Mathiơ 22:41-46
“Linh jang ‘lơ̆ng ei khan kơ sư dơ̆ng: Gô đei Yang Bơhngol ‘Lơ̆ng jur tơ ih, tơdrong mơsêh mơyang mă ‘Bok Kei-Dei wă ăn kơ ih. Thoi noh na kon nge mă ih tơpŭ noh, Sư Kon ‘Bok Kei-Dei mă ‘lơ̆ng tơpăt.” (Luka 1:35)
Nơ̆r jet tơchĕng pơwao:
– Lu bơngai Pharisi tơl thoi yơ kơplah Kră Yang Yêsu jet lu sư ‘Bok Krist kon bu?
– Kră Yang tơblang ăn kơ lu sư thoi yơ?
– Lu bơ̆n arih lơ liơ dah bơ̆n băt kơnăl kơ Kră Yang Yêsu Sư Kon ‘Bok Kei-Dei?
Đơ̆ng rŏng kơ Sư tơl tơwih nơ̆r jet lu thây bơtho tơdrong juăt khan ‘mêm kơ Kră Yang păng ‘mêm kơ kon bơngai ‘noh tơm kăl lăm tơdrong juăt ‘bok Môis păng lu nơ̆r ‘bok khan lê̆ adrol, Kră Yang Yêsu jet dơ̆ng lu bơngai Pharisi oei ngôi jum dăr kơ Sư: “Gah ‘Bok Krist, iĕm tơchĕng thoi yơ? Sư kon bu?” Lu bơngai Pharisi tơl hloi Kră Yang “Kon sâu pơtao Đawit”, yua kơ lu ‘bok thây bơtho tơdrong juăt đe Juđê khan Yang Mêsi mă ‘Bok Kei-Dei wơh pơm Pơtao (Markôs 12:35). Hăm tơdrong lu sư lăng ‘bôh thoi âu, lu bơngai Pharisi sư lăng ‘Bok Krist jơ̆ minh ‘nu bơngai phara ‘biơ̆. Kră Yang Yêsu tơ’bôh tơdrong lu sư bơtho ưh kơ trŏ, dah Kră Yang Yêsu Sư minh ‘nu bơngai hmă đĕch, đe tơpŭ kơ Sư lăm adrĕch adrung Pơtao Đawit lei yua kơ liơ lăm Hơriso 110:1 kơdih akâu Pơtao Đawit đei Yang Bơhngol ‘Lơ̆ng ăn kơ sư pơma khan ‘Bok Krist, wă khan Yang Mêsi Sư bơih Yŏng kơplah sư pơma: “Kră Yang Sư yŏng inh…” “Oei gah ‘ma kơ Inh bĕ! Ding truh tơ Inh dan lu ayăt kơ ih tơ ala kơnơl jơ̆ng ih.”(trong 44). Yang Mêsi oei gah ‘ma kơ ‘Bok Kei-Dei. Yua kơ Yang Mêsi tih hloh kơ Pơtao Đawit păng Kră Yang Sư bơih kon ‘Bok Kei-Dei na Pơtao Đawit kư̆m pơyom pôk pơư Kră Yang pơm Yŏng Tơ’ngla sư.
Lu bơngai Pharisi sư lui kơ Yang Mêsi kon sâu Pơtao Đawit kiơ̆ kơ tơdrong juăt đĕch, ưh kơ trŏ lu sư tơchĕng kơ Nơ̆r Kră Yang lăm Sơ̆p hla bơar ‘Bok Kei-Dei đei pơma gah Yang Mêsi. Lu sư hơpơi Yang Mêsi jur wă tơplih hơmet bơngai Rôm pơgơ̆r păng pơm pơtao lu bơngai Juđê. Kơplah Kră Yang Yêsu tơ’bôh tơdrong ưh kơ trŏ lăm nơ̆r lu bơngai Pharisi bơtho gah Yang Mêsi, na “ưh kơ đei bu pơma minh nơ̆r, păng đơ̆ng năr ‘noh, ưh kơ đei bu pơ̆n jet Sư dơ̆ng bơih” (trong 46).
Dang ei, lu bơngai ưh tam mă lui kơ Kră Yang Yêsu sư kư̆m tam mă kơnăl kơ Kră Yang, mălei lu bơ̆n khan bơ̆n bơngai lui kơ Kră Yang Yêsu, lei bơ̆n kăl kơ băt kơnăl gah Kră Yang, yua kơ đơ̆ng bơ̆n băt kơ Kră Yang tơpă na bơ̆n gơh đei jơhngơ̆m lui kơ Kră Yang tơpă. Kơplah bơ̆n băt kơnăl kơ Kră Yang Yêsu jơ̆ ‘Bok Dŏng Pơklaih bơ̆n Sư bơih Kon ‘Bok Kei-Dei, lu bơ̆n băt bơnê kơ Sư yua kơ Sư rơih iŏk lu bơ̆n, huai iŏk bơ̆n, ăn kơ lu bơ̆n gơh jing kon Sư, păng bơ̆n gô oei hơdai Sư tơ pơlei ‘lơ̆ng lăm năr ‘Bok Krist jur dơ̆ng, hăm tơdrong bơ̆n băt kơnăl tơpă thoi noh, lu bơ̆n athei kơkuh kơ Sư, krao khan tơ’bưh hăm Kră Yang, pơnam kơ đŏk, hŏk pơhrăm nơ̆r Sư wă kơ rai đunh rai jing thoi Kră Yang păng pơjao pơyơ̆r akâu jăn awih awăn păng ưang Anăn Kră Yang.
Ơ Kră Yang Yêsu Ih bơih ‘Bok Krist, Kon ‘Bok Kei-Dei, apinh Ih ăn kơ inh ling lang pơư pơang kơ Ih jing Yŏng Tơ’ngla chăl arih inh wă kơ dôm tơdrong tơchĕng păng tơdrong jang inh ling lang wă kơ Ih lăp đon păng ưang Anăn Ih. Yua anăn Kră Yang Yêsu Krist, Amen.
Kiơ̆ kơ ih, ‘Bok Krist Sư kon bu? Lu bơ̆n arih tam trŏ thoi Nơ̆r Kră Yang ăn kơ bơ̆n băt dah ưh?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 38
Kênh Youtube BHKTHN:
