Klei Aê Diê Blŭ: Klei Mmuñ Hđăp 116:3-11
Êlan kliăng: “Yêhôwa kiă kriê phung awăt êdu; tơdah kâo knap mñai Ñu bi mtlaih kâo.” (Klei Mmuñ Hđăp 116:6)
Klei êmuh ksiêm mĭn: Ya klei truh dleh dlan pô čih dôk găn? Ya klei Yêhôwa ngă leh hlăm klei truh msĕ snăn? Ya klei Khua Yang ngă leh kơ drei leh anăn si knuih brei drei mâo tơdah thâo săng klei anei?
Pô čih lač Yêhôwa “mđing leh knga Ñu” dôk hmư̆ “klei kwưh” ñu (Klei Mmuñ Hđăp 116:1-2), leh anăn jih jang êlan Klei Aê Diê Blŭ hruê anei hưn bi sĭt Khua Yang thâo sĭt nik jih klei dleh dlan ñu dôk tlă anăp leh anăn bi mtlaih ñu.
Khua pô mtô Charles Spurgeon lač snei, êlan 3 jing rup hiu lua hlô rang ênuk đưm, tơdah pô hiu lua mbĭt hŏng phung asâo jhŏng ktang ñu tiŏ lua hlô rang wang jŭm, kpĭ gơ̆ tơl tuč êlan. Pô čih ăt dôk tŭ klei wang jŭm găn, kpĭ ñu hŏng klei ruă kjham msĕ mơh (êlan 3), klei êdu ai hlăm mngăt ai tiê (êlan 8), leh anăn klei luar mơ̆ng phung mnuih riêng gah (êlan 11). Hlăm klei knap mñai luč klei čang hmăng pô, pô čih đăo kjăp kơ Khua Yang srăng bi mtlaih “phung awăt êdu” (êlan 6).
Tĭng kơ klei hdĭp myang, Aê Diê bi mtlaih leh drei mơ̆ng klei myang klei mmăt brei jing phung anak Ñu. Klei bi mtlaih drei mă tŭ amâo hriê mơ̆ng klei kpă ênô amâodah klei thâo mĭn mnuih drei ôh, ƀiădah kbiă hriê mơ̆ng klei pap Aê Diê čuăn ruah pioh brei kơ drei (Êphêsô 2:4-9). Klei bi mtlaih jing klei pap yuôm bhăn, jing klei myang yuôm bhăn hriê mơ̆ng Aê Diê.
Tĭng kơ klei hdĭp kđeh êrah, Aê Diê tuôm bi mtlaih leh drei mơ̆ng klei ruă, klei dleh dlan hlăm prăk kăk, leh anăn klei luar mnuih mkăn. Sa mta klei yuôm mdê hĭn jing boh blŭ “bi mtlaih” hlăm Klei Mmuñ Hđăp anei lač kơ klei êgao leh (êlan 8) leh anăn klei ară anei hin (êlan 6). Klei anăn yơh jing phŭn knhal pô čih đăo knang kơ klei Khua Yang srăng bi mtlaih hlăm hruê ti anăp.
Amâo knŏng dŭm anăn ôh, pô čih brei thâo Khua Yang wăt lŏ “ngă jăk êbeh dlai” kơ pô huĭ mpŭ kơ Ñu (êlan 7). “Ngă jăk êbeh dlai” mblang jing klei ngă hŏng klei bŏ ênŭm leh anăn kluôm dhuôm. Aê Diê amâo knŏng hmư̆ klei wah lač, bi mtlaih drei ƀiădah wăt ba drei truh kơ sa klei hdĭp bŏ ênŭm leh anăn jăk mơak. Khua Yang “ngă jăk êbeh dlai” amâo djŏ mblang jing Ñu mă mđuê̆ mơ̆ng drei klei lông dlăng dleh dlan ôh ƀiădah Khua Yang brei drei “mdei” hlăm Ñu, dôk êđăp ênang tlă anăp hŏng jih jang klei dleh truh (êlan 7; Philip 4:6-7). Aê Diê ăt “ngă jăk êbeh dlai” msĕ mơh tơdah Ñu kiă kriê drei tlaih mơ̆ng klei “lĕ buh” hlăm klei lông dlăng dleh dlan (êlan 8; I Kôrantô 10:13) čiăng hŏng klei anăn drei thâo kral klei drei jing điêt dhiêt snăk, Aê Diê jing sĭt suôr, klei khăp, leh anăn ktang myang êdimi, čiăng kơ msĕ si Khua ƀĭng kna Y-Pêtrôs, Khua Yang Yêsu ăt dôk wah lač brei kơ drei, “Ƀiădah Kâo wah lač leh kơ ih, čiăng kơ klei ih đăo amâo awăt ôh. Leh anăn tơdah ih lŏ wĭt kơ Kâo, brei ih bi kjăp phung ayŏng adei ih.” (Y-Luk 22:32).
Si ngă drei thâo kral mơ̆ si klei Khua Yang bi mtlaih leh drei hlăm klei hdĭp drei?
Wah lač: Ơ Khua Yang, bi mni kơ Khua Yang kyua klei Ih khăp prŏng prĭn brei kâo dưi jing anak Ih. Bi mni kơ Khua Yang ăt khăp pap mtô bi hriăm leh anăn đru kâo đĭ hriê kơ prŏng hlăm klei thâo kral Khua Yang, dŏng mgang kâo ti krah klei luar, lŏ thiăm kơ kâo thŭn mlan ti lăn ala brei kâo mâo mmông găl kkuh mpŭ leh anăn mă bruă kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
