Daniyees 8:13-27
Nqe cim:
“Muaj tej yam uas tus TSWV uas yog peb tus Vajtswv tsis qhia rau leejtwg paub; tiamsis nws twb qhia nws tej kevcai rau sawvdaws kom peb thiab peb tej xeebntxwv ua raws li tej kevcai ntawd mus ibtxhis” (II Kevcai 29:29).
Lus nug rau sawvdaws xav:
- Tej lus nyob hauv Daniyees zaj yog toog muaj tiav licas hauv keebkwm?
- Vim licas tus Tswv qhia txog yav tom ntej rau cov uas yog Nws tug?
- Saib Vajtswv Txojlus hais txog hnub kawg tabtom tshwmsim los, peb xav licas thiab yuav tsum ua dabtsi?
Zaj yogtoog hais hauv no tshwmsim thaum “Npesaxas ua vajntxwv tau peb xyoos lawm” (Daniyees 8:1), yog ntu sijhawm uas vajntxwv Xailas tebchaws Pawxias txeeb tau tebchaws Medes thiab muab ob lub tebchaws los sib koom. Tomqab 50 xyoo uas pom zaj yogtoog hauv tshooj 2 thiab ob xyoos uas pom zaj yogtoog hauv tshooj 7, ntawm no yog thawj zaug uas Vajtswv nthuav dav tej zaj yogtoog ntawd. Thaum tus cev lus Daniyees tseem txhawj rau qhov uas “ua tib zoo saib” kom nkag siab, kom “paub”, “kom totaub” thiab paub txog “lub sijhawm uas ib puas tsav yam kawg” (nqe 15-19), tus Tswv tau qhia rau nws paub txog ob lub tebchaws uas yuav sawv los tswjkav lub ntiajteb: Ntawd yog tebchaws Medes – Pawxias, thiab tebchaws Kilis (nqe 20-21).
Qhov uas Medes – Pawxias sawv los tswjkav ntiajteb yog yam xwm tabtom tshwmsim, yog li ntawd tej lus cev tseg txog lub tebchaws no tsis yog yam uas neeg tsis xav tsis txog ua ntej; tiamsis qhov uas tebchaws Kilis yuav sawv los tswjkav ntiajteb, yog yam xwm ob tiam tomqab ntawd mam li tshwmsim; ntawd thiaj yog yam xav tsis thoob hauv zaj yogtoog no! Tus Tswv hais ua ntej txog tej xwm uas yuav tshwmsim los rau lub sijhawm ntev heev tomqab. Tsis tas li ntawd xwb, tej lus hais txog “thawj tug vajntxwv” hauv plaub lub tebchaws uas yuav sawv los kav tiamsis “tsis muaj hwjchim loj” li thawj lub tebchaws,… tej no puavleej muaj tiav huv tibsi hauv keebkwm lawm. Xyoo 175 UT, vim lub siab kub xav kom lub tebchaws nyob tiaj tus, vajntxwv Antiochus Epiphanes tus uas sawv los kav ib lub hauv cov Kilis plaub lub tebchaws, tau qhuab yuam kom txhua haivneeg uas nws kav yuav tsum coj raws cov Kilis kev ntseeg, nws txwv tsis pub ua kevcai txiav, tsis pub tua tsiaj theej txhoj txhua hnub hauv lub Tuamtsev. Nws yog tus ua rau Vajtswv chav dawbhuv hauv nroog Yeluxalees raug qias thaum fij ib tug npua rau saum lub thaj thiab fij khoom rau tus vajtswv Zeus hauv chav dawbhuv kawg nkaus. Nws hlawv phau Vajluskub thiab ntes cov neeg muab siab npuab Vajtswv coj mus tua povtseg. Tej lus hais tseg txog “tus kub me me” sawv los ua rau haivneeg dawbhuv raug puastsuaj, “txwv tsis pub leejtwg tua tsiaj fij” (nqe 10-12) puavleej muaj tiav lawm.
Cov neeg tsis ntseeg xav hais tias phau Daniyees yog sau tiav tomqab muaj tej xwm ntawd, tiamsis peb ntseeg li hauv II Kevcai 29:29 (Phau Txhais Tshiab) sau hais tias: “Tej xwm uas tsis tau muab qhia tshwm los yeej yog peb tus Vajtswv Yawmsaub li”. Nws yog tus Tswv ntawm tej yam dhau lawm, tej yam tseem muaj nyob thiab tej yam yuav tshwmsim los. Thiab Nws qhia tej yam yuav muaj los “rau sawvdaws kom peb thiab peb tej xeebntxwv ua raws li tej kevcai ntawd mus ibtxhis.”. Tswv Yexus kuj hais ua ntej txog lub sijhawm kawg nyob hauv tej Phau Moo Zoo Mathais 24, Malakaus 13, Lukas 21. Nyeem tej lus no, puas ua rau peb txhawj ntshai, lossis yuav ua rau peb ntseeg hais tias tus Tswv yog Vajtswv tseeb thiab Vajtswv Txojlus yog txoj tseeb? Thov tus Tswv pab peb ua raws li Vajtswv Txojlus qhia ua ntej yuav lig.
Peb puas tabtom tsim dheev los ua raws li Vajtswv Txojlus qhia lawm tau?
Tus Tswv, thaum pom tej uas koj hais txog lub sijhawm ntiajteb kawg tabtom tshwmsim zuj zus, thov Koj pab nyuam yaus txhob ua neej tsaug zog, tiamsis yim hnub yim ua neej hwm Koj, ntseeg Koj. Amees.
Nyeem Vajluskub hauv peb lub xyoos: Phau Ntawv Nkauj 118
Kênh Youtube BHKTHN:
