Klei Aê Diê Blŭ: Klei Mphŭn Dơ̆ng 8:1-19
Êlan kliăng: “Snăn Y-Nôê kbiă mbĭt hŏng phung anak êkei ñu, mô̆ ñu, leh anăn phung mtâo mniê ñu” (Klei Mphŭn Dơ̆ng 8:18)
Klei êmuh ksiêm mĭn: Si klei yuôm bhăn bruă “Aê Diê hdơr kơ Y-Nôê” (êlan 1)? Ya bruă Y-Nôê ngă leh hlăm wưng dôk guôn êa hrŏ? Ya klei drei hriăm kơ bruă Y-Nôê leh anăn gŏ sang kbiă mơ̆ng kŭmpăn?
Hlăk êjai dôk hlăm kŭmpăn čiăng ñĕ kơ klei êa lip, snăn “Aê Diê hdơr kơ Y-Nôê leh anăn jih jang hlô dliê leh anăn hlô mnơ̆ng rông dôk mbĭt hŏng ñu hlăm kŭmpăn” (êlan 1). Wưng anei êa hrŏ kluôm rŏng lăn sui leh. Klei “Aê Diê hdơr kơ Y-Nôê” amâo djŏ Ñu wơr hĕ ôh, ƀiădah lač kơ wưng Ñu mprăp ngă bruă čiăng bi mtlaih Y-Nôê leh anăn gŏ sang ñu. Anăn ăt jing knuih Aê Diê leh anăn klei Ñu ngă hlăm jih hƀuê ênuk. Hlăk H’Račel, mô̆ Y-Yakôp amâo mâo anak, Aê Diê bi êdah klei pap: “Leh anăn Aê Diê hdơr kơ H’Račel. Ñu hmư̆ gơ̆ leh anăn brei gơ̆ dưi ba tian”(Klei Mphŭn Dơ̆ng 30:22). Hlăk phung ƀuôn sang Israel čŏk hia hlăm klei jing hlŭn, “Aê Diê hmư̆ klei diñu krao, leh anăn Aê Diê hdơr klei ñu bi mguôp hŏng Y-Abraham, Y-Isăk, leh anăn Y-Yakôp” (Klei Kbiă 2:24). Aê Diê jing Pô sĭt suôr, Ñu amâo tuôm wơr ôh klei ƀuăn, leh anăn Ñu ngă nanao bruă djŏ wưng čiăng bi leh hdră Ñu.
Hlăm wưng Khua Yang lŏ hdơr snăn Y-Nôê dôk kriêp čang guôn. Klei ñu čang guôn amâo djŏ jing amâo ngă ya bruă ôh. Ñu ksiêm dlăng boh klei hlăm bruă phưi čĭm ak leh anăn mgăm kbiă čiăng dlăng lăn thu leh amâodah ka (êlan 6-9). Ƀiădah amâo djŏ ñu čŏng ngă hlue si klei pô mĭn ôh. Leh mgăm amâo lŏ phiơr wĭt, jing thâo leh ñu ƀuh leh anôk dôk ti lăn thu krô, Y-Nôê ăt kăn čŏng kbiă mơ̆ng kŭmpăn rei ƀiădah dôk guôn klei Khua Yang čiăng (êlan 12).
Leh hmư̆ klei Aê Diê lač, “Snăn Y-Nôê kbiă mbĭt hŏng phung anak êkei ñu, mô̆ ñu, leh anăn phung mtâo mniê ñu” (êlan 18). Hlăm wưng Aê Diê, jih gŏ sang Y-Nôê kbiă mơ̆ng kŭmpăn hlăk êa lip khuôt leh ti lăn ala. Gưl êa lip lač kơ klei Aê Diê bi kmhal, kŭm păn jing anôk dôk kđap. Ƀiădah hlăm kŭmpăn knŏng jing êjai, kyua anôk dôk sui leh anăn năng čang guôn anăn jing lăn thu. Ăt msĕ snăn mơh, wăt tơdah drei, phung đăo kơ Khua Yang Yêsu, dưi “đĭ leh hlăm kŭmpăn”, amâo lŏ huĭ hyưt kơ klei bi kmhal kơ klei soh ôh, leh anăn mâo Aê Diê brei klei ktang čiăng dưi hŏng klei myang klei soh, ƀiădah klei drei čang guôn amâo djŏ jing hdĭp nanao ti lăn ala anei ôh ƀiădah jing wưng amâo lŏ mâo ôh klei soh. Anăn jing wưng drei dưi bi mlih asei mlei leh anăn dôk hŏng Khua Yang lă lar hlăm Ƀuôn ala mtao guh kơang Ñu.
Drei dôk čang guôn wưng “kbiă mơ̆ng kŭmpăn” čiăng nao hlăm anôk guh kơang lă lar, amâo lŏ mâo klei soh mơ̆?
Wah lač: Ơ Khua Yang, kâo bi mni lač jăk kơ Ih bi mtlaih leh kâo mơ̆ng klei bi kmhal kơ klei soh leh kâo đăo kơ Khua Yang Yêsu. Aê Diê ăt brei klei ktang kơ kâo čiăng dưi hŏng klei myang klei soh hlăm klei hdĭp grăp hruê. Ai tiê kâo čang hmang wưng kâo dưi bi tuôm hŏng Ih leh anăn dôk hŏng Ih lă lar, anôk amâo lŏ mâo klei soh ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
