Mathiơ 26:14-16
“Đơ̆ng kơplah noh hloi Juđa chă tơdrong plơ̆ plĕch Yêsu.” (Mathiơ 26:16)
Nơ̆r jet tơchĕng pơwao:
– Mathiơ jơ̆ng ‘bang Kră Yang tơbăt yua kơ lu tơdrong kiơ pơm kơ Juđa Ikariôt plơ̆ plĕch Kră Yang?
– Dang ei, phŏ kơnh lu bơ̆n “tĕch” Kră Yang, bơ̆n tĕch thoi yơ?
Mathiơ jơ̆ng ’bang Kră Yang roi hơđăl anăn bơngai mă hlôi plơ̆ plĕch Kră Yang, noh Juđa Ikariôt, sư kư̆m lăm mơjĭt ‘bar nu jơ̆ng ‘bang Kră Yang noh mơ̆n (trong 14). Nơ̆r Mathiơ chih roi tơdrong Juđa Ikariôt plơ̆ plĕch Kră Yang noh yua kơ đơ̆ng lu tơdrong tơ ala âu: Mă minh, Ju đa ‘nâu sư jơ̆ng ‘bang Kră Yang, mă-lei sư lăng hơi dêh tơdrong Kră Yang mơnat kơ sư phara kơ hmă noh. Sư ‘nâu Kră Yang rơih sư păng ăn kơ sư kiơ̆ Kră Yang, sư kơtơ̆ng nơ̆r Kră Yang Yêsu pơma bơtho noh sư kơtơ̆ng kơtă tơm măt, kơtơ̆ng ‘bơ̆r Kră Yang bơtho to âu hloi, gơh đei oei hơdai hăm Kră Yang đĭ kơ khei sơnăm mă Kră Yang jang tơdrong Sư tơ teh đak âu. Mă-lei hăm Juđa, sư lăng lu khei sơnăm mă sư kiơ̆ Kră Yang, oei hơdai Kră Yang noh sư tơchĕng sư glăi bơih yua kơ kiơ̆ ngôi minh ‘nu bơngai mă ưh kơ ba ăn tơdrong lơi yua kơ sư gah mŭk tơmam lăm teh đak‘nâu. Mă ‘bar, ‘bok Juđa sư bơngai ham kơ jên tơmam dêh păng chơchă wă kơ đe ư-ang kơ anăn sư.
Minh ‘nu Mathiơ đĕch roi pơdeh sele kơsô̆ jên mă Juđa đei iŏk đơ̆ng lu ‘bok soi ăn kơ sư ‘bơ̆t Sư tĕch Kră Yang noh. Kơsô̆ jên ‘nâu ưh kơ mah tih, ưh kơ mah lơ dêh ră yua kơ pêng jĭt hlak jên hu ‘noh atŏ hăm kơsô̆ jên đe duh minh kơ̆l bơngai đĭch đe đĕch (LĐ Êyiptơ 21: 32). Mơnat dêh, jĭ jơhngơ̆m dêh ‘bơ̆t Juđa drơ̆ng tĕch lê̆ Pơtao pơgơ̆r plĕnh teh, tĕch chă jên! Mathiơ chih roi tơdrong Juđa ham kơ jên ‘bơ̆t Juđa pơrơ̆ng chă tơ’bơ̆p lu ‘bok soi na pơma pơdrơ̆ng băl ‘long jên mă sư tĕch Kră Yang ,noh, Juđa khan thoi âu: “Dah inh đei rôp ăn kơ iĕm Yêsu, iĕm apah inh dôm yơ?” (trong 15). Lăp Juđa hăm lu ‘bok soi drơ̆ng băl pêng jĭt hlak jên hu bơih, Mathiơ tơbăt kơ bơ̆n thoi âu: “Đơ̆ng kơplah noh hloi Juđa chă tơdrong plơ̆ plĕch Yêsu.” (trong 26). Tơdrong ‘nâu tơ’bôh kơ bơ̆n, kơdih Juđa pơrơ̆ng ‘mơ̆i păng sư chơchă jơ trŏ lăp ‘bơ̆t yơ ei gơh tĕch Kră Yang, sư tĕch hloi Kră Yang jơ ‘noh, tĕch chă jên. Na tuch luch sư, sư tĕch Kră Yang pêng jĭt hlak jên hu!
Dang ei, bơ̆n ưh kơ đei tĕch Kră Yang thoi ‘bok Juđa ră, mă-lei tơdrong plơ̆ plĕch dah tơblơ̆ lê̆ Kră Yang noh phŏ oei đei tơ lăm chăl arih bơ̆n. Trŏ kơ sơ’ngon dêh tơdah dang ei bơ̆n âu đe anăn bơ̆n bơngai lui, Bơngai Krist, mă-lei bơ̆n kiơ̆ Kră Yang nhen thoi kiơ̆ khul tơdrong lui đĕch. Bơ̆n ưh kơ băt hloi tơdrong Kră Yang mơnat kơ bơ̆n, Sư ăn kơ bơ̆n băt kơ Sư, ăn kơ bơ̆n gơh oei lăm hnam Sư. ‘Bok Pôl jơ̆ng ‘bang Kră Yang hlôi tơ’blŏk thoi âu: “Bơ̆n klaih đơ̆ng tơdrong yoch oei hiôk hăm ‘Bok Kei-Dei, yua kơ ‘Bok Kei-Dei ‘mêm mơnat kơ bơ̆n na Sư pơklaih, yua kơ bơ̆n lui păng gơnang kơ Yêsu tơpă na Sư mơnat. Ưh kơ sĭ bơ̆n gơh klaih kơdih ôh, mă-lei tơdrong noh Sư ăn đĕch” (Êphêsô 2:8).Yua kơ thoi noh bơih, tơdah bơ̆n kiơ̆ Kră Yang mă-lei lăng gĭt găl dêh tơdrong wă kơ đe ư-ang kơ anăn bơ̆n, wă kơ đei lơi yua kơ bơ̆n mŭk drăm lăm lăm teh đak âu,wă kơ đei tơdrong jang tih, wă kơ jing bơngai pơgơ̆r đe tơ ala teh âu, ưh kơ lăng gĭt Kră Yang. tĕch lê̆ Kră Yang wă kơ đei kơ bơ̆n dôm tơdrong bơ̆n ‘maih wă ‘noh hei. Bơ̆n kư̆m oei hơnơ̆ng kơ năm tơ hnam akŭm, krao khan, pơyơ̆r jên tơmam, phŏ kơnh bơ̆n chĕp tơdrong jang tih tơ lăm Hnam akŭm tăm, mă-lei tă tơ arih ‘bơ̆r đak klak ŭnh chă pơpơm gah ‘nguaih đĕch, khan ‘mêm kơ Kră Yang mă-lei tă tơ plơ̆ plĕch Kră Yang,khan ‘mêm kơ ‘nhŏng oh mă-lei tă tơ pơrăm ‘nhŏng oh, hơdai pôm đon hăm lu bơngai pơm yoch wă kơ lơi yua ăn kơdih akâu.v.v… Dôm tơdrong ‘noh hei kư̆m wă khan: tơdah bơ̆n kiơ̆ Kră Yang mă-lei tă tơ dan tơdrong lơi yua ăn kơ akâu bơ̆n kơdih hloh kơ wă lơi yua ăn kơ Kră Yang; mưh bơ̆n hăt wă kơ lơi yua tơdrong tơmam ala teh na plơ̆ plĕch Kră Yang păng plơ̆ plĕch ‘nhŏng oh bơ̆n lei ‘noh bơ̆n tŏk-bŏk tĕch Kră Yang ưh kơ phara kiơ kơ ‘bok Juđa Ikariôt sơ̆! Apinh Kră Yang ăn kơ bơ̆n ling-lang ‘bôh tơdrong mơnat Sư ăn kơ bơ̆n noh tih dêh hnang wă kơ bơ̆n băt bơnê kơ Sư,wei jơhngơ̆m lui tơnăp kơjăp dĭng truh đĭ chăl arih.
Kơkuh kơ Ih Kră Yang Yêsu mă inh ‘mêm, inh bơnê kơ Ih hlôi pơklaih inh bơih, Apinh Ih ling-lang tơgŭm inh ‘blŏk huay kơ hiơt tơdrong Ih mơnat,kiơ̆ Ih tơnăp kơjăp dĭng đĭ chăl arih.Apinh Ih ‘nĕ kơ ăn inh đei nơ̆r pơma, tơdrong pơm sơngah kơ Ih dah tĕch lê̆ Ih.Inh krao khan yua anăn Kră Yang Yêsu Krist, Amen!
Bơ̆n tơ’bôh jơhngơ̆m lui kiơ̆ Kră Yang tơnăp kơjăp noh, bơ̆n tơ’bôh liơ?
Đŏk Sơ̆p hla bơar ‘BokKei-Dei lăm pêng sơnăm: II Kôrintô 2
Kênh Youtube BHKTHN:
