh hơđong ưh kơ băt lê̆ adrol. Kư̆m thoi noh mơ̆n, kơplah pơm buăl hăm lu bơngai ‘bônh kơ blĕk, khĕnh hơwĕng, ih gô ‘bơm truh tơdrong mă krưp dêh adrol kơ lu bơ̆n ưh kơ băt lê̆ tơdrong noh. Păng mă krê hơmơt dêh ‘noh kơplah ‘leh kap bơih, hơnat kơ pleh hlôi đơ̆ng lôch.
Yakơ bơngai chih kơtho khan: “Ơ lu ‘nhŏng oh mă inh ‘mem kơeng, bơ̆n băt kơ thoi noh bơih, na đĭ-đăng kơ bơ̆n athei adrin mơ̆ng tơdrong đe bơtho, mơ̆ng mă tơpă, ‘nĕ hăt pơma hil kơ đe bơtho. Bơngai bu hil kơ đe, bơngai noh ưh kơ băt pơm ‘lơ̆ng tơpăt thoi ‘Bok Kei-Dei wă ôh. Thoi noh na bơ̆n gơh klaih đơ̆ng tơdrong yoch.” (Yakơ 1:19-21). Krao khan apinh Kră Yang ăn kơ bơ̆n băt tơdrong kăl lăm tơdrong kĕ jĕ pơgơ̆t tơdrong mă bơ̆n juăt kơ pơm. ‘Nĕ kơ gơnang kơdih na mă arih sa kiơ̆ kơ tơdrong gơh hơgei bơ̆n kơdih mă-lei đĭ jơhngơ̆m chu yom pơhrăm păng mơ̆ng pơm kiơ̆ Nơ̆r Kră Yang, pơm ‘lơ̆ng tơpăt kiơ̆ thoi Kră Yang bơtho, tơwih măt gah bơhngol bơ̆n lăng tơ tơdrong arih ling-lang. Yua đơ̆ng Nơ̆r Kră Yang pơchrang hơdah, bơ̆n băt kơchăng lăm tơdrong arih sa pơma dơnuh bơ̆n gơh tơ’bưh hăm bơngai ‘bônh kơ ơh blĕk, khĕnh hơwĕng wă kơ bơ̆n huay kơ ‘leh kap hơđong wă pơrăm bơhngol bơ̆n.
Lu bơ̆n hăm weh wer đơ̆ng lu bơngai juăt kơ blĕk ơh dah khĕnh hơwĕng ưh?
Ơ Kră Yang, inh bơnê kơ Ih đei ăn Nơ̆r Ih kơ inh arih hơđơ̆ng, hiôk chơt lăp đon. Apinh tơgŭm đei jơhngơ̆m iơ̆m dim gơh găt wă pơm kiơ̆ Nơ̆r Ih na inh băt păng wer weh đơ̆ng trong lu bơngai kơnê̆, krao khan yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 15
Kênh Youtube BHKTHN:
