Klei Aê Diê Blŭ: I Y-Pêtrôs 1:13-16
Êlan kliăng: “Msĕ si phung anak thâo gưt asăp, đăm tui ôh klei tluh diih mâo mphŭn dô hlăk diih ka thâo săng ôh.” (I Y-Pêtrôs 1:14)
Klei êmuh ksiêm mĭn: Si brei phung anak thâo gưt asăp Khua Yang dôk hdĭp? Ya ngă phung anak thâo gưt asăp brei doh jăk hlăm klei dôk dơ̆ng ƀơ̆ng huă? Si Klei Aê Diê Blŭ mđĭ ai drei čiăng năng jing phung anak thâo gưt asăp Khua Yang?
Hlăk êjai dôk guôn hruê Khua Yang Yêsu Krist lŏ hriê, Khua ƀĭng kna Y-Pêtrôs mtă kơ phung đăo kơ Krist mnuih Yuđa leh anăn phung tue dôk hdĭp bru bra djăp anôk snei, brei hdĭp năng jing “phung anak thâo gưt asăp”. Khua ƀĭng kna Y-Pêtrôs yua boh hră anei mñă klei mdê hŏng “phung amâo thâo gưt asăp” (Êphêsô 2:2). Tal sa, phung anak thâo gưt asăp brei bi kjăp klei mĭn, ai tiê, kpĭ mjuăt pô hlăm klei bhiăn, đăo knang kluôm dhuôm kơ klei jăk mơak hlŏng lar Aê Diê brei (êlan 13). Tal dua, phung anak hlăm gŏ sang Aê Diê jing phung mlih mrâo leh, snăn đăm hlue ôh kơ klei tluh soh jhat, jing klei kiă kriê hlăm drei hlăk mphŭn dô hlăk diih ka thâo săng ôh (êlan 14). Tal tlâo, brei hdĭp knuih hdĭp doh jăk hlăm djăp hlăm klei dôk dơ̆ng ƀơ̆ng huă pô, kyua Pô iêô leh drei kbiă mơ̆ng lăn ala soh jhat jing Pô doh jăk (êlan 15).
Hlăm anôk bruă jing phung anak thâo gưt asăp, phung đăo kơ Krist ăt brei knang kơ klei ktang Khua Yang čiăng hdĭp doh jăk grăp hruê. Kyua wăt tơdah jing leh anak Aê Diê, ƀiădah phung đăo ăt khăng tuôm hŏng boh klei “Snăn kâo ƀuh sa mta klei bhiăn snei: tơdah kâo čiăng ngă klei jăk, klei jhat đuôm ti kâo.” (Rôm 7:21). Hdĭp doh jăk jing bruă ngă bi mklă kơ kơhưm jing phung anak thâo gưt asăp kơ Khua Yang. Jing klei bi knăl klă mngač hĭn kơ Pô drei đăo jing Pô doh jăk “Kyuadah Klei Aê Diê Blŭ čih leh, “Brei diih jing doh jăk, kyuadah kâo pô jing doh jăk” (êlan 16). Klei hdĭp doh jăk brei jing klei kñăm kơ phă anôk phung đăo hung nao kyua “Ƀiădah klei anei drei thâo: tơdah Ñu bi êdah, drei srăng jing msĕ si Ñu, kyuadah drei srăng ƀuh Ñu msĕ si Ñu jing” (I Y-Yôhan 3:2b). Đăm ôh hlei pô jing leh anak Aê Diê ƀiădah ăt lŏ hdĭp phưi tha hlue klei pô tluh soh jhat msĕ si êjai ka thâo kral Khua Yang.
Klei Aê Diê Blŭ mđĭ ai drei lŏ dơ̆ng krơ̆ng kjăp klei đăo, ñĕ kơ klei soh, hdĭp năng jing phung anak thâo gưt asăp Khua Yang. Hlăm klei hdĭp, klei soh hŏng klei amâo bi mơak kơ Aê Diê bi đuôm mbĭt nanao, mplư leh anăn čiăng kơ drei hlue ngă. Hlăk êjai anăn, grăp čô phung đăo amâo dưi knang ôh kơ ai ktang pô čiăng dưi hdĭp doh jăk, gưt asăp Khua Yang. Kyua anăn, phung ƀuôn sang Aê Diê brei tui duah Aê Diê lu hĭn hlăm klei wah lač, hriăm Klei Aê Diê Blŭ hŏng klei êpa mhao, ñĕ kbưi kơ klei soh,… Yang Mngăt Jăk yơh srăng đru čiăng kơ drei lŏ jing doh jăk grăp hruê, hdĭp bi guh kơang Anăn Khua Yang, leh anăn dôk guôn klei mưn kluôm ênŭm hlăm hruê Khua Yang Yêsu Krist lŏ hriê.
Si ngă drei dôk bi êdah knuih hdĭp sa čô anak Aê Diê thâo gưt asăp?
Wah lač: Ơ Khua Yang jing Ama thâo pap, doh jăk kâo. Akâo kơ Ih đru kâo hdơr nanao kâo jing phung anak thâo gưt asăp Ih čiăng kơ kâo hdĭp doh jăk hlăm klei dôk dơ̆ng ƀơ̆ng huă. Akâo kơ Ih thiăm klei ktang čiăng kơ kâo lŏ dơ̆ng kpưn phă êlan doh jăk tơl truh hruê bi tuôm hŏng ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
