Mathiơ 19:23-26
“Yêsu lăng lu sư păng khan: Kon bơngai ưh kơ gơh mơ̆t kơdih tơ dêh char ‘Bok Kei-Dei ôh, dah ‘Bok Kei-Dei ưh kơ pơklaih yoch sư. ‘Bok Kei-Dei pơklaih yoch sư na sư gơh mơ̆t, yua kơ ‘Bok Kei-Dei gơh pơm tôm tơdrong.” (Mathiơ 19:26)
Nơ̆r jet tơchĕng pơwao:
– Kră Yang khan thoi yơ gah bơngai mơdrŏng?
– Kră Yang wă bơtho tơdrong kiơ đơ̆ng tơdrong pơtih gia “Aseh Lăkđa păng “Bơlôh jrŭm”?
– Bơ̆n đei hŏk iŏk tơdrong bơtho yă kiơ kơ bơ̆n?
Đơ̆ng rŏng kơ bơngai tơdăm sơ’ngon lĕch brŏk, Kră Yang Yêsu khan kơ lu bơngai pơhrăm păng Sư “Lu bơngai mơdrŏng wă mơ̆t tơ dêh char ‘Bok Kei-Dei pơgơ̆r anat dêh” (trong 23). Kră Yang wă pơma khan ưh kơ gơh gơnang kơ mŭk tơmam na wă tơplih iŏk minh anih lăm pơlei ‘lơ̆ng. Sư yua iŏk tơdrong pơtih gia aseh Lăkđa jơ̆ minh sem dơrong tih păng bơlôh jrŭm ‘noh iĕ đĕch, minh tơdrong juăt kơ pơtih gia hăm lu bơngai Juđê, wă pơma hơđăl gah tơdrong minh ‘nu bơngai mơdrŏng ưh kơ gơh yua iŏk đơ̆ng tơdrong pơm ‘lơ̆ng kơdih wă mơ̆t tơ dêh char ‘Bok Kei-Dei.
Lu bơ̆n tơchĕng jet yua kơ kiơ Kră Yang Yêsu lăp pơma kơ bơngai mơdrŏng đĕch, păng hăm trŏ đĭ đăng lu bơngai đei mŭk tơmam tă kơ ưh kơ gơh mơ̆t tơ Dêh char ‘Bok Kei-Dei ngăl dah kiơ? Kră Yang ưh kơ đei wă pơma thoi noh ôh. Mălei Sư wă pơma kơ mơdrŏng nai mơ̆t tơ Dêh char ‘Bok Kei-Dei. ‘Bar tơdrong pơgăn tơm kăl hăm bơngai mơdrŏng. Mă mônh, noh đơ̆ng jơhngơ̆m ham kơ mŭk tơmam păng jên kăk; jơhngơ̆m ham pơm kơ bơngai mơdrŏng ưh kơ pơ̆n tơplih pơđĭ wă kiơ̆ Kră Yang ôh. Jơhngơ̆m ham ưh kơ khan huay bơih ôh păng yua kơ đơ̆ng jơhngơ̆m ham hơpơi lơ tơdrong ‘maih wă păng pơm kiơ̆ kơ jơhngơ̆m kon bơngai, pơm kơ kon bơngai jing đĭch kơ jên tơmam, wă kơ đei tôm mŭk tơmam mơdrŏng (I Timôthê 6:6-10. Tơdrong pơgăn mă ‘bar, ‘noh gơnang kơ dôm mŭk tơmam păng jên kăk; lu bơngai mơdrŏng ‘bônh kơ ngeh dêh khan mŭk tơmam, jên kăk; gô pơsĭt kơ lu sư tôm tơdrong mă khan gah bơhngol. Thoi tơdrong hơ’mon kơ bơngai mơdrŏng kơtul (Luka 12:16-21). Kơlih kơ thoi noh lu sư ưh hiơ̆k tơtăm kơ ‘Bok Kei-Dei, ưh kơ kăl kơ tơdrong mơnat ăn tơdrong yoch wă kơ đei tơdrong arih ling lang.
Nơ̆r Kră Yang Yêsu bơtho pơm kơ lu bơngai pơhrăm păng Sư mơ̆ng hlĭch dêh noh lu bơngai Juđê đei kơtơ̆ng mơ̆ng đe bơtho kơ lu sư khan lu bơngai mơdrŏng ‘Bok Kei-Dei ăn tơdrong pŭn hiôk kơ lu sư, mălei khan ưh kơ gơh mơ̆t tơ Dêh char ‘Bok Kei-Dei lei na bĕ lu bơngai dơnuh hin ưh pă đei hơmĕng kiơ bơih, lei đe bu gơh dŏng pơklaih? Kră Yang Yêsu đei tơl khan kơ lu bơngai pơhrăm păng Sư, “kon bơngai ưh kơ gơh mơ̆t kơdih tơ Dêh char ‘Bok Kei-Dei ôh, dah ‘Bok Kei-Dei ưh kơ pơklaih yoch sư. ‘Bok Kei-Dei pơklaih yoch sư na sư gơh mơ̆t, yua kơ ‘Bok Kei-Dei gơh pơm tôm tơdrong” (trong 26). Kơplah minh ‘nu bơngai mă hli yom kơ Kră Yang ‘Bok Kei-Dei, Sư bơih gô tơplih lăm jơhngơ̆m tơdrong tơchĕng păng tơdrong lu sư pơm. Lu sư mơn băt kơdih yoch păng chă Kră Yang wă apinh Sư mơnat, đơ̆ng tơdrong bơ̆n tơbral, lu sư gô đei tơdrong arih ling lang păng gơh oei tơ pơlei ‘lơ̆ng hăm Sư. Tơdrong Kră Yang ăn tơdrong dŏng pơklaih kiơ̆ kơ đon lui ưh kơsĭ kiơ̆ kơ tơdrong mơdrŏng ôh.
Apinh Kră Yang ăn kơ bơ̆n chih răk Nơ̆r Kră Yang bơtho lăm I Timôthê 6:6-10 wă kơ bơ̆n huay kơ hưch ham kơ mŭk tơmam păng kư̆m ưh kơ gơnang kơ đơ̆ng mŭk tơmam, mălei gơnang kơ Kră Yang ‘Bok Kei-Dei jơ̆ tơdrong tơgŭm dŏng bơ̆n. (Hơriso 54:4).
Ơ Kră Yang, kơkuh kơ Ih, inh apinh Ih tơgŭm ăn kơ inh chu kiơ̆ Ih wă kơ Ih tơplih jơhngơ̆m inh, tơdrong tơchĕng păng tơdrong inh pơm. Tơgŭm inh kĕ jei hloh đơ̆ng tơdrong pơgăn pơm kơ inh ưh kơ gơh kiơ̆ Ih tôm tơdrong, yua anăn Kră Yang Yêsu Krist, Amen!
Đei tơdrong pơgăn kiơ oei pơgăn bơ̆n chu kiơ̆ Kră Yang, gơnang kơ Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 16
Kênh Youtube BHKTHN:
