Klei Aê Diê Blŭ: I Kôrantô 3:9-15
Êlan kliăng: “Tui si klei pap Aê Diê brei leh kơ kâo, msĕ si sa čô mnuih mbruă ngă sang kâo dưm leh atur, leh anăn sa čô mkăn dôk mdơ̆ng sang ti dlông atur anăn. Brei grăp čô răng si klei ñu mdơ̆ng ti dlông atur anăn.” (I Kôrantô 3:10)
Klei êmuh ksiêm mĭn: Ya rup khua ƀĭng kna Y-Pôl yua čiăng bi hmô kơ Phung Sang Aê Diê? Čiăng kơ bruă mdơ̆ng Phung Sang Aê Diê mâo klei jăk, ya dua mta klei čoh čuăn brei ngă? Hŏng ya mta mnơ̆ng Phung Sang Aê Diê Kôrantô hlăk êlâo leh anăn phung drei ară anei dôk mdơ̆ng “sang kơ Phung Sang Aê Diê”?
Khua ƀĭng kna Y-Pôl yua rup sang čiăng lač tlâo mta klei kơ Phung Sang Aê Diê ti ƀuôn Kôrantô. Tal sa, Phung Sang Aê Diê msĕ si sa boh sang Aê Diê mdơ̆ng (êlan 9). Tal dua, khua ƀĭng kna Y-Pôl dưm leh atur (êlan 10). Tal tlâo, kdrêč ti dlông sang Phung Sang Aê Diê mơ̆ng “sa čô mkăn” mdơ̆ng, čiăng lač kơ Y-Apôlôs (êlan 10). Rup bi hmô anei đru drei dưi thâo săng hĭn kơ bruă Aê Diê, bruă ñu leh anăn bruă phung mnuih mkăn msĕ si Y-Apôlôs.
Khua ƀĭng kna Y-Pôl mñă snei čiăng kơ bruă mdơ̆ng Phung Sang Aê Diê jing jăk, brei ngă bi leh dua mta klei čoh čuăn anei: Tal sa, hŏng pô ngă bruă dưm atur msĕ si ñu, snăn atur Phung Sang Aê Diê brei jing Khua Yang Yêsu Krist, amâo mâo atur mkăn dưi mdơ̆ng Phung Sang Aê Diê ôh (êlan 11). Phung Sang Aê Diê amâo dưi mdơ̆ng ti dlông atur klei thâo blŭ mnuih amâodah ti dlông klei thâo mĭn hlei pô ôh (I Kôrantô 2:4-5). Msĕ si mñă leh lu blư̆, atur klei mrâo mrang pioh mdơ̆ng Phung Sang Aê Diê jing “Yang Krist tŭ klei djiê ti kyâo bi kal” (I Kôrantô 1:13, 17, 23; 2:2).
Tal dua, tơdah mâo leh atur, mâo dua mta mnơ̆ng khăng yua pioh mdơ̆ng sang: mta mnơ̆ng dưi tŭ pui čuh leh anăn mta mnơ̆ng pui ƀơ̆ng rai jih (êlan 13-15). Mah, prăk, boh tâo yuôm jing mnơ̆ng mtao Y-Salômôn yua pioh mdơ̆ng Sang Yang (I Klei Yăl Dliê 29:2), rup tinei bi êdah kơ mnơ̆ng amâo rai ôh hŏng pui klei phat kđi; bi mklăk hŏng mnơ̆ng pui dưi ƀơ̆ng jing kyâo, rơ̆k krô, adrăng. Jih jang bruă phung đăo kơ Krist ngă hŏng klei đăo, klei gưt asăp leh anăn “knang kơ klei myang Aê Diê ” (I Kôrantô 2:4-5) srăng adôk; bi jih jang bruă ngă tui si kđeh leh anăn tui si klei thâo mĭn mnuih lăn ala anei pui srăng ƀơ̆ng rai jih.
Sa čô mnuih đăo sĭt kơ Khua Yang Yêsu jing mnuih dưi yap kpă leh anăn mâo klei bi mtlaih, ƀiădah bruă diñu ngă ăt srăng tŭ klei phat kđi mơh (Rôm 14:10-12; II Kôrantô 5:10). Phung đăo ti ƀuôn Kôrantô msĕ si drei ară anei mâo klei bi mtlaih leh, ƀiădah tơdah drei mdơ̆ng sang Phung Sang Aê Diê ti dlông klei bi mkă ƀiă lu, hŏng klei bi nač, snăn bruă drei lu dưn leh anăn dlăng jăk dưn, ăt jing bruă ngă tui si kđeh, leh anăn jih jang klei suăi mă bruă ăt jing hơăi mang mơh. Akâo Khua Yang brei drei thâo răng kyuadah grăp čô drei srăng tŭ bruă klam ti anăp Aê Diê jing Pô mdơ̆ng Phung Sang Aê Diê Ñu.
Si ngă jih jang bruă drei dôk ngă kơ Khua Yang “dưi tŭ pui čuh” mơ̆ amâodah hơăi?
Wah lač: Ơ Khua Yang, akâo Ih đru hmei mdơ̆ng sang Phung Sang Aê Diê hŏng klei myang Khua Yang, hŏng klei knang kơ Khua Yang leh anăn mpŭ kơ phung mă bruă mbĭt hŏng kâo. Akâo Khua Yang đru kâo thâo răng êjai mă bruă Khua Yang, čiăng ba klei rŭ mdơ̆ng, amâo djŏ ôh klei bi kah phung hlăm Phung Sang Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
