Tơdrong Pơđơ̆k 25:27-28
“’Bok Kei-Dei ăn kơ bơ̆n Yang Bơhngol ‘Lơ̆ng Sư. Na Yang Bơhngol ‘Lơ̆ng ưh kơ wă ăn kơ bơ̆n jơhngơ̆m lêl ôh, Sư ăn kơ bơ̆n jơhngơ̆m nuih kơtang. Sư ăn kơ bơ̆n gơh ‘mêm kơ ‘Bok Kei-Dei păng bôl buăl bơ̆n mơ̆n păng ăn kơ bơ̆n jơhngơ̆m chơ̆n tơpă.” (II Timôthê 1:7)
Nơ̆r jet tơchĕng pơwao:
– Nơ̆r “pơgơ̆r” dah “pơgơ̆t” wă khan kiơ?
– ‘Bai pơhrăm năr ‘nâu pơma gah tơdrong gơh gơ̆t thoi yơ?
– Pơm thoi yơ bơ̆n gơh arih gơh gơ̆t hloh gah dôm tơdrong lăm chăl arih bơ̆n?
Nơ̆r “pơgơ̆r” dah “pơgơ̆t” kiơ̆ kơ đơ̆ng nơ̆r Grĕk jơ̆ enkrateia, wă khan jơhngơ̆m chơ̆n, wei akâu kơdih, kĕ ĕnh dah gơh gơ̆t. ‘Bar trong tơdrong Pơđơ̆k ‘nâu wă pơma kơ pêng tơdrong gah tơdrong gơh gơ̆t lăm chăl arih. Đak sut mă khan ‘lơ̆ng mălei mưh sa lơ hnang kư̆m ưh kơ ‘lơ̆ng. Adrin hŏk pơhrăm, wă kơ gơh hơgei ‘noh ‘lơ̆ng, mălei mưh pơrơ̆ng chă wă kơ đe ưang lăm teh đak âu lei kư̆m ưh kơ ‘lơ̆ng gô jing pơrăm. Bơngai ưh kơ băt pơgơ̆r jơhngơ̆m sư kơdih kư̆m gô răm. Bơngai ‘noh thoi minh pôm pơlei dur đĭ păk, ưh kơ gơh pĕng găn lu ayăt blah tơgar iŏk.
Mă mônh, dôm nơ̆r khan “sa đak sut lơ hngang” (trong 27) pơma kơ tơdrong ưh kơ gơh gơ̆t, ưh kơ kĕ ĕnh lăm tơdrong sa et. Kră Yang Yêsu bơtho, sa et hloh hnang pơm kơ bơ̆n ưh kơ kơchăng (Luka 21:34). Sa et hloh hnang, măk ai tơ’bôh bơngai noh ưh kơ đei tơdrong ‘blŏk tơchĕng păng kư̆m ưh kơ ‘bôh tơdrong hiơ̆k Bơhngol ‘Lơ̆ng, lăm noh, tơdrong “gơh gơ̆t” jơ̆ plei Yang Bơhngol ‘Lơ̆ng. Tơdrong pơgơ̆t lăm chăl arih noh bơ̆n hlôh wă khan gơh gơ̆t, hăm tơdrong et sik suai păng et sa hloh kơ ai, jơ̆ dôm tơdrong đei chih roi lăm lu tơdrong pơm kiơ̆ kơ sĕch akar. Mă ‘bar, pơrơ̆ng chă wă kơ đe ưang kơ bơ̆n ba truh tơ ưh kơ băt pơgơ̆t jơhngơ̆m kơdih na jing puh kơ tơdrong pơhlŭ đơ̆ng ‘nguaih wă, tơchĕng kư̆ kă dôm tơdrong kơnê̆ ‘mê̆ ‘mach, lei tơdrong yoch gô pơgơ̆t bơngai noh. Kơnhăm chăl arih bơngai lui ưh kơ trŏ wă chă đe ưang lăm teh đak âu ôh. Mălei wă chă tơdrong arih ling lang ning mônh. Tuch luch, nơ̆r “pơgơ̆t” kư̆m wă khan “kơchăng”. Ưh kơ gơh gơ̆t gô ba truh tơ tơdrong răm tơpă noh jơ̆ ưh kơ kĕ kơ pơjăng hăm ayăt đơ̆ng ‘nguaih, noh thoi minh pôm pơlei dur đĭ păk. ‘Bok Pôl bơtho khan kơ kon pơlei Kră Yang athei kơchăng oei chang gô Kră Yang jur dơ̆ng; “Yua kơ bơ̆n huay pă oei lăm măng mu bơih, na bơ̆n ‘nĕ kơ tep hiơt thoi lu bơngai ưh kơ lui. Bơ̆n lui bơih, bơ̆n thoi lĕ iung đơ̆ng tep na bơ̆n athei kơchăng ling lang. Bơ̆n athei lui kơjăp mă tơpă.” (I Têsalônik 5:6). Lăm tôm tơdrong bơ̆n athei kơchăng hăm tơdrong kơnê̆ wă pơrăm bơ̆n. Hăm lu bơngai lui plei Yang Bơhngol ‘Lơ̆ng ba ăn tơdrong kĕ chơ̆n, gơh gơ̆t (Galati 5:22). Chu kiơ̆ Yang Bơhngol ‘Lơ̆ng gô tơgŭm bơ̆n đei tơdrong mơsêh Kră Yang wă kơ arih gơh gơ̆t. ‘Bok Pôl bơtho: “’Bok Kei-Dei ăn kơ bơ̆n Yang Bơhngol ‘Lơ̆ng Sư, na Yang Bơhngol ‘Lơ̆ng Sư ưh kơ wă ăn kơ bơ̆n jơhngơ̆m lêl ôh. Sư ăn kơ bơ̆n minh tơdrong kơtang, Sư ăn kơ bơ̆n gơh ‘mêm kơ ‘Bok Kei-Dei păng bôl buăl bơ̆n păng ăn kơ bơ̆n jơhngơ̆m chơ̆n tơpă”. (II Timôthê 1:7). Apinh Kră Yang ăn kơ rim ‘nu lu bơ̆n đei jơhngơ̆m pran kơtang; đei tơdrong ‘mêm tôm mah đơ̆ng Kră Yang păng đei jơhngơ̆m chơ̆n tơpă lăm tôm tơdrong.
Ơ Kră Yang, inh bơnê kơ Ih ‘Bă mơnat kơ inh păng tơgŭm inh. Apinh Yang Bơhngol Lơ̆ng ăn kơ inh pơhrăm iŏk băt păng arih gơh gơ̆t lăm tôm tơdrong lăm tơdrong arih wă kơ inh tơ’bôh tơdrong ‘mêm mơnat Kră Yang păng ưang Anăn Sư, krao khan yua anăn Kră Yang Yêsu Krist, Amen.
Bơ̆n đĭ jơhngơ̆m gơnang kơ Kră Yang wă kơ arih gơh gơ̆t lăm tôm tơdrong thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Hôsia 7
Kênh Youtube BHKTHN:
