Klei Aê Diê Blŭ: Y-Mathiơ 26:36-46
Êlan kliăng: “Kăp răng leh anăn wah lač bĕ, čiăng kơ diih amâo lĕ hlăm klei mplư ôh. Mngăt čiăng snăk, ƀiădah kđeh jing awăt.” (Y‑Mathiơ 26:41).
Klei êmuh ksiêm mĭn: Hlei pô Khua Yang Yêsu jak ba nao mbĭt hŏng Ñu leh anăn ya klei Ñu kñăm čiăng? Si klei Khua Yang bi blah hlăm klei wah lač? Ya boh tŭ dưn mâo? Êjai anăn, ya klei tlâo čô ƀĭng kna sŭk suôr hŏng Khua Yang dôk ngă? Ya klei hriăm kơ drei mơ̆ng klei kăp răng leh anăn wah lač?
Leh ruê̆ Knăm Ƀơ̆ng Klei Găn knhal tuč mbĭt hŏng phung ƀĭng kna, Khua Yang Yêsu jak ba diñu nao mbĭt kơ war mnga Gêtsêmanê ti čư̆ Ôliwơ, jing anôk diñu juăt nao leh anăn Y-Yuđas thâo mơh anôk anei (Y‑Yôhan 18:2). Truh tinăn, Khua Yang brei phung ƀĭng kna dôk guôn, bi Ñu nao kbưi hĭn ƀiă čiăng wah lač. Khua Yang jak ba mbĭt hŏng Ñu phung khua ƀĭng kna Y-Pêtrôs, Y-Yakơ leh anăn Y-Yôhan jing tlâo čô ƀĭng kna hlăk êlâo tuôm dôk mbĭt leh hŏng Khua Yang ti čư̆ anôk Khua Yang mâo klei bi mlih asei mlei, leh anăn tuôm ƀuh ti anăp ală mta klei yuôm bhăn Khua Yang iêô anak mniê Y-Jairus kgŭ lŏ hdĭp. Khua Yang lač kơ diñu: “Ai tiê Kâo ênguôt snăk păt čiăng djiê; dôk tinei leh anăn kăp răng mbĭt hŏng Kâo.” (êlan 38). Boh blŭ “mbĭt hŏng Kâo” bi êdah klei Khua Yang čiăng mâo diñu dôk mbĭt leh anăn đru Ñu. Leh anăn Khua Yang nao kbưi ƀiă, buôn kŭp ƀô̆ ti lăn, wah lač hjăn hŏng Aê Diê Ama.
Khua Yang Yêsu wah lač tlâo blư̆ kwưh hŏng jih ai tiê. Ñu akâo kơ Ama, tơdah dưi, mă mđuĕ hĕ mơ̆ng Kâo atŏ anei. Anei jing atŏ klei Aê Diê ngêñ bi kdơ̆ng hŏng klei soh (Y‑Êsai 51:17). Amâo djŏ ôh kyuadah Khua Yang Yêsu huĭ kơ klei ruă knap asei mlei ti kyâo bi kal, huĭ kơ klei djiê, ƀiădah Ñu amâo čiăng ôh Aê Diê Ama lui Ñu tơdah Ñu klam brei klei soh phung mnuih (Y‑Mathiơ 27:46). Tĭng mkăn, Khua Yang Yêsu thâo klei Aê Diê Ama čiăng jing, brei Ñu tŭ klei djiê hrô kơ mnuih soh (II Kôrantô 5:21). Klei bi blah hlăm lam ai tiê ktang tĭt, tơl êa kơhŏ Ñu jing msĕ si kdrah êrah, sa čô dĭng buăl jăk hriê lŏ thiăm brei klei ktang kơ Ñu (Y‑Luk 22:43‑44). Khua Yang bi ruê̆ klei Ñu kwưh akâo hŏng ai tiê đup gưt kluôm dhuôm, “amâo djŏ tui si Kâo čiăng ôh, ƀiădah tui si Ih čiăng”, leh anăn “Brei truh tui si Ih čiăng” !
Wăt tơdah mâo tlâo čô ƀĭng kna ti djiêo, ƀiădah Khua Yang bi blah hjăn păn kyuadah diñu dôk pĭt! Khua Yang mblang kơ diñu ƀuh “kăp răng leh anăn wah lač” jing sa klei bi blah hlăm mngăt, kyuanăn brei mâo klei kpĭ mjuăt pô kơh dưi dôk kjăp wah lač. Tơdah amâo snăn, wăt tơdah mngăt čiăng snăk ƀiădah kđeh srăng jing awăt. Êlâo kơnăn phung khua ƀĭng kna čuăn dôk sĭt suôr yơh hŏng Nai diñu tơl djiê, ƀiădah mlam anăn mtam mơh êjai Khua Yang dôk bi blah hlăm klei wah lač, bi diñu lĕ êmăn êmik, ală amâo dưi mblang ôh kyua čiăng pĭt đei (Y‑Markôs 14:40). Diñu amâo dưi ôh pioh sa mmông wah lač brei kơ Nai diñu leh anăn kơ diñu pô. Kƀah klei wah lač srăng kƀah klei ktang hlăm mngăt ai tiê mơ̆ng Khua Yang, ênưih snăk lĕ hlăm klei yang jhat mplư msĕ si Y-Pêtrôs hngah kơ Nai ñu tlâo blư̆ čiăng bi mtlaih ñu pô (Y‑Mathiơ 26:34‑35). Akâo kơ Khua Yang brei drei krơ̆ng kpĭ mjuăt mngăt ai tiê hlăm klei kăp răng leh anăn wah lač čiăng mă tŭ nanao klei ktang mngăt myang mơ̆ng Aê Diê leh anăn dưi hĭn hŏng klei mplư.
Dŭm blư̆ leh drei dưi krơ̆ng kpĭ mjuăt pô kăp răng leh anăn wah lač?
Wah lač: Ơ Khua Yang, kâo khăp kơ Ih sĭt, kâo čiăng gưt ngă tui si Klei Ih Blŭ. Akâo Khua Yang đru kâo thâo săng klei awăt hlăm kđeh kâo, kăp răng đăm lĕ hlăm klei yang jhat mplư, brei kâo knang nanao kơ klei ktang Khua Yang grăp hruê.
Dlăng Klei Aê Diê Blŭ hlăm tlâo thŭn: Khua Pô Mtô 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
