Klei Aê Diê Blŭ: II Kôrantô 4:16
Êlan kliăng: “Kyuanăn hmei amâo êdu ai ôh. Wăt tơdah asei mlei hmei dôk rai ƀrư̆ ƀrư̆, knuih hlăm lam hmei arăng lŏ bi mrâo grăp hruê.” (II Kôrantô 4:16)
Klei êmuh ksiêm mĭn: Mơ̆ng phŭn kbiă hriê klei mlih mrâo kơ klei hdĭp phung đăo? Ya boh sĭt klei mlih mrâo hlăm klei hdĭp ung mô̆? Si klei jăk mơak kơ klei hdĭp dua čô mâo klei mlih mrâo hlăm Khua Yang Yêsu? Ya klei brei drei ngă čiăng bi mđĭ hĭn klei jăk mơak drei?
Êlan 16 kčưm hŏng boh blŭ “Kyuanăn” čiăng kñăm kơ boh tŭ dưn klei mlih mrâo hlăm Khua Yang Yêsu (II Kôrantô 4:7-15). Wăt tơdah grăp čô anak Aê Diê tŭ lu klei dleh knap ti knhuang êlan tui hlue Khua Yang, ƀiădah srăng dưn klei myang klei kbiă lŏ hdĭp hlăm Khua Yang Yêsu, guh kơang hlăm ênuk hlŏng lar. Klei anei bi mđĭ ai phung đăo kơ Krist amâo êdu ai ôh ƀiădah knuih hlăm lam grăp hrue mlih mrâo nanao. Wăt tơdah kđeh asei mlei hroh trŭn êdu awăt ƀiădah klei hdĭp myang dôk kjăp ktang nanao. Klei mlih mrâo brei kbiă hriê mơ̆ng klei bi mlih mơ̆ng lam ai tiê klei mĭn truh kơ knhuah hdĭp grăp hruê.
Hlăm klei hdĭp ung mô̆, brei mâo klei mlih mrâo hŏng klei bi mđĭ hĭn klei jăk mơak dua čô, bi tŭ klei awăt êdu hdơ̆ng pô leh anăn mđrăm mbĭt bi mlih. Mta klei tal êlâo hĭn kơ gŏ sang phung đăo jing hnơ̆ng klei khăp kơ Khua Yang, ung mô̆ ktang khăp kơ Khua Yang, gưt asăp Khua Yang hlăm klei hdĭp dôk dơ̆ng ƀơ̆ng huă grăp hruê srăng bi jĕ giăm hĭn. Hlăm knăm bi kuôl mtao mniê Elizabeth II, khua kiă kriê kluôm (Đức Tổng Giám mục) Geoffrey Fisher mtă mtăn kơ diñu: “Yang Krist Pô dôk hdĭp hlŏng lar ară anei hin dôk tinei čiăng hơêč hmưi kơ diih dua. Ktang nao giăm Khua Yang hĭn snăn diih srăng giăm hĭn hdơ̆ng diih”. Sa klei mtă mtăn thâo mĭn êdimi kơ klei jăk mơak hlăm gŏ sang. Hlăm Khua Yang Yêsu wăt tơdah kđeh asei mlei hriê kơ mduôn khua, hroh trŭn hlue mbĭt hŏng thŭn mlan, ƀiădah knhuah hdĭp klei khăp, klei doh jăk ăt đĭ kyar hĭn nanao, mlih mrâo amâo mâo mdei ôh.
Tơdah lač kơ klei bi mđĭ hĭn klei jăk mơak klei hdĭp ung mô̆, năng ai mâo đa đa pô bi mĭn kơ mnơ̆ng brei, hiu čhưn hrăm mbĭt… jih klei anăn jing jăk, năng ngă, ƀiădah čiăng čiêm rông nanao brei drei mđing uêñ klei mtrŭt hŏng klei khăp mơ̆ng lam mbĭt hŏng bruă ngă bi êdah ti tač thâodah bruă điêt dhiêt hlăm klei hdĭp grăp hruê. Čiăng kơ ana kyâo mtâo mtah mda, amâo djŏ ôh sui sa blư̆ krih êa bi lu, ƀiădah krih êa nanao, buč rơ̆k, khăt hĕ adhan hla krô… amâodah čiăng kơ asei mlei mâo klei suaih ktang, amâo djŏ ôh grăp thŭn pioh knŏng dua tlâo hruê bi hriăm mjuăt asei mlei hŏng jih ai tiê, ƀiădah brei jing klei mưng mjuăt bi hriăm grăp hruê. Msĕ snăn mơh, hlăm mmông dôk huă ƀơ̆ng mbĭt thâo bi kah mbha bruă ngă grăp hruê, mơ̆ng bruă ngă đơ điêt hlăm pưk sang, klei blŭ mni, klei blŭ bi mđĭ ai sĭt kpă grăp hruê, asăp blŭ êdu êun, hưn klei pô ngă ka djŏ … mjing sang pưk jing gŏ sang anôk kơup mđao êđăp ênang. Khua pô mtô Billy Graham čih snei, tơdah dua čô ung mô̆ gĭr bi mđĭ klei hdĭp ung mô̆ mdrăng knŏng sa mkrah hŏng hlăk diñu mrâo bi khăp, diñu srăng bi kngăr ƀuh klei mngač siam hĭn!
Si ngă ung mô̆ diih dưm êlâo hĭn klei bi mđĭ knuih jăk hlăm lam hdơ̆ng diih mơ̆?
Wah lač: Ơ Ama klei khăp, akâo Ih đru ung mô̆ hmei amâo mdei ôh bi mđĭ klei khăp dua čô ung mô̆ hŏng klei mlih mrâo hĭn nanao grăp hruê knuih hlăm lam. Akâo kơ Ih brei pưk sang hmei jing sa gŏ sang anôk kơup mđao êđăp ênang.
Dlăng Klei Aê Diê Blŭ hlăm tlâo thŭn: Y-Mathiơ 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
