I Timôthê 4:1-5
“Tôm tơdrong ‘Bok Kei-Dei pơjing ‘lơ̆ng ngăl, bơ̆n gơh sa đĭ đăng” (I Timthê 4:4a)
Nơ̆r jet tơchĕng pơwao:
– Lu bơngai lui druh kiơ̆ tơdrong ưh kơ trŏ ‘noh todrong kiơ?
– ‘Bok Pôl hơmet ming dôm tơdrong bơtho ưh kơ trŏ hăm tơdrong thoi yơ?
– Lu bơ̆n kăl kơ pơm kiơ wă kơ bơwei kơjăp đon lui lăm Kră Yang?
Tơ’bơ̆p hăm tơdrong bơtho ưh kơ trŏ pơdrŭt tơdrong tơchĕng sơngah kơ dôm tơdrong kăl yua gah sĕch akar wă kơ gơh năm jê̆ Kră Yang păng wă kơ jing bơngai ‘lơ̆ng ‘biơ̆, thoi kơ ưh kơ gơh chă klo kăn păng athei gơ̆t ưh kơ gơh sa tơmam ‘nâu tơmam ‘noh (trong 3). ‘Bok Pôl bơtho tơpăt mă kăl dêh gah jơhngơ̆m đon băt dôm tơdrong kiơ đơ̆ng Kră Yang ‘Bok Kei-Dei pơjing: “Tôm tơdrong ‘Bok Kei-Dei pơjig ‘lơ̆ng ngăl” (trong 4).
Athei arih minh ‘nu minh drô̆ ‘noh “trong gơlong yang kơnê̆”, yua kơ ŭnh om ‘noh đơ̆ng Kră Yang pơgơ̆p. Kơplah pơjing plĕnh teh păng tôm tơdrong tơmam, hla bơar Blŭng a pơtôch hăm nơ̆r “Kră Yang ‘Bok Kei-Dei ‘bôh dôm tơdrong ‘noh ‘lơ̆ng” (Blŭng a 1:10, 12, 18, 25). Mă khan lei ră, đơ̆ng rŏng kơ pơjing ‘bok Ađam yă Ewơ păng pơgơ̆p ŭnh om kơ bre sư, Blŭng a 1:31 chih “Kră Yang ‘Bok Kei-Dei ‘bôh dôm tơdrong ‘noh ‘lơ̆ng DÊH tơpă”. Tơdrong mơsêh Kră Yang Yêsu pơm blŭng a ‘noh tơdrong mơsêh năr pơkong klokăn tơ pơlei Kanaan (Yôhan 2:1-12). Yua kơ thoi noh, ŭnh om pơm kiơ̆ lăm Kră Yang ‘noh ‘lơ̆ng dêh, yua kơ thoi noh bơngai “khă kơ iŏk ŭnh om”, lăng tơdrong ŭnh om Kră Yang pơgơ̆p nhen thoi tơdrong pơgăn lăm tơdrong arih gah bơhngol ‘noh “bơngai bơtho hơlĕnh” (trong 2).
Tơdah thoi nơ̆r “khă ưh kơ ăn iŏk ŭnh om” ‘bok Pôl sư lăp tơ’blŏk đĕch ưh kơ đei tơblang thim kiơ, lei tơdrong sŏng sa sư tơblang rơđah păng pơdeh hloh, “athei ơ̆t kơ lu tơmam mă đơ̆ng ‘Bok Kei-Dei pơjing” păng nơ̆r pơma pơsĭt “dôm tơmam ‘Bok Kei-Dei pơjing tă kơ ‘lơ̆ng ngăl, ưh kơ đei tơmam kiơ hŭt lê̆” (trong 3-4). Bơtho athei ĕnh ơ̆t, pơm pơmat akâu jăn sĕch akar wă kơ jing ‘lơ̆ng hloh noh “tơdrong lui đơ̆ng yang kơnê̆”, lu bơ̆n kăl kơ “bơnê” păng sa. Nơ̆r “bơnê” đei pơma ‘bar wơ̆t lăm trong 3 păng 4. Tơplih kơ bơ̆n lăng tơmam sa, ŭnh om thoi tơdrong pơgăn tơdrong arih gah bơhngol bơ̆n, lu bơ̆n kăl kơ “đei jơhgơ̆m lui” păng “băt kơ tơdrong tơpăt sĭt” đĭ dôm tơmam Kră Yang pơjing tă kơ ‘lơ̆ng ngăl (trong 3-4). Pơma pha ‘biơ̆, pơma kơdih kơ tơmam sa, păng lu tơdrong nai dơ̆ng mă ‘Bok Kei-Dei đei pơjing bơih lăm chăl arih kon bơngai, gô đei tơdrong tơplih yua kơ lu bơ̆n hlôh băt trŏ thoi nơ̆r Kră Yang, yua kơ krao khan păng arih hăm jơhngơ̆m băt bơnê (trong 3-5).
Yang Bơhngol ‘Lơ̆ng đei khan rơđah hơđăl, lăm năr hơtuch ei kơnh, đei lơ bơngai sơngah kơ tơdrong lui kiơ̆ tơdrong lui đe bơtho ưh kơ trŏ. Phŏ lăm Khul Bơngai Lui lu bơ̆n dêh hnang kơ lăng tơdrong khă găn ‘nâu, ưh kơ gơh pơm tơdrong kiơ wă wei bơ̆n gơh rơgoh, mălei ưh kơ hiơ̆k pơhơi kơ nơ̆r Kră Yang păng kơ’bah kơ tơdrong krao khan tơ’bưh hăm Kră Yang. ‘Noh jơ năr ‘măn ăn kơ lu bơngai sơngah ưh kơ ră roi tơdrong lui “tơdrong lui kiơ̆ kơ yang kơnê̆”. Kon pơlei Kră Yang kăl kơ đĭ jơhngơ̆m pơ’lơ̆ng wă kơ wei kơjăp đon lui lăm Kră Yang.
Ơ Kră Yang, inh bơnê kơ Kră Yang yua kơ dôm tơdrong Ih tă kơ ‘lơ̆ng ngăl. Apinh Ih tơgŭm inh rim năr rai jê̆ Ih hloh đơ̆ng hŏk pơhrăm băt kơ nơ̆r Ih, krao khan păng arih hăm jơhngơ̆m băt bơnê kơ Ih. Krao khan yua anăn Kră Yang Yêsu Krist, Amen.
Jơhngơ̆m lu bơ̆n hăm dôm tơdrong kiơ Kră Yang ăn kơ bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 10
Kênh Youtube BHKTHN:
