Bơtho Khôi Juăt 33:6-25
“’Nâu nơ̆r Môis, bơngai Kră Yang ‘Bok Kei-Dei, sơkat ăn pŭn hiôk kơ kon pơlei bơngai Isơrael adrol kơ sư wă lôch.” (Bơtho Khôi Juăt 33:1)
Nơ̆r jet tơchĕng pơwao:
– Hla bơar Khôi juăt, lăm chăl 33 ‘nâu hei tơm sư wă pơma kơ tơdrong kiơ?
– Dôm nơ̆r Môis sơkat ăn kơ rim adrĕch bơngai Isơrael noh tơ’bôh kơ bơ̆n jơhngơ̆m bơngai awih awăn thoi yơ?
– Wă kơ jing bơngai awih awăn tơpăt tơpă, bơ̆n athei pơm kiơ?
Lăm chăl 33 ‘nâu hei, đei chih roi dôm tơdrong ‘bok Môis đei sơkat ăn kơ rim khul adrĕch bơngai Isơrael. ‘Nâu bơih dôm lu nơ̆r tuch luch đơ̆ng ‘bă gah bơhngol sơkat ăn kơ lu kon sư gah bơhngol adrol kơ wă kơtĕch jơhngơ̆m. Bơ̆n đŏk lăng dôm nơ̆r Môis sơkat ‘nâu, bơ̆n ‘bôh ưh kơ pôm lu nơ̆r sơkat ‘lơ̆ng đĕch ôh, mă-lei lăm noh sư hlôh hơđăl kơnăl tôm jơhngơ̆m tơdrong arih rim kơ khul adrĕch phara băl lăm bơngai Isơrael. Tơdrong ‘nâu kư̆m ‘bônh kơ hlôh mơ̆n yua kơ Môis đêl mơn chông anhăk lu sư loi kơ puăn jĭt sơnăm chơtăng, sư băt hơđăl kơ tơdrong anat anot, dôm lu tơdrong pơlong lăng mă lu sư tơ’bơ̆p; dôm lu tơdrong mă lu sư hơpơi wă, dôm tơdrong lu sư khăng kơ̆l, păng ling-lang ưh kơ chu pơm kiơ̆ nơ̆r Kră Yang ‘noh. Sư kư̆m bơngai băt hơđăl kơ tơdrong kiơ mă ‘lơ̆ng ngơngei ăn kơ chăl arih lu sư mơ̆n, păng sư oei sa, hơmet dôm tơdrong lu đe ei hăm jơhngơ̆m tơpăt tơpă. Noh ră, mă-lei Kră Yang kư̆m yua bơngai nai chông anhăk lu kon pơlei, mă-lei dah ưh kơ đei ‘Bok Kei-Dei năm hơdai, lei kon pơlei Sư wă tŏk đak Krong Jôrđăn ưh kơ gơh hlôi ôh. Bơ̆n gơh pơma khan lăm dôm nơ̆r Môis sơkat lơlang lơlap ‘nâu hei wă tơ’bôh chông kon pơlei pơgơ̆p tơlir kơjăp hăm Kră Yang, ngơk lăng chang gô tơdrong Kră Yang dŏng tơgŭm, tuh pŭn hiôk kơ lu sư tơ anăp kơnh. Tơdrong ‘bok Môis jang pơm mă hơtŭt mơn dêh lăm jơhngơ̆m bơ̆n noh, truh tơ jơ phŭt tuch luch lăm chăl arih sư noh sư ưh kơ tơchĕng hiơ̆k ăn hơpơi wă sư kơdih, mă-lei tơchĕng hiơ̆k ăn kơ kon pơlei Kră Yang wă kơ gơh đei arih pŭn hiôk lăm Dêh Char mă Kră Yang pơkă wă ăn noh, păng arih trŏ kơ kon pơlei Kră Yang ’Bok Kei-Dei, kon pơlei ‘lơ̆ng tơpăt.
Bơngai mă awih awăn tơpăt tơpă, bơngai noh ling-lang băt tơchĕng, hiơ̆k ăn kơ tơdrong kăl wă kơ lăm hnam Kră Yang, tơdrong arih gah bơhngol kon pơlei Kră Yang hloh kơ tơchĕng hiơ̆k kơ tơdrong kăl wă kơdih akâu (Philip 2:4). Rim ‘nu bơ̆n ‘nâu tă kơ bơngai awih awăn kơ Kră Yang, bơwei minh khul triu lơ dah tŏ sĕt mă Kră Yang pơjao. Wă kơ jing bơngai awih awăn tơpăt tơpă thoi ‘bok Môis, tơdrong kăl dêh noh pơgơ̆p tơlir bơ̆n kơjăp hăm Kră Yang. Yua Kră Yang Tơ’ngla rơih iŏk bơ̆n, krao bơ̆n yak mơ̆t lăm tơdrong jang awih awăn kơ Sư, lei tơdah bơ̆n dơnuh lăm tơdrong pơgơ̆p tơ’bưh hăm Kră Yang, bơ̆n ưh kơ pơ̆n arih chu iŏk anat, ưh kơ pơyơ̆r đĭ jơhngơ̆m wă awih awăn kơ khul triu mă Kră Yang pơjao kơ bơ̆n.Păng gĭt kăl pơtrơp kơ ‘noh dơ̆ng, bơ̆n ‘moi rok đêl jơ̆ng Kră Yang Yêsu ‘Bok mă chu achăng lê̆ tơdrong Sư atŏ hăm ‘Bok Kei-Dei, achăng lê̆ Sư kơdih, Sư iŏk đon ala jur jing kon bơngai, păng chu phep đep yom thoi bơngai đĭch đe, akâu akar Sư lei-lăi thoi kon bơngai păng Sư iŏk đon ala, chu ‘Bok Kei-Dei ling-lang truh tơ Sư lôch, mă lôch tơ ‘long pơglang tăm.(Philip 2:5-11). Bơ̆n athei pơgơ̆p kơjăp hăm Kră Yang păng rok kiơ̆ kơmĭl Kră Yang wă kơ jing bơngai awih awăn tơpăt tơpă.
Kơkuh kơ Ih Kră Yang, Tơ’ngla mă krao inh jing bơngai awih awăn kơ Ih lăm lu tơdrong jang tih iĕ, phara băl. Apinh Ih tơgŭm inh tơ’bưh kơjăp hăm Ih, ‘moi rok kiơ̆ jơ̆ng Ih, wă kơ jang đĭ jơhngơ̆m dŏng khul triu mă Ih pơjao. Inh krao khan yua anăn Kră Yang Yêsu Krist, Amen!
Bơ̆n tŏk-bŏk awih awăn ăn kơ Khul triu mă Kră Yang pơjao kơ bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnă: Êsai 7
Kênh Youtube BHKTHN:
