Jôsuê 6:6-20
“Păng bơ̆n ‘nĕ kơ mơ̆ng lăm đon đĕch, khan ‘Bok Kei-Dei kư̆m iŏk. Ưh ôh, bơ̆n mơ̆ng păng pơm kiơ̆ hloi dôm tơdrong đe bơtho, noh na ‘Bok Kei-Dei iŏk.” (Yakơ 1:22)
Nơ̆r jet tơchĕng pơwao:
– Nơ̆r ‘bok Jôsuê athei blŭng a wă blah pơlei Jêrikô gơh kĕ jei ‘noh kiơ?
– Tơdrong kiơ tơgŭm lu kon pơlei Isơrael blah kĕ jei?
– ‘Bai pơhrăm năr ‘nâu tơ’blŏk kơ bơ̆n wă kơ chăng tơdrong kiơ?
Đơ̆ng rŏng kơ sư kơtơ̆ng Kră Yang bơtho khan, ‘bok Jôsuê chu nơ̆r Kră Yang na sư tơtă asong tơdrong jang kơ lu ‘bok soi păng kon pơlei. Lu sư kư̆m chu yom pơm kiơ̆ nơ̆r. Rim năr, sư iung đơ̆ng hrôih năm tăp dăr kiơ̆ thoi Kră Yang athei sư. Adrol hloh ‘noh lu chĕp tơmam tơblah, đơ̆ng rŏng kơ noh tơpơh ‘nu ‘bok soi, rim ‘nu chĕp minh pôm tơgiĕp năm hlôm rah rok trong. Kiơ̆ đơ̆ng rong ‘noh Hom Pơgơ̆p mơ̆ng kơ lu ‘bok soi tung, hơtuch ‘noh lu linh chĕp tơmam tơblah.
Nơ̆r Jôsuê athei blŭng a ‘noh “athei tung bĕ Hom pơgơ̆p” (trong 6), đei tơ’bôh kơ bơ̆n sư lăng Hom Pơgơ̆p ‘noh gĭt kăl dêh yua kơ Kră Yang oei hơdai lăm khul linh tơblah. Đơ̆ng rŏng kơ noh, hom pơgơ̆p ‘nâu đei tơ’blŏk krao anăn “Hom Pơgơ̆p Kră Yang ‘Bok Kei-Dei”. Tơdrong tơplih nơ̆r krao ‘nâu đei pơtih tơdrong pơgơ̆p Kră Yang hăm lu kon pơlei Kră Yang. Hăm ‘nâu kư̆m tơdrong pơtih gah kơdih Kră Yang. Đơ̆ng rŏng kơ noh Hom pơgơ̆p đei tơ’blŏk dơ̆ng tơsĭn wơ̆t đĭ lăm chăl ‘nâu, đei pơma khan tơdah ưh kơ đei Kră Yang oei hơdai tŏk bŏk kon pơlei Sư lei ưh kơ đei kĕ jei. Rim năr, khul linh hăm lu ‘bok soi păng Hom pơgơ̆p năm dăr tăp minh wơ̆t. Lăm kơplah lu ‘bok soi hlôm tơgiĕp lei lu sư pơmơ̆ng hreh. Ding truh năr mă tơpơh, lu sư năm dăr kơ pơlei tơpơh wơ̆t. Lăm năr lu sư năm dăr mă tơpơh, lăp kơplah lu ‘bok soi hlôm tơgiĕp re pơhioi na Jôsuê khan kơ kon pơlei “ôr jreo pơret bĕ, yua kơ Kră Yang jao ăn pơlei âu kơ lu iĕm boih.” (trong 16). Nơ̆r ôr jreo hơdai hăm tơgiĕp re ‘bĕnh kơ đon păng pơlei Jêrikô păk pơchah đĭ kiơ̆ ‘blep trŏ thoi Kră Yang pơkă. Rim ‘nu bơngai Isơrael na tŏk mơ̆t hloi lăm pơlei ‘bơ̆t anăp sư na mơ̆t hloi blah iŏk pơlei.
Kon pơlei Isơrael gơh kĕ jei yua kơ sư mơ̆ng Nơ̆r Kră Yang adrol kơ wă pơm. Sư lui ngeh kơ Nơ̆r Kră Yang păng chu kiơ̆. Sư pơm kiơ̆ kơ đon lui. Lăm tơdrâu năr năm dăr tăp kơ pơlei ưh kơ đei yua minh tơdrong kiơ wă pơrăm pơlei, kư̆m ưh kơ đei ‘bôh minh tơdrong tơdra ayơ nai. Dur pơlei oei thoi đêl. Mălei sư oei hơđơ̆ng kơjăp chu kiơ̆ nơ̆r Kră Yang. Truh năr mă tơpơh, lu sư năm tăp dăr kơ pơlei truh tơpơh wơ̆t. Lu sư hŭt lơ tơdrong jang păng chơ̆n hơđơ̆ng, chu yom nơ̆r Kră Yang. Tuch luch, yua kơ sư đĭ jơhngơ̆m chu kiơ̆ Kră Yang, lu sư gơh kĕ jei.
‘Bai pơhrăm năr ‘nâu wă kơ bơ̆n kơchăng. Phŏ lơ wơ̆t lu bơ̆n ưh kơ đei chơ̆n hơđơ̆ng yua tam mă ‘bôh nơ̆r Kră Yang tơl tơwih, dah mă ‘bôh băt kơ Kră Yang athei mălei ưh kơ wă pơm kiơ̆ yua kơ tơchĕng kiơ̆ kơ tơdrong hơgei bơ̆n kơdih.v.v… na lu bơ̆n ưh kơ kĕ. Athei hŏk pơhrăm nơ̆r Kră Yang. Mơ̆ng nơ̆r Kră Yang, păng chu nơ̆r, pơm kiơ̆ Sư, mă khan lu bơ̆n ưh kơ hlôh đĭ tơdrong tơchĕng Kră Yang, mălei dah bơ̆n lui tơpă kơ nơ̆r Kră Yang đei pơkă bơih, lu bơ̆n kư̆ kơ năm kiơ̆ đon lui, lei tơdrong arih bơ̆n gô kĕ jei.
Ơ Kră Yang, apinh Ih tơgŭm ưh kơ trŏ băt mơ̆ng Nơ̆r Ih đĕch mălei lui păng pơm kiơ̆ lăm tôm tơdrong pơlong lăng, mă pơmat tat, hăm jơhngơ̆m lui kơ Kră Yang gô ăn kiơ̆ kơ jơ năr Kră Yang, krao khan yua anăn Kră Yang Yêsu Krist, Amen.
‘Bơ̆t kơplah minh tơdrong Kră Yang athei nhen thoi ưh kơ yua kiơ kơ bơ̆n kơdih, lei jơhngơ̆m lu bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Aghê 1
Kênh Youtube BHKTHN:
