Klei Aê Diê Blŭ: Y‑Mathiơ 8:14-17
Êlan kliăng: “Klei anei čiăng bi sĭt klei khua pô hưn êlâo Y‑Êsai blŭ leh, ‘Ñu mă jih klei awăt drei leh anăn klam klei ruă drei.’ ” (Y‑Mathiơ 8:17).
Klei êmuh ksiêm mĭn: Si ngă Khua Yang Yêsu mdrao klei ruă kơ kmha mniê Y‑Pêtrôs? Si ngă ñu ngă ti anăp klei Khua Yang Yêsu ngă kơ ñu? Ya ngă Khua ƀĭng kna Y‑Mathiơ mă hlăm klei Khua Pô Hưn Êlâo Y‑Êsai hưn êlâo leh? Ya klei hriăm drei mâo mơ̆ng klei yăl dliê anei?
Y‑Mathiơ kdrêč 8 mphŭn pŏk hŏng dŭm klei myang Khua Yang bi hlao klei ruă, leh anăn grăp klei myang mdê mdê lač kơ dŭm bruă mdê mdê kơ klei Khua Yang Yêsu jing kñăm đru kơ phung dlăng hdruôm hră anei thâo kral hlei Khua Yang Yêsu jing. Kdrêč Klei Aê Diê Blŭ hruê anei lač kơ klei myang bi hlao klei ruă hlăm hruê Sa ƀat, leh Khua Yang Yêsu kbiă mơ̆ng sang bi kƀĭn leh anăn nao ti sang Y‑Pêtrôs (Y‑Markôs 1:29). Leh Khua Yang Yêsu ƀuh klei ruă kmha mniê Y‑Pêtrôs, Ñu nao giăm jhưng, ruêh ti kngan gơ̆ leh anăn gơ̆ hlao êngoh mtam. Klei ruêh kyua klei Ñu khăp amâo djŏ knŏng ba klei bi hlao hlăm asei mlei ôh ƀiădah ăt ba klei bi mrâo hlăm klei hdĭp mngăt ai tiê gơ̆, kyua gơ̆ dưi thâo klei myang Khua Yang Yêsu hlăm klei hdĭp pô. Klei mlih mrâo anăn bi êdah hlăm bruă ngă jăk mă bruă kơ Khua Yang leh anăn grăp čô mnuih leh ñu mrâo hlao klei ruă mtam, khă gơ̆ năng ai brei ñu mdei hĭn kơ mă bruă. Truh tlam leh jih hruê Sa ƀat, Khua Yang lŏ dơ̆ng bi hlao kơ lu mnuih ruă leh anăn phung yang jhat dôk.
Kdrêč đŭt anei jih hŏng klei hưn êlâo hlăm hdruôm hră Khua pô hưn êlâo Y‑Êsai 53:4: “Sĭt nik ñu klam leh klei ruă duam drei, ñu gui leh klei ênguôt hnĭng drei, ƀiădah drei yap ñu msĕ si pô Aê Diê bi kmhal, pô Aê Diê čăm leh anăn bi knap.” Klei blŭ mă hlăm Klei Aê Diê Blŭ Bi Mguôp Hđăp kñăm đru kơ phung dlăng hdruôm hră Y‑Mathiơ bi mĭn kơ Yang Mêsi dưi hưn leh êlâo anăn, leh anăn diñu thâo djăp klei hưn êlao anăn dưi djŏ sĭt kơ Khua Yang Yêsu. Anei jing sa hlăm dŭm hdră kñăm yuôm bhăn hlăm Hdruôm hră Klei Mrâo Mrang Jăk Y‑Mathiơ. Hdră tui hluê Khua Yang jing hdră amâo mdei tui hriăm hlei Khua Yang Yêsu jing hlăm klei hdĭp pô leh anăn hlăm lăn ala anei. Klei thâo kral anei amâo djŏ knŏng dôk hlăm klei mĭn amâodah hlăm sa wưng ôh ƀiădah jing klei thâo kral Khua Yang hlăm dŭm klei găn điêt prŏng grăp hruê hlăm klei hdĭp pô, msĕ si kmha mniê Y‑Pêtrôs thâo leh klei Khua Yang Yêsu bi hlao ñu. Tơdah drei amâo thâo ôh hlei Khua Yang Yêsu jing hlăm klei hdĭp pô hlăm bruă Ñu ngă kơ drei snăn dleh snăk drei dưi hur har mă bruă kơ Ñu leh anăn mă bruă kơ phung ka đaŏ kơ Ñu. Hlăm klei hdĭp, drei khăng čang hmăng Khua Yang ngă klei prŏng prĭn kơ pô ƀiădah khăng lui hĕ klei điêt. Brei drei hriăm dlăng kơ klei điêt Khua Yang ngă hlăm klei hdĭp pô čiăng grăp hruê êbat hlăm klei mă bruă kơ Khua Yang leh anăn kơ phung ka đaŏ kơ Aê Diê.
Drei thâo hlei Khua Yang Yêsu jing hlăm klei hdĭp ară anei?
Wah lač: Ơ Khua Yang, jing Pô Bi mtlaih klei hdĭp kâo. Akâo kơ Ih đru kâo grăp hruê thâo kral Ih hĭn, leh anăn hdĭp nanao hlăm ai tiê mă bruă kơ Khua Yang leh anăn phung rêng gah kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 8:1-9:13
Kênh Youtube BHKTHN:
