Klei Aê Diê Blŭ: II Kôrantô 2:5-11
Êlan kliăng: “Snăn jing djŏ diih pap brei leh anăn bi juh ñu, huĭdah ñu srăng ênguôt đei tơl amâo dưi tŭ ôh. Snăn, kâo kwưh kơ diih lŏ bi sĭt klei diih khăp kơ ñu.” (II Kôrantô 2:7‑8).
Klei êmuh ksiêm mĭn: Ya bruă Khua ƀĭng kna Y‑Pôl mtă kơ phung đăo ti Kôrantô ngă hŏng phung ngă soh êlâo dih? Ya ngă ñu mtă snăn? Si drei tui hriăm klei hriăm anei hlăm Sang Aê Diê?
Khua ƀĭng kna Y‑Pôl tuôm lač kơ phung đăo ti Kôrantô hlăm hră tal sa ñu čih kơ digơ̆ kyua digơ̆ amâo tuôm ênguôt hnĭng ôh tơdah mâo ayŏng adei hlăm sa klei đăo ngă soh kjham (I Kôrantô 5:2). Truh ară anei ñu ka mâo ôh klei tŭ tal êlâo mơ̆ng klei bi hriăm anăn hlăk ti krah phung đăo mâo leh klei ênguôt hnĭng hŏng phung ngă soh anăn. Khua ƀĭng kna Y‑Pôl lač klei ênguôt anăn kyua phung ngă soh ngă amâo djŏ knŏng hjăn kơ ñu pô ôh, ƀiădah hlăm sa klei kčah, pô anăn ba klei ênguôt kơ jih jang ayŏng adei sa klei đăo. Khua ƀĭng kna Y‑Pôl lač “…ñu bi ênguôt amâo djŏ kơ kâo ôh, ƀiădah ƀiă lu kơ jih jang diih. (Kâo amâo čiăng blŭ êgao hnơ̆ng ôh)” (êlan 5) čiăng lač ñu amâo bi prŏng klei mâo ôh.
Ară anei, Khua ƀĭng kna Y‑Pôl mtă kơ ayŏng adei đăm luič mông ƀuah ăl ôh kơ klei diñu ngă soh kyua diñu thâo leh leh anăn ênguôt kơ klei soh pô. Hĭn mơh, “Klei bi kmhal mơ̆ng lu mnuih jing djăp leh kơ sa čô msĕ snăn” (êlan 6). Klei phung đăo Kôrantô brei ngă hlăk anei jing mă klei khăp čiăng pap brei leh anăn bi juh phung ngă soh leh, kyua đăm brei pô anăn “…ênguôt đei tơl amâo dưi tŭ ôh” (êlan 7). Klei yuôm bhăn hĭn jing đru ayŏng adei pô lŏ wĭt hŏng Sang Aê Diê amâo djŏ klư̆ ayŏng adei pô kbiă mơ̆ng Sang Aê Diê ôh. Tơdah phung đăo Kôrantô amâo gưt hlue si asăp Khua ƀĭng kna Y‑Pôl mtă snăn huĭdah diñu srăng lĕ hlăm klei satan mplư.
Sang Aê Diê amâo dưi mdăp klei soh ôh. Bruă mtô mjuăt hlăm Sang Aê Diê kñăm đru kơ Sang Aê Diê doh jăk leh anăn đru phung ngă soh lŏ wĭt kmhal. Khădah, tơdah ba yua klei mtô mjuăt amâo mâo ôh klei pap brei hŏng klei khăp snăn srăng ngă luč liê kơ Sang Aê Diê, huĭdah phung hlue ngă bruă ƀuah mkra srăng jing mgao kơ klei doh jăk hlăm klei hdĭp pô (Galati 6:1), leh anăn ăt huĭdah pô arăng ƀuah mkra srăng ênguôt đei anăn lui Aê Diê. Bruă ƀuah mkra hlăm Sang Aê Diê jing čiăng ƀiădah brei hŏng hdră kñăm đru ayŏng adei ngă soh lŏ wĭt hŏng klei bi mguôp hŏng Sang Aê Diê đăm lui digơ̆ kbiă mơ̆ng Sang Aê Diê ôh. Kyua anăn, ba yua klei hriăm Khua ƀĭng kna Y‑Pôl bi hriăm kơ Sang Aê Diê Kôrantô êlâo dih, Sang Aê Diê hruê anei leh anăn grăp čô phung drei, brei thâo bi pap hlăm klei khăp čiăng ayŏng adei pô amâo lĕ hlăm êlan satan mplư.
Drei ngă leh mơ̆ ai tiê thâo bi pap hdơ̆ng ayŏng adei pô hlăm klei khăp amâodah ka?
Wah lač: Ơ Khua Yang khăp hơiêng! Kâo bi mni lač jăk kơ Ih kyua Klei Aê Diê Blŭ mtrang mngač, mñă kơ kâo klei hriăm kơ klei khăp leh anăn pap brei. Akâo kơ Ih đru kâo thâo pap brei hlăm klei khăp čiăng klei mơak hlăm gŏ sang klei đăo dưi kluôm ênŭm.
Dlăng klei Aê Diê Blŭ hlăm tlâo thŭn: Klei Mmuñ Hđăp 36:1-12; 37:1-20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
