Klei Aê Diê Blŭ: Y-Đaniel 8:13-27
Êlan kliăng: “Klei hgăm pioh kơ Yêhôwa Aê Diê drei; ƀiădah klei Ñu bi êdah leh pioh kơ drei leh anăn kơ phung anak drei nanao hlŏng lar, čiăng kơ drei dưi ngă jih jang klei blŭ hlăm klei bhiăn anei.” (Klei Mtô Mñă Klei Bhiăn 29:29).
Klei êmuh ksiêm mĭn: Si klei bi sĭt truh leh hlăm hƀuê ênuk mơ̆ng klei khua pô hưn êlâo Y-Đaniel bi ƀuh? Ya ngă Aê Diê bi êdah klei amra truh êdei anăp hŏng mnuih jing dŏ Ñu? Ƀuh klă Klei Aê Diê lač kơ hruê knhal tuč dôk bi sĭt, ya klei drei mĭn leh anăn si drei ngă?
Klei bi ƀuh hruê anei truh hlăk “thŭn tal tlâo ênuk mtao Belsasar kiă kriê” (Y-Đaniel 8:1), jing hlăk mtao Sirus mâo plah mă Mêdơ leh anăn bi lir mbĭt dua ƀuôn ala mtao. Êbeh 50 thŭn êdei kơ klei êpei ƀuh hlăm kdrêč 2 leh anăn dua thŭn êdei klei bi ƀuh čih hlăm kdrêč 7, gưl tal êlâo Aê Diê djĕ pŏk čhiăm guôm dŭm klei bi ƀuh anăn prŏng hĭn. Khua pô hưn êlâo Y-Đaniel rŭng răng “čiăng thâo klă”, čiăng “thâo săng” leh anăn “thâo ya klei srăng truh ti ênuk knhal tuč” (êlan 15-19), Aê Diê bi êdah klă mngač kơ ñu anăn dua boh ƀuôn ala mtao srăng kgŭ kdơ̆ng jing khua kiă kriê lăn ala: mtao čar Mêdơ – Persơ, leh anăn mtao čar Grĕk (êlan 20-21).
Klei Mêdơ – Persơ kiă kriê jih lăn ala dôk truh sĭt, snăn klei bi sĭt klei hưn êlâo anei amâo jing klei bi kngăr ôh, ƀiădah bi klei čar Grek kiă kriê jih lăn ala tơl truh kơ dua gưl ênuk êdei kơh bi sĭt, anei jing klei bi kngăr êdi hlăm klei bi êdah anei! Aê Diê hưn êlâo leh djŏ sĭt klei amra truh kơ hruê êdei anăp wăt tơdah sui dưn. Amâo djŏ knŏng dŭm anăn ôh, wăt čêč drêč kơ klei “mtao tal êlâo hĭn” hlăm pă boh ƀuôn ala mtao kbiă hriê srăng hrô ñu ƀiădah “amâo mâo klei ktang msĕ si ñu ôh” ƀuôn ala mtao êlâo anăn,… jing djŏ sơăi hŏng mnuih leh anăn hƀuê ênuk. Thŭn 175 Êlâo kơ Krist, kyua klei kar kak čiăng bi lir jih jang ƀuôn ala mtao ñu hŏng klei brei jih jang phung ƀuôn sang tui hluê klei bhiăn mta klei đăo phung Grek, Antiochus Epiphanes, pô kgŭ kiă kriê sa hlăm pă ƀuôn ala mtao Grek, kăm ghă amâo brei ngă klei khăt klĭt ôh, bi mjưh klei myơr mnơ̆ng ngă yang grăp hruê hlăm Sang Yang. Ñu pô yơh ngă bi čhŏ anôk doh jăk kơ Aê Diê ti ƀuôn Yêrusalem hŏng klei myơr sa drei ŭn ti dlông knưl leh anăn dưm sa mnơ̆ng myơr kơ yang Zeus ti anôk doh jăk hĭn. Ñu čuh hdruôm hră Klei Aê Diê Blŭ leh anăn bi mdjiê phung dôk sĭt suôr hŏng Aê Diê. Klei hưn êlâo kơ klei kbiă hriê mơ̆ng “ki mkăn” bi rai phung doh jăk, “ñu mă hĕ klei myơr mnơ̆ng čuh nanao mơ̆ng Khua” (êlan 10-12) ăt bi sĭt leh mơh.
Phung mâo klei đing lač hdruôm hră Y-Đaniel čih êdei kơ jih klei anăn truh ƀiădah drei đăo msĕ si Klei Mtô Mñă Klei Bhiăn 29:29: “Klei hgăm pioh kơ Yêhôwa Aê Diê drei”. jing Khua Yang kơ jih hruê leh êgao, hruê anei leh anăn wăt kơ hruê êdei anăp. Leh anăn Ñu bi êdah hruê êdei anăp kơ “drei leh anăn kơ phung anak drei nanao hlŏng lar, čiăng kơ drei dưi ngă jih jang klei blŭ hlăm klei bhiăn anei”. Khua Yang Yêsu ăt hưn êlâo leh kơ hruê knhal tuč hlăm hdruôm hră Klei Mrâo Mrang Jăk Y-Mathiơ 24, Y-Markôs 13, Y-Luk 21. Dlăng klei blŭ anei, si ngă drei huĭ hĕ amâodah đăo kjăp kơ Khua Yang jing Aê Diê Sĭt, Klei Aê Diê Blŭ jing sĭt? Akâo Khua Yang brei drei ngă tui si Klei Aê Diê Blŭ mtô ară anei mtam huĭdah hnui hĕ.
Si ngă drei dôk răng čiăng “ngă jih jang klei blŭ hlăm klei bhiăn” mơ̆?
Wah lač: Ơ Khua Yang, tơdah ƀuh klei Ih bi êdah kơ hruê knhal tuč hlăk hlê dôk bi sĭt, akâo Khua Yang brei kâo ktang hĭn êjai gưt asăp Ih, dôk răng leh anăn wah lač.
Dlăng Klei Aê Diê Blŭ hlăm tlâo thŭn: Klei Mmuñ Hđăp 118:1-29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
