Mathais 26:36-46
Nqe cim:
“Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis cev nqaij daim tawv qaug zog kawg li” (Mathais 26:41).
Lus nug rau sawvdaws xav: Tswv Yexus coj leejtwg nrog Nws mus thiab muaj homphiaj li cas? Yexus thov Vajtswv thaum Nws nyuaj siab zoo li cas? Tau nqi zog li cas? Lub sijhawm ntawd, tus Tswv peb tug thwjtim tabtom ua dabtsi? Peb kawm tau yam dabtsi hais txog ceevfaj thiab thov Vajtswv?
Tom qab uas nrog cov thwjtim ua Kevcai Hla Dhau zaum kawg, Tswv Yexus coj cov thwjtim nrog Nws mus hauv lub vaj Khexemanes saum roob Txiv Ntoo Roj, qhov chaw uas lawv ibtxwm mus thiab Yudas kuj paub thaj chaw no (Yauhas 18:2). Mus txog qhov ntawd, tus Tswv hais rau cov thwjtim nyob tos Nws, Nws mus tom ntej thov Vajtswv. Cov thwjtim uas tus Tswv coj nrog Nws mus yog Petus, Yakaunpaus thiab Yauhas, peb tug thwjtim no yog peb tug uas nrog tus Tswv nyob saum lub roob uas Yexus hloov cev, thiab pom tus Tswv ua txujci tseemceeb tsa Yailus tus ntxhais sawv rov los. Tus Tswv hais rau lawv hais tias: “Kuv nyuaj siab thiab ntxhov siab kawg li, twb yuav tuag, nej cia li nrog kuv nyob ntawm no tsis txhob tsaug zog” (nqe 38). Lo lus “nrog kuv” qhia paub Nws cheemtsum lawv nrog Nws nyob. Tus Tswv mus tom ntej zog, Nws txhos caug thov Leej Txiv.
Tswv Yexus thov Vajtswv peb zaug tas siab. Nws thov Leej Txiv, yog pom zoo thov tshem lub khob ntawm Nws mus. Qhov no yog lub khob Vajtswv foom tsis zoo thiab tawmtsam kev txhaum (Yaxayas 51:17). Tsis yog Tswv Yexus ntshai muab Nws lub cev ntsia saum ntoo khaublig, ntshai tuag, tiamsis Nws tsis kom Leej Txiv tso Nws tseg thaum ris neeg ntiajteb tej kev txhaum (Mathais 27:46). Dua li ntawd, Tswv Yexus paub Vaj Leej Txiv lub siab xav yog cia Nws tuag theej cov neeg txhaum (II. Kauleethaus 5:21). Txojkev sib tawmtsam hauv lub siab muaj zog heev, Tswv Yexus cov hws thiaj ntws los zoo ib yam nkaus li ntshav, muaj ib tug timtswv los txhawb Nws zog (Lukas 22:43-44). Tus Tswv xaus Nws cov lus thov Vajtswv los ntawm qhov uas mloog lus, “cia ua raws li koj lub siab nyiam” xwb.
Txawm yog muaj peb tug thwjtim nrog Nws, los tshuav Tswv Yexus ib leeg tiv kev txomnyem xwb vim lawv pw tsaug zog tas lawm! Tus Tswv qhia rau lawv paub hais tias“ceevfaj thiab thov Vajtswv” yog ib kob tsovrog sab ntsujplig, yog li cheemtsum yuav tau muaj kev tswj thiaj ua taus siab ntev thov Vajtswv. Yog tsis ua li ntawd, txawm sab ntsujplig muaj zog los sab nqaij tawv qaug zog zis. Ua ntej ntawd cov thwjtim hais khov kho hais tias nrog nraim tus Tswv mus txog hnub tuag, tiamsis hmo uas tus Tswv tiv kev txomnyem thov Vajtswv lawv twb nkees, qhovmuag rua tsis taus vim tsaug zog heev (Malakaus 14:40). Lawv siv tsis taus sijhawm los thov Vajtswv pab rau lawv tus Xibhwb thiab lawv tus kheej. Tsis muaj kev thov Vajtswv ces tsis muaj zog rau tus Tswv sab, yoojyim raug dag ntxias zoo ib yam li Petus tsis lees paub nws tus xibhwb peb zaug (Mathais 26:34-35). Thov Vajtswv pab rau peb tswj tuav lub neej sab ntsujplig los ntawm kev ceevfaj thiab thov Vajtswv kom peb lub neej sab ntsujplig muaj zog thiab kovyeej kev txhaum.
Thov Vajtswv,
Vajtswv, nyuam yaus hlub Koj, xav ua raws li Koj Txojlus qhia. Thov Koj pab nyuam yaus zeem paub nyuam yaus qhov kev qaug zog sab nqaij tawv thiab paub ceevfaj thaum muaj kev dag ntxias, vam khom Koj txhua hnub. Amees.
Peb twb ua tau pestsawg zaug qhov uas ceevfaj thiab thov Vajtswv?
Nyeem Vajluskub peb lub xyoos: Tej Lus Qhia 7
Kênh Youtube BHKTHN:
