Rôm 13:1-7
“Đĭ đăng kơ bơ̆n athei chu yom kơ bơngai mă pơgơ̆r bơ̆n. Tơ̆ng ‘Bok Kei-Dei ưh kơ ăn, ưh kơ đei bu gơh pơgơ̆r. Đĭ đăng lu bơngai pơgơ̆r đơ̆ng ‘Bok Kei-Dei ăn ngăl.” (Rôm 13:1)
Nơ̆r jet tơchĕng pơwao:
– Bơngai lui athei chu yom lu bơngai pơgơ̆r yua kơ đơ̆ng kiơ?
– Bơngai lui kăl kơ pơm kiơ wă kơ đei tơdrong tơ’bưh trŏ hăm lu bơngai pơgơ̆r, pơjing iung hơdai lu bơngai tơpôl gơh rơngei păng tơpăt?
Bơngai lui athei chu yom lu bơngai pơgơ̆r, pơm kiơ̆ dôm tơdrong juăt sư đei pơjao ăn yua kơ đơ̆ng ‘Bok Kei-Dei ăn kơ lu sư tơdrong jang pơgơ̆r noh păng pơjao kơ lu sư wă pơgơ̆r tơ ala teh âu (trong 1). Dah bu ưh kơ chu yom lu bơngai pơgơ̆r lăm ala teh âu, na bơngai noh nhen thoi ưh kơ chu yom ‘Bok Kei-Dei jơ̆ Tơ’ngla pơchĕp ăn tơdrong jang noh, na lu bơngai noh đe gô phak sư tơpă (trong 2). ‘Bok Pôl bơtho khan, lu bơngai pơgơ̆r bơ̆n noh lu bơngai đơ̆ng ‘Bok Kei-Dei wơh jang bơwei kon pơlei wă kơ hơđơ̆ng păng bơwei tơdrong juăt lăm teh đak âu. Lu đe bu pơm tơdrong ‘lơ̆ng, chu kơ tơdrong juăt huay kơ hli ôh, mălei lu bơngai pơm kơnê̆ gô hli kơplah lu sư dơ̆ng ‘bơ̆t anăp lu bơngai pơgơ̆r yua kơ lu bơngai pơgơ̆r chĕp tak đao lu sư trŏ tơdrong gơh chĕp (trong 3-4).
Mă khan lei ră, nơ̆r ‘Bok Kei-Dei kư̆m đei tơbăt kơ bơ̆n phŏ kư̆m đei lu bơngai pơgơ̆r jang ưh kơ trŏ, lu sư pơm tơplơ̆ kơ tơdrong juăt đei dan lê̆ bơih, tơplơ̆ kơ đon lui păng tơdrong pơm ‘lơ̆ng lu bơngai lui lăm tơdrong ‘nâu, lu bơ̆n gô rơih iŏk tơdrong juăt trŏ đơ̆ng ‘Bok Kei-Dei. Sơ̆p Hla bơar nơ̆r ‘Bok Kei-Dei đei tơ’bôh kơmĭl Đaniel ‘bok khan lê̆ adrol sư ưh kơ chu kiơ̆ nơ̆r đe athei, rim năr pêng wơ̆t krao khan hăm ‘Bok Kei-Dei (Đaniel 6:1-10). Na Pêtrôs kư̆m tơl nơ̆r mă đe khă găn ră roi anăn Kră Yang thoi âu: “Pêtrôs tơl tang lu bôl sư: “Nhôn athei chu Kră Yang ‘Bok Kei-Dei đĕch, nhôn ưh kơ wă chu kon bơngai ôh.” (Tơdrong jang 5:29).
Bơngai lui kư̆m gơh krao jing kon pơlei Kră Yang pơm kơmĭl ‘lơ̆ng, jang keh tơdrong jang đei pơjao, pŭ hiơ̆k tơdrong jang noh, ăn jên thuê̆ tôm wă apah jên khei kơ lu bơngai pơgơ̆r păng yua lăm tơdrong jang kon pơlei gơh rơnŭk rơnua, hơđơ̆ng păng đei pơyua kơ kon pơlei hai mơ̆n. Kră Yang wă kơ bơ̆n arih ‘lơ̆ng hăm bơngai nai lăm noh đei bơngai pơgơ̆r hai. “Păng yua kơ thoi noh na tơdrong kiơ trŏ kơ bơ̆n ăn, bơ̆n athei ăn; ‘bok pơgơ̆r sư wă iŏk thuê̆ đơ̆ng bơ̆n, bơ̆n athei ăn kơ sư; sư wă kơ bơ̆n pơm kiơ, bơ̆n chu pơm.” (Rôm 13:7).
Thoi noh bơih, wă kơ đei arih hiôk hơđơ̆ng păng đei tơdrong tơ’bưh hăm lu bơngai pơgơ̆r, bơ̆n athei arih trŏ tơdrong juăt Kră Yang ăn. Weh ataih đơ̆ng tơdrong yoch păng chă tơdrong ‘lơ̆ng. Lu bơ̆n chu yom kơ lu bơngai pơgơ̆r păng jang keh ăn jên thuê̆ ưh kơsĭ hli kơ đe phak, mălei mơ̆n lăm jơhngơ̆m, lu bơ̆n chu yom tơdrong Kră Yang athei păng tơdrong pơgơ̆r gơh hơgei đơ̆ng ‘Bok Kei-Dei.
Ơ Kră Yang, kơkuh kơ Ih, Tơ’ngla pơjing lu bơngai pơgơ̆r tơ ala teh. Inh apinh Ih pơchŭt jơhngơ̆m lu bơngai pơgơ̆r wă kơ lu sư băt hli yom kơ Ih păng tơdrong gơh hơgei wă pơgơ̆r trŏ. Apinh Ih tơgŭm inh arih chu yom bơngai pơgơ̆r păng jang keh tơdrong jang, krao khan yua anăn Kră Yang Yêsu Krist, Amen!
Lu bơ̆n hăm chu yom lu bơngai pơgơ̆r păng ăn jên thuê̆ hăm tôm ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 8
Kênh Youtube BHKTHN:
