Tơdrong Pơđơ̆k 25:21-22; Rôm 12:17-20
“Yua kơ thoi noh na bơ̆n huay kơ kăl pơm kơnê̆ kơ đe. Lăm hla bơar ‘Bok Kei-Dei kư̆m đei khan dơ̆ng thoi âu: Bu pơm kơnê̆ kơ bơ̆n, kơnh pơgê bơ̆n ‘bôh sư pơngot dah kơ’bah tơmam kiơ, bơ̆n rai tơgŭm bơngai noh; dah sư ol kơ đak bơ̆n ăn nhă. Dah bơ̆n pơm kơ sư thoi noh, noh sư huay pơm kơnê̆ kơ bơ̆n, sư wih mơlâu kơ bơ̆n dơ̆ng.” (Rôm 12:20-21)
Nơ̆r jet tơchĕng pơwao:
– Nơ̆r “iŏk ngar ŭnh dan ‘bơ̆t kơ̆l” noh đei tơblang thoi yơ?
– Yua kơ kiơ lu kon ‘Bok Kei-Dei athei iŏk tơdrong ‘lơ̆ng blah tơdrong kơ nê̆?
– Lu bơ̆n kăl kơ pơm tơdrong kiơ hăm bơngai mă ayăt kơ bơ̆n?
Lu kon ‘Bok Kei-Dei kăl kơ arih hăm jơhngơ̆m đon ‘lơ̆ng, iŏk tơdrong ‘lơ̆ng blah tơdrong kơnê̆, mă khan hăm bơngai mă ayăt kơ bơ̆n. Tơdrong rup kơmĭl đơ̆ng pơtao Salômôn yua tơdrong pơtih gia mă khan bơngai ayăt pơngot, athei ăn đak nhă hăm tơdrong dan ngar ŭnh bơ̆t kơ̆l sư.
Nơ̆r đei pơma “ngar ŭnh dan ‘bơ̆t kơ̆l” đei tơblang ‘bar trong: Mă mônh: “ngar ŭnh” đei tơ’bôh “tơdrong jĭ pơmat mơlâu” mă đei ‘bơm yua kơ bơngai nai iŏk tơdrong ‘lơ̆ng pơm blah tơdrong kơnê̆ đêl sư pơm ‘noh. Tơdrong mơlâu bơngai pơm kơnê̆ noh jơ̆ ba ăn tơdrong tơbral tơdrong yoch. Mă ‘bar: “ngar ŭnh” wă khan tơdrong phak, ăn kơ lu bơngai mă ưh kơ wă tơbral tơdrong yoch, mă khan đei hơmet sơlam băl keh đang bơih mă lei sư ưh kơ tơplih. Lăm Sơ̆p Hla bơar Nơ̆r ‘Bok Kei-Dei pah ‘nao, ‘Bok Pôl đei chih iŏk dơ̆ng đơ̆ng Sơ̆p hla bơar Pơđơ̆k kŭm đei thim nơ̆r dơ̆ng: “nĕ kơ ăn jei tơdrong kơnê̆, mă lei athei iŏk tơdrong ‘lơ̆ng blah tơdrong kơnê̆” (Rôma 12:17-21). Tơdrong iŏk tơdrong ‘lơ̆ng blah tơdrong kơnê̆ noh jơ̆ lăp đon Kră Yang ‘Bok Kei-Dei yua kơ bơ̆n ăn kơ tơdrong pơm ‘mong đơ̆ng Kră Yang đĕch, Kră Yang gô pơm. Thoi noh kơplah arih iŏk tơdrong ‘lơ̆ng blah tơdrong kơnê̆, lu bơ̆n gô đei đơ̆ng Kră Yang apah (Pơđơ̆k 25:22).
Lu kon ‘Bok Kei-Dei ưh kơ gơh pơm ‘mong thoi đêl đe pơm kơnê̆ kơ bơ̆n mă lei kăl kơ pơm hăm tơdrong rơgoh, păng tơdrong ‘mêm đơ̆ng Kră Yang. Kră Yang Yêsu đei bơtho: “Mă-lei gah Inh bơtho iĕm thoi âu: Iĕm athei ‘mêm mơnat kơ lu bơngai mă pơm kơnê̆ kơ iĕm, krao khan apinh ‘Bok Kei-Dei tơgŭm sư, thoi noh na iĕm gơh jing kon ‘Bok Kei-Dei ‘Bă bơ̆n tơ plĕnh ti, yua kơ Sư kư̆m ‘mêm kơ lu bơngai noh, na Sư ăn măt ‘năr pơchrang hơdah kơ đĭ-đăng bơngai, mă bơngai ‘lơ̆ng mă bơngai kơnê̆. Sư ăn đak ‘mi lei-lăi mơ̆n ưh kơ ‘mêm kơ bu wă pơdê bu ôh.” (Mathiơ 5:44-45). Kră Yang Yêsu đei lôch tang bơ̆n tơ’long pơglang ưh kơ trŏ kơ pơm ‘mong ăn kơ bơ̆n đơ̆ng dôm tơdrong arih pơm kơnê̆ bơ̆n pơm dah bơ̆n arih ‘lơ̆ng tơpăt ôh, mă lei yua kơ tơdrong ‘mêm mơnat Sư ăn đĕch kơ lu bơ̆n. Tơdrong arih lu bơngai lui kăl kơ nhen thoi Kră Yang, arih ‘lơ̆ng rơgoh, ‘mêm mơnat. Apinh Kră Yang ăn kơ bơ̆n arih “iŏk tơdrong ‘lơ̆ng blah tơdrong kơnê̆” dah bơ̆n pơm tơdrong noh lei gô ba ăn kơ bơngai nai băt kơ tơdrong yoch lu sư đei pơm, lu sư gô tơbral păng gô năm tơ Kră Yang na đei tơdrong mơnat đơ̆ng Sư. Kră Yang ăn đak ‘mi kơ bơngai ‘lơ̆ng kŭm nhen thoi bơngai pơm kơnê̆, Kră Yang wă kơ đĭ đăng bơngai tơbral tơdrong yoch, wă kơ huei kơ ‘bơm tơdrong Sư wă phak ning mônh. Thoi noh, lu bơ̆n kăl kơ chơ̆n jơhngơ̆m, nĕ kơ lăng pơting hăm bơngai nai, dah đei tơdrong sơngon kơplah bơ̆n pơm ‘lơ̆ng kơ bơngai pơm kơnê̆ kơ bơ̆n. Lu bơ̆n gô đei tơmam hơpah đơ̆ng ‘Bok Kei-Dei. Athei chơ̆n jơhngơ̆m păng hơđơ̆ng.
Kơkuh bơnê kơ Ih Kră Yang, inh bơnê kơ Ih ‘Bă yua kơ Ih đei ‘mêm păng dŏng pơklaih inh. Pinh Ih ăn kơ inh mơ̆ng nơ̆r Ih bơtho, arih hiôk hơiă hăm bơngai nai, mă khan bơngai pơm kơnê̆ kơ inh. Apinh Ih tơgŭm inh rim năr wă kơnhen Ih rai hloh. Yua anăn Kră Yang Yêsu Krist. Amen
Lu bơ̆n hăm arih iŏk tơdrong ‘lơ̆ng blah tơdrong kơnê̆ ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Nhơ̆m Hmoi 5
Kênh Youtube BHKTHN:
