Klei Aê Diê Blŭ: Klei Kbiă 30:22-33
Êlan kliăng: “Hlei pô ngă msĕ, amâodah hlei pô dưm gơ̆ ti sa čô mnuih mkăn, brei arăng ktlah hĕ ñu mơ̆ng găp djuê Israel.” (Klei Kbiă 30:33).
Klei êmuh ksiêm mĭn: Si hdră mkra mjing êa ƀâo mngưi? Si hdră ba yua êa ƀâo mngưi leh anăn ya klei tŭ dưn? Ya klei Aê Diê čiăng kơ phung ƀuôn sang Ñu ngă leh ñu bi kmhal kjham kơ phung ngă soh hlue ngă klei mkra mjing leh anăn ba yua soh klei bhiăn mta êa ƀâo mngưi mdê hjăn anei? Ya klei hriăm drei mâo hruê anei?
Êa ƀâo mngưi dưi mkra mjing mơ̆ng dŭm mta mnơ̆ng ƀâo mngưi jăk hĭn, bi lŭk hlue si hnơ̆ng snei: êma êtuh sêkel êa drao phĭ mơêa, dua êtuh êma pluh sêkel, čiăng lač sa mkrah anăn, sinamôn ƀâo mngưi, leh anăn dua êtuh êma pluh sêkel mbô ƀâo mngưi, 24êma êtuh sêkel kas, tui si sêkel mơ̆ng adŭ doh jăk, leh anăn sa hin êa boh ôliwơ čiăng mjing sa mta êa ƀâo mngưi mdê hjăn dưi pia jing “êa ƀâo mngưi doh jăk”. Aê Diê mtô pioh yua êa ƀâo mngưi doh jăk anei čiăng “trôč êa ƀâo mngưi anăn ti sang čhiăm klei bi kƀĭn leh anăn hip klei bi mguôp” hŏng jih jang mnơ̆ng hlăm sang čhiăm, jhưng wăt jih jang mnơ̆ng yua kơ ñu, jơ̆ng diăn wăt jih jang mnơ̆ng yua kơ ñu, leh anăn knưl čuh mnơ̆ng ƀâo mngưi, knưl mnơ̆ng myơr čuh wăt jih jang mnơ̆ng yua kơ ñu, leh anăn thŭng êa wăt jơ̆ng ñu. Y‑Arôn leh anăn phung anak êkei ñu dưi trôč êa ƀâo mngưi, dưi pioh hjăn čiăng mă bruă kơ Aê Diê hlăm bruă jing khua ngă yang.
Klei Aê Diê Blŭ mtô brei ƀuh bruă ba yua mta êa ƀâo mngưi jing bi doh kơ jih jang mnơ̆ng leh anăn mnuih arăng trôč êa ƀâo mngưi. Wăt tơdah phung Israel dưi pia jing phung ƀuôn sang Aê Diê ruah, pioh hjăn kơ Aê Diê ƀiădah knŏng phung khua ngă yang dưi trôč mta êa ƀâo mngưi čiăng mă bruă ti anăp Aê Diê. Kyua anei jing êa ƀâo mngưi mdê hjăn pioh yua kơ bruă doh jăk anăn hlei pô ngă soh tui hlue hdră mkra mjing êa ƀâo mngưi amâodah yua soh klei bhiăn êa ƀâo mngưi mdê hjăn anei arăng srăng bi ktlah ñu hŏng phung Israel. Aê Diê mâo hdră leh anăn mta kñăm leh Ñu mâo asăp mtrŭn kơ phung ƀuôn sang Ñu ngă ya mta bruă leh anăn Aê Diê čiăng kơ diñu gưt asăp kluôm ênŭm. Y‑Ađam leh anăn H’Êwơ đing kơ klei jăk Aê Diê, amâo tŭ dưn hlăm bruă gưt asăp Aê Diê leh ƀơ̆ng boh Aê Diê kăm hlăm war Êđen, anăn Aê Diê suôt diñu mơ̆ng war Êden, tŭ klei dleh dlan, tŭ klei djiê kơ pô leh anăn djuê ana anak mnuih hlăm djăp gưl ênuk. Êa ƀâo mngưi pioh hjăn kơ Aê Diê jing klei hriăm, jing klei lông dlăng kơ phung ƀuôn sang Aê Diê.
Jing phung đaŏ kơ Krist, Aê Diê brei kơ drei jing khua ngă yang kơ Ñu (I Y‑Pêtrôs 2:9), Aê Diê bi doh phung drei mơ̆ng êrah yuôm Khua Yang Yêsu, dưi trôč êa ƀâo mngưi doh jăk jing Yang Mngăt Jăk dôk hlăm ai tiê. Drei mâo klei yuôm bhăn dưi nao giăm Aê Diê Tlâo Yang hlăm bruă jing khua ngă yang sang mtao. Aê Diê čiăng kơ drei đăm brei klei mplư ngă kơ drei jing ngơi mang hlue ngă klei bhiăn Aê Diê, leh anăn ăt kăn dưi dlăng hơaĭ mang rei hnơ̆ng čuăn hlăm klei bhiăn jing Klei Aê Diê Blŭ.
Drei jih ai tiê gưt asăp klei Aê Diê mtô hlăm Klei Aê Diê Blŭ leh mơ̆ amâodah ka?
Wah lač: Ơ Khua Yang Yêsu, kâo bi mni lač jăk kơ Ih brei leh kâo dưi jing doh jăk mơ̆ng êrah yuôm Ih! Kâo thâo djăp klei bhiăn Aê Diê brei kñăm ba klei jăk mơak kơ kâo. Akâo kơ Ih đru kâo kriăng hriăm Klei Aê Diê Blŭ leh anăn gưt asăp kluôm ênŭm čiăng thâo klei jăk mơak mơ̆ng klei gưt asăp.
Dlăng Klei Aê Diê Blŭ hlăm tlâo thŭn: Klei Mmuñ Hđăp 99:1-9; 100:1-5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
