Galati 4:8-20
“Inh ‘maih ră mơ̆n oei hơdai păng iĕm dang ei, wă kơ gơh pơma dơnuh hăm iĕm. Inh đĭ sơleng kơ đon tơpă, ưh kơ băt pơm thoi yơ boih tơdrong iĕm dang ei.” (Galati 4:20)
Nơ̆r jet tơchĕng pơwao:
– Dôm tơdrong anat mă lu bơngai lui tơ Galati tŏk-bŏk oei tơwŏk ‘bơm noh tơdrong kiơ?
– ‘Bok Pôl pơma kơ lu sư dôm tơdrong ‘noh, sư pơma liơ,đơ̆ng lăm jơhngơ̆m sư đei na sư tơ’bôh tơ gah ‘nguaih thoi yơ?
– Sư tơ’bơ̆p hăm tơdrong kiơ yua kơ đơ̆ng sư pơma chrih kơ lu đe ei?
– Bơ̆n pơhrăm iŏk tơdrong kiơ đơ̆ng jơhngơ̆m ‘bok Pôl?
Kơthơ ‘bok Pôl chih âu pha ra kơ lu kơthơ nai mă đơ̆ng sư chih ngăl mơ̆n, lăm kơthơ nai nai sư chih noh, đang kơ sư jet gia, sư đei nơ̆r bơnê pơ-ư, lăm kơthơ sư chih ăn kơ lu bơngai Galati âu, sư pơma chrih kơ lu bơngai lui ei tơm măt hloi, kư̆m lơ ‘măng sư yua nơ̆r anat kơ mơ̆ng, nơ̆r arăng: “Ơ lu bơngai Galati, iĕm ưh kơ hlôh tơpă ii” dah “Lơ liơ iĕm ưh kơ hlôh tơdrong âu?” (Galati 3:1,3)
Yua kơ ‘noh na lơ bơngai tơchĕng khan ‘Bok Pôl bơngai ‘bơ̆r pơma arăng, khơ̆p khơ̆p kơ’bah kơ jơhngơ̆m‘mêm. Lei ră, Hla bơar ’Bok Kei-Dei năr ‘nâu tơ’bôh kơ bơ̆n nơ̆r ‘bơ̆r ‘bok Pôl pơma pha kơ đe tơchĕng noh. Sư đei jơhngơ̆m ‘mêm kơeng kơ lu bơngai lui tơ Galati tơpă.Sư dan sư lăm tơdrong jang bơngai mĕ, chu pŭ jĭ jăn lăm tơdrong tơpŭ kon hơ’lơ̆p (tr.19). ‘Bok Pôl đĭ jơhngơ̆m hiơ̆k ăn Khul lui bơngai tơmoi âu kơplah sư ‘bôh lu bơngai lui ei pơm kiơ̆ tơdrong juăt kon bơngai, wei răk năr, khei, bơyan, sơnăm thoi lu bơngai Juđê lui (tr.10). Sư kư̆m ưh kơ hơđơ̆ng jơhngơ̆m ưh kơ băt wă pơm thoi yơ kơplah sư ‘bôh lu đe ei lăp đon sơng sư, mă-lei lu bơngai lui noh ưh kơnăl kơ lu bơngai mă kiơ̆ khul tơdrong lui đe Juđê tŏk-bŏk oei chhôk lăp đon kơ lu sư “Lu bơngai mă juăt pơtuah iĕm thoi noh, lu sư lăp đon iĕm mơ̆n,mă-lei lu sư kuă kơ gŭm iĕm…” (tr.17-18) . ’Bok Pôl ‘blŏk đêl lu bơngai lui ei juăt kơ hiôk chơt sơng iŏk sư dang sơng iŏk linh jang ‘lơ̆ng ‘Bok Kei-Dei”, dang sơng iŏk Kră Yang Yêsu Krist” (tr.14), păng jơhngơ̆m sư sơ’ngon ‘bơ̆t mă sư jet tơdrong chơt hiôk noh hiong tơ yơ bơih (tr.15)! Mă loi, sư ling-lang krao lu bơngai lui noh “kon” (tr.19,20), păng sư kư̆m ưh kơ kơ, hrơ, ưh kơ ‘nhuen pơma roi tơdrong sư tŏk-bŏk oei sơleng kơ đon ưh kơ băt pơm liơ, hơmet liơ tơdrong lu sư pơm noh, păng tơdrong sư khŏm pơma tơdrăp kơ lu bơngai lui noh tơdrong mă sư ưh kơ wă dêh ră (tr.20)
Pang nai dơ̆ng,mă khan sư oei tơchĕng hiơ̆k, păng băt đêl sư pơma chrih kơ lu bơngai lui hăm ‘bơ̆r arăng phŏ kơnh pơm kơ lu bơngai lui ưh pă ‘mêm kơ sư bơih na tơwih kơ sư rŏng, lăng sư thoi bơngai ayăt.’Bok Pôl ưh kơ kơ hrơ, ưh kơ ‘nhuen ôh, sư pơma tơpăt hloi kơ tơdrong lui lu sư ưh kơ trŏ thoi yơ noh (tr.8-10,15-17, păng lăm Hla bơar ‘nâu mơ̆n lu chăl kơđeh adrol noh). ’Bok Pôl rơih iŏk pơma chrih tơpăt tơdrong glăi lu sư tơm măt lu sư hloi wă pơdơ̆ng tơiung tơdrong lui đe ei, sư ưh kơ ngăn hreh‘bơ̆t dei mă-lei oei wă roi sa pơma roi ‘bơm tơ nai ôh.
Phŏ kơnh bơ̆n pơma chrih tơpăt tơdrong glăi lu ‘nhŏng oh bơ̆n, lei na lu sư wer kơ bơ̆n, ưh pă lăng bơ̆n buăl sư bơih, na pơm kơ bơ̆n kơ, hrơ, ‘nhuen kơ chrih tơpăt tơdrong glăi lu bôl buăl bơ̆n. Tơplơ̆ kơ ‘noh, phŏ kơnh bơ̆n nuih pơ̆n đei nơ̆r pơma tơnôm tơgop tơpăt tơm măt bôl buăl bơ̆n mă-lei đơ̆ng jơhngơ̆m truh tơ tơlĕch nơ̆r pơma ‘nei bơ̆n kơ’bah kơ tơdrong ‘mêm, lei na kư̆m ưh kơ ba ăn tơdrong đei lơi yua ‘lơ̆ng mơ̆n. Hăm đei ’nhŏng oh ayơ mă bơ̆n kăl kơ pơma chrih tơpăt tơdrong glăi sư ưh?
Pơhrăm rok jơhngơ̆m ‘Bok Pôl, athei wang hiơ̆k ăn bơngai mă tơdrong arih đon lui tam mă ‘lơ̆ng trŏ pơm kơ bơ̆n anat kơ hơmet noh, bơ̆n athei chrih hơmet sư hăm jơhngơ̆m ‘mêm wă pơdơ̆ng tơiung pơlung tơgŭm dih băl lăm tơdrong lui.
Kơkuh kơ Ih Kră Yang,apinh tơgŭm inh iŏk đon ala mă lu ‘nhŏng oh bôl buăl chrih hơmet inh,lu sư chrih trŏ, chrih hăm jơhngơ̆m ‘mêm kơ inh,Ih tơgŭm inh chu mơ̆ng, drơ̆ng iŏk hơmet ming tơdrong arih đon lui. Inh kư̆m apinh Ih tơgŭm inh pơ̆n nuih kơ pơma tơpăt hăm jơhngơ̆m ‘mêm tơ’blŏk kơ lu ‘nhŏng oh inh kơplah lu sư đei pơm glăi tơdrong kiơ kiơ. Inh krao khan yua anăn Kră YangYêsu Krist, Amen!
Bơ̆n hăm tơpăt yua kơ jơhngơ̆m ‘mêm pơma chrih hơmet bôl buăl bơ̆n kơplah lu sư pơm glăi, arih ưh kơ ‘lơ̆ng?
Đŏk Sơ̆p Hlabơar ‘Bok Kei-Dei lăm pêng sơnăm Êsai 15-16
Kênh Youtube BHKTHN:
