II Timôthê 1:3-5
“Inh băt kơ ih lui kơjăp tơpă, kư̆m lei-lăi thoi yă ih Lôih păng mĕ ih Eunik lui sơ̆ mơ̆n. Na dang ei inh băt kơ ih lui kơjăp thoi sư sơ̆ tơpă.” (II Timôthê 1:5)
Nơ̆r jet tơchĕng pơwao:
– ‘Bok Pôl tơ’blŏk ‘bar tơdrong kiơ gah đon lui đei lăm Timôthê?
– Lăm tơdrong ayơ mă đon lui “đơ̆ng mĕ ’bă” ‘noh ba ăn tơdrong ‘lơ̆ng păng ưh kơ ‘lơ̆ng?
– Pơm thoi yơ wă kơ pơjing minh adrĕch đei đon lui yom kơ Kră Yang lăm hnam dơnŏ lu bơ̆n?
Kơ plah Pôl đei ‘blŏk kơ bơngai mă Sư đei krao khan ăn lui sơng iŏk păng sư kư̆m krao khan hăm tơdrong đak măt, Pôl đei pơma ‘bar tơdrong gah Timôthê: Mă mônh noh jơ̆ “bơngai đei đon lui tơpă”, wă khan Timôthê “tơpăt lăm tơdrong lui”. Mă ‘bar, đon lui ‘noh “đei bơih lăm yă Lôit, păng Ơnit mĕ sư; inh lui ngeh kơ đon lui ‘noh kư̆m đei lăm ih” (trong 5). Tơdrong âu tơ ‘bôh ăn Timôthê đei rơneh lăm hnam dơnŏ đei tơdrong lui bơih tơdrong âu jơ̆ ‘lơ̆ng tơpă. Yua kơ đon lui đei ba ăn kơ minh ‘bar jơ-hnơr.
Lăm Sơ̆p hla bơar Nơ̆r ‘Bok Kei-Dei lơ wơ̆t Kră Yang đei pơma thoi âu: “‘Bok Kei-Dei kơ ‘bok Abraham, Y-săk, Jakôp” (LĐ Êyiptơ 3:6, 3:15; Mathiơ 22:32; Markôs 12:26) Jơâu, ‘bok Pôl pơma gah đon lui đơ̆ng yă sư kơdih păng mĕ sư kơ dih đơ̆ng noh truh tơ Timôthê. ‘Bar tơdrong pơma đei tơdrong pơchŭt tơpă, yua kơ đei adrĕch lui kơ Kră Yang ‘Bok Kei-Dei păng bơwei tơdrong lui kơ chăl đơ̆ng rŏng. Đei đon lui kơ rim kơchăl lăm adrĕch adrŭng noh jơ̆ minh tơdrong hơiă dêh păng trŏ kơ bơnê kơ ‘Bok Kei-Dei, păng tơdrong âu kư̆m ăn kơ lu bơ̆n kăl kơ đei tơdrong kơnhăm ăn kơ kon sâu bơ̆n kơdih. Trŏ tơpă đei ‘bôh, lu hnam dơnŏ mă đei đon lui mă khan đei tơ’bơ̆p tơdrong hơnat hơnot, sư gô iung dơ̆ng yua kơ đei tơdrong dŏng tơgŭm hloh kơ lu bơngai mă ưh kơ đei đon lui. Mă lei sơ’ngon tơpă kơplah lăm chăl mĕ ‘bă đei đon lui tơpă mă lei kon sâu kuă kơ lui (nhen thoi kon ‘bok Hêli, kon ‘bok Samuel…), dôm tơdrong đei roi noh jơ̆ sơ’ngon ră mă lei tơ’bôh ăn kơ đon lui mă đei tơpă “đei arih tơpă” lăm ‘bok yă, mĕ ‘bă ưh kơ trŏ đei kơdih đơ̆ng lu sư na truh kơ kon sâu. Thoi noh, Sơ̆p hla bơar Nơ̆r ‘Bok Kei-Dei đei pơm tơ’blŏk kơ lu bơ̆n kăl kơ bơtho kơ kon hơ’lơ̆p bơ̆n ăn kơ lu kon sâu bơ̆n “Athei adrin bơtho ăn dôm tơdrong noh kơ lu kon iĕm păng bơtho tơdrong âu kơplah sư oei lăm hnam, dah oei năm rok trong, dah wă tep, dah iung đơ̆ng tep.” (Bơtho Khôi Juăt 6:7; 11:9).
Dang ei, đei lơ hnam dơnŏ hơiă dêh yua kơ đei đon lui, mă lei kư̆m đei lơ hnam dơnŏ lui mơ̆n “mă lei lui kiơ̆ mĕ ‘bă đĕch’ thoi noh đơ̆ng rŏng kơ’noh ưh kơ bơwei tơdrong arih. Đon lui đơ̆ng mĕ ‘bă trŏ kơ nơ̆r tơblang tơpă sư thoi âu lơ kơ chăl bơwei jơhngơ̆m đon lui noh jơ̆ minh tơdrong trŏ kơ bơnê kơ Kră Yang. Đon lui đei đơ̆ng mĕ ‘bă ưh kơ ‘lơ̆ng jơ̆ lăm tơdrong âu đon lui noh jơ̆ “arih lăm” ‘bok yă, mĕ ‘bă mă lei “ưh kơ arih” lăm chăl kon sâu. Bơnê kơ Kră Yang đei dŏng lu bơ̆n păng dan bơ̆n lăm hnam dơnŏ đei đon lui dah ưh kơ đei đon lui. Mă thoi yơ hĭ, lu bơ̆n kăl kơ bơwei đei đon lui, păng arih pơm kơmĭl ‘lơ̆ng đĭ jơhngơ̆m arih bơtho tơ’bôh kơ kon sâu đơ̆ng rŏng. Tơdah lu bơ̆n hiơ̆k bơngơ̆t bơtho tơ’bôh ăn kơ kon sâu bơ̆n păng ưh kơ hiơt kơ chăl lu kon sâu bơ̆n, Kră Yang gô ăn kơ lu bơ̆n minh chăl arih đei đon lui păng pŭn hiôk.
Ơ Kră Yang, apinh tơgŭm inh wă kơ toiung pơjing lăm hnam dơnŏ đei đon lui tơpă kơlăm hnam dơnŏ inh, wă kơ rim ‘nu bơngai đei đon lui na gơh bơtho tơ’bôh kơ chăl đơ̆ng rŏng dơ̆ng. Yua anăn Kră Yang Yêsu Krist, Amen.
Lu bơ̆n kăl kơ pơm tơdrong kiơ wă kơ pơjing tơiung đon lui mă đei tơpă păng bơwei tơdrong ‘noh ăn kơ chăl đơ̆ng rŏng dơ̆ng?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Sachari 13
Kênh Youtube BHKTHN:
